Úkuecha 1:1-26
1 Teófilu, jiáni engakeni orheta karachipka, iámindu imani ambekini karachiska ambe enga Jesúsi ueenapka úni ka jorhentpini
2 asta ima jurhiatikua jamberi enga auandarhu pánhapka, ísï tátsekua enga na espiritu santu jimbo arhistakuapkia imani apostoliichani enga ima erakuapka.
3 Ísï tátsekua enga xáni no sési nitamakuarhipka, xarhakuaspti ka sési exeraaspti eska ima tsípiti jarhaspka. Ka 40 jurhiatikua jimbo someni xarhakuaspti ka Tata Diosïiri Reinueri ambe aianguasïreendi.
4 Enga imeechani jingoni tánguarhintatini japka, arhiaspti: “Jerusaléni pakara je. Seguirii je erokuarhini ambe enga Taati aiatspeka, ima ambe engaksïni ji aianguka.
5 Jimboka Juanu itsï jingoni itsï ataaspka* kʼuiripuechani, joperu no ióni jimbo, chájtsï itsï atanhaaka espiritu santu jimbo”.
6 Jimajkani, engaksï tánguarhintapka, kurhamarhisptiksï: “Tata, ¿tʼuri iásïtki íntsaantaua juramukua Israeli anapuechani?”.
7 Ka ima arhiaspti: “Chájtsï no jatsiska para míteni na jandora o na jatini úkuarhia i ambe, jimboka Taatijkusï sésikua jatsika para uandani na jatini ísï úkuarhia.
8 Joperujtsï chá intsïnhaaka uinhapikua jiáni engaksïni espiritu santu juuaka andarhierani. Ka chájtsï juchiiti ambe uandantaaka Jerusaléni ka iámu Judea ka Samariaisï ka asta jima jamberi enga sánderu iauaniika parhakpinirhu”.
9 Enga na ísï arhiapkia, auandarhu pánhaspti ka imeechaksï eranguntaspti. Ka tátsekua nube ma ójchakuraspti ka imeechaksï nóteru úsptia exeni.
10 Imeechaksï eranguntaxapti enga ima karhanchentani japka ka jimajkuksï xarhakuaspti tsimani achamasïicha engaksï xukuparhakua urapiti jukarini japka
11 ka arhiasptiksï: “Galilea anapu achamasïicha, ¿andijtsïsï jimini jaki anhandetini auandarhisï erancheparini? Jesúsi, enga chánksïni jingoni japka, ka enga auandarhu pánhantakia, ménderu májkueni junguati,* ísï eskajtsï na exeka auandarhu karhanchentani”.
12 Tátsekuaksï Jerusaléni kʼuanhatsentaspti jima uératini enga arhinhajka Olibusïiri juáta, juáta ma enga Jerusaléni no iauani jaka ka enga ma kilometrisï iauani jaka.*
13 Engaksï na niárapkia Jerusaléni, kuarturhuksï karharaspti enga karhakua japka, jima engaksï imeecha pakarani japka. Jima jarhaspti Pedru, Juanu, Santiagu ka Andrési, Felipe ka Tomási, Bartolomé ka Mateu, Santiagu Alfeu uájpa, Simóni ima enga tsípikua jingoni jámajka ka Judasï Santiagu uájpa.
14 Iáminduechaksï uékasïreendi májku ambe úni, jimboksïsï méntku úndani japti kómarhini Tata Diosïni; máru uarhiitiichaksï ístu imeecha jingoni jarhaspti ka María Jesúsiiri amamba ka ístu Jesúsiiri ermanu jémbeecha.
15 Imani jurhiatikuechani jimbo, Pedru terujkani niárakuaspti erachiichani* engaksï jima japka —ma 120 kʼuiripuechaksï tánguarhintatixapti— ka arhiaspti:
16 “Achamasïicha, erachiicha, jatsispti para ísï úkuarhini eska na karakata jaka Karakateecharhu. Ima ambe enga espiritu santu tʼuini uandarini japkia Dabidini jimbo Judasïiri ambe, ima enga paapka imeechani engaksï Jesúsini jupikapka.
17 Ima juchantsïni jingoni jámasïreendi ka erakunhaspti para imajtu juchantsïni jingoni marhuani.
18 —Ka i achamasï, echeri ma piáspti imani sentabu jingoni enga maiamunhapka enga ísï no sési niátapka, ka enga éjpu andaskuerapka, méntku chareeraspti ka iámu sïturhi uéarhaspti.
19 Iámindu Jerusaléni anapuechaksï mítespti ini ambe jimboksïsï Akéldama arhirapti imani echerini, enga imeecheeri idioma jimbo arhikuekajka ‘iurhiriiri echeri’—.
20 Jimboka karakata jarhaska Salmueri karakateecharhu: ‘Eska imeeri kʼumanchikuarhu pínandintaaka ka eska no nema irekaaka jima’ ka ‘Eska máteru nema intsïnhaaka imeeri ánchikuarhitani enga jindeeka para orhejtsïkuni’.
21 Jimbosï uétarhijti eska máteru nema erakunhaaka, nema engajtsïni méntkisï pámbeka, xáni ióni enga Jesúsi* juchantsïni jingoni jámaka,
22 jiáni ueenani enga Juanu itsï atapka, asta ima jurhiatikua jamberi enga juchantsïni jingoni japka ka auandarhu pánhani, paraka i achamasïjtu enga erakunhaaka juchantsïni jingoni uandantaaka eska Jesúsi tsíntaska”.
23 Ísï jimbo, tsimani achamasïichanksï erakuaspti: ma jindeespti José enga Barsabási arhinheenga ka enga ístu ísï mítekateepka komueska Justu, ka ístuksï Matíasini erakuspti.
24 Tátsekuaksï kómarhispti ka uandasptiksï: “Oh, Tata Diosï Jeoba, tʼu engari míteka ambe engaksï kʼuiripuecha jatsika imeecheeri mintsitarhu, arhijtsïni nákiri achamasïni erakuski
25 para apostoliini ka parakeni marhuacheni, jimboka Judasï nóteru uékaskia úni imeeri ánchikuarhitani ka ústi ambe enga ima uékaka”.
26 Jimajkani suerte jimboksï exespti, ka suerte Matíasini niárakuspti ka jiáni uératini, imajtu 11 apostoliichani jingoni kuenta úkuarhisptia.*
Notecha
^ Exe je Glosario, itsï atakuarhini; itsï atani.
^ Griegu jimbo: “juuati”.
^ Griegu jimbo: “enga ma sábadu iauani jaka”. Na enga xáni iauani ueenga xanharani judiu ma sábadu jurhiatikua jimbo.
^ O “ermanuechani”.
^ Griegu jimbo: “Tata Jesúsi”.
^ Indenisï arhikuekani jati eska niáraspka májkueniini eska máteru 11 apostoliicha.
