Úkuecha 10:1-48
-
Korneliu jánhaskua ma exesïndi (1 a 8)
-
Pedru jánhaskua ma jimbo exeasïndi animaliichani engaksï pímbinhajkunhantakia (9 a 16)
-
Pedru nirasïndi Korneliuni exeni (17 a 33)
-
Pedru aianguasïndi ambakiti aianhperakuani imeechani engaksï no judiueka (34 a 43)
-
‘Tata Diosï iáminduechani májkueni kaasïndi’ (34 ka 35)
-
-
Imeecha engaksï no judiueka intsïnhasïndiksï espiritu santu ka itsï atanhasïndiksï (44 a 48)
10 Jiánisï, Sesarea achamasï ma jarhaspti enga Korneliu arhinheenga, ima orhejtsïkuasïreendi 100 sondaduechani engaksï Italia anapuepka.
2 Achamasï máespti enga kánikua janhanharhienga Tata Diosïni ka enga chénharhienga Tata Diosïni iámindu imeeri kʼumanchikuarhu anapuecha jingoni. Kánikua jarhuataasïreendi imeechani engaksï uétarhinchani jarheenga* ka méntku kómarhini jarhasïreendi Tata Diosïni.
3 Ka tresisï xatini anapu,* ima sési exespti jánhaskua ma jimbo na enga Tata Diosïiri ánjeli inchani japka jima enga ima japka ka arhispti: “¡Korneliu!”.
4 Korneliu ísku pakaraspti erateni jimboka chéxapka ka kurhamarhispti: “¿Ambe úskia Tata?”. Ka ima arhispti: “Tata Diosï kurhaasïndi engari tʼu kómarhijka ka ístu exesïndi na engari jarhuataajka imeechani engaksï no ma ambe jatsikuarheka ka miáni jarhasïndi ambe engari xáni újka.
5 Ísï jimbo, axaa máru achamasïichani jini Jope paraksï achamasïni ma juáni enga Simóni arhinhajka, enga ísï mítekateeka komueska Pedru.
6 Simóniiri kʼumanchikuarhu pakaraxati, i achamasï sïkuiri ambakerasïndi ka marirhu uanamukuteni irekasti”.
7 Ka enga na níntapkia ima ánjeli enga uandontskuarhekupka, ima jirejiresï ióarhiaspti tsimani jántspiriichani ka ístu sondaduni ma enga janhanharhienga Tata Diosïni,
8 méntku iámu ambe aianguaspti ka ireta Jope axaaspti.
9 Ka ísï pauandikua engaksï imeecha niárani japkia iretarhu, Pedru kʼumanchikuarhu karharaspti para Tata Diosïni kómarhini ka teruxutinisïisptia.*
10 Joperu ima uarhixaptia kʼarhimani ka ísï pʼikuarheraxapti enajki kókuani tʼirepirinia. Ka enga jamberi úmanhantani japka, ima úndaspti jánhaskua ma exeni
11 ka exespti na enga mítakuarhetini japka auanda ka ístu na enga kétseni japka echerirhu kʼéri sábaneeni jásï ma linueri enga tʼápuru jupikakata japka.
12 Ka jimaksï mámaru járhati animaliicha jarhaspti engaksï tʼámu jantsiriichani jukaaka ka ístu ima animaliicha engaksï antsikukuarhijka echerirhu* ka auandarhu anapu pájaruecha.
13 Jiájkani nema arhispti: “¡Pedru, jauara, ataa ka auantsï!”.
14 Joperu Pedru arhispti: “Nómbe Tata. Ji no méni arhaxaka imani ambe engani no jatsika para arhani o imani ambe enga no pímbinhasï jaka ísï eska lei na uandajka”.
15 Ka para tsimani úni jámania, ménderu kurhaaspti uandakua ma enga arhipka: “Ásteru uandaia eska no pímbinhasï jarhaska ima ambe enga Tata Diosï pímbinhajkuntakia”.
16 Ka para tanimu úni jámania, ménderu kurhaaspti uandakua ma ka sábana jirejiresï auandarhu karhanchentaspti.
17 Ka Pedru no jánhaskeeraspti ambesï úkuarhini japi ka méntku eratsentaxapti ambe arhikuekeeni ima jánhaskua. Ka jiájkanisï, ima achamasïicha enga Korneliu axaapka, jámaxaptiksï kurhanguarhini nani irekaspi Simóni ka iásïksï jamukuteni jarhasptia.
18 Uámutasptiksï ka kurhanguarhisptiksï sini jima pakaraxapi Simóni, ima enga ísï mítekateepka komueska Pedru.
19 Ka enga Pedru útasï eratsentani japka ambe arhikuekasïreeni ima jánhaskua, espiritu santu arhispti: “¡Exe! Tanimu achamasïichaksïni jámaxati jirinhantani.
20 Ísï jimbo, jauara, kétsenta ka ní imeecha jingoni jimbokani ji axaaska”.
21 Jimajkani Pedru kétsentaspti ka niraspti andarhieraani imani achamasïichani ka arhiaspti: “¿Jíndentsïnisï jámani jaki jirinhantani? Ixú jarhaskia. ¿Nájtsï arhisïni?”.
22 Imeechaksï arhispti: “Korneliu achamasï máesti enga sondaduechani orhejtsïkuajka, kʼuiripu ma enga sési jámajka ka enga chénharhijka* Tata Diosïni ka iámindu judiuechaksï sési ambe uandasïndi imeeri ambe. Tata Diosï axasti pímbinhasï ánjelini ma para arhini eskakeni pʼímarhipiringa imeo ka parakeni kurhajchani ambe engari tʼu uandapiringa”.
23 Jimajkani Pedru arhiaspti eskaksï inchaakupiringa ka eskaksï jima pakarapiringa.
Ísï pauandikua, jauaraspti ka niraspti imeecha jingoni, ka máru erachiicha* engaksï Jope anapuepka nirasptiksï pámbeni.
24 Ísï pauandikua, niáraspti Sesarea ka Korneliu tʼuini erokaaxaptia ka ístu tʼuini tánaantasptia parienti jémbeechani ka amigu jémbeechani.
25 Enga Pedru inchaakupka kʼumanchikuarhu, Korneliu niraspti kúmuni, tinguikuatsespti ka kʼéri ambe arhispti.
26 Joperu Pedru jauataspti ka arhispti: “Jauara, jimbokani jíjtuni kʼuiripu máeska”.
27 Ka enga útasï imani jingoni uandontskuarheni japka, inchaspti ka exespti eskaksï jima tʼuini uánikua kʼuiripuecha tánguarhintatixapkia.
28 Ima arhiaspti: “Chájtsï sési mítetixaka eska lei uandasïnga eska judiu ma no jatsiska para sési pájperani imani jingoni enga no judiueka o andarhierani. Joperureni Tata Diosï exerastia eskani no jatsiska para uandani eska kʼuiripu ma no pímbinhasï jarhaska.
29 Jimbosïni jirejiresï juka engajtsïni chá nika jirinhantani. Jimajkani, arhijtsïni je andijtsïnisï pʼitajkuarhi”.
30 Ka Korneliu arhispti: “Tʼámu jurhiatikuestia engani kómarhini japka Tata Diosïni jucheeni, ka i jandorisïispti, tresisï,* engareni ma repentku xarhachepka achamasï ma ka imeeri takusï meremerexexapti
31 ka arhistirini: ‘Korneliu, Tata Diosï kurhaasti engari tʼu kómarhini japka ka ístu miáxati na engari jarhuataajka imeechani engaksï no ma ambe jatsikuarheka.
32 Ísï jimbo, arhi nemani eska niuaka Jope ka pʼitajkuarhi Simónini, enga ísï mítekateeka komueska Pedru. Ima Simóniiri kʼumanchikuarhu pakaraxati, achamasï ma enga sïkuiri ambakerajka ka enga marirhu uanamukuteni irekaka’.
33 Ka ji jirejiresï axaaska achamasïichani paraksïni nirani jirinhantani ka diosmaiamu engari juka. Ka iásïchi iáminduecha ixú tánguarhintatixakaia Tata Diosïni japarini parachi kurhaani ambe engakeni xáni Tata Diosï Jeoba arhika eskajtsïni aianguaka”.
34 Enga Pedru kurhaapka ini ambe, uandaspti: “Iásï kʼóruni sési míteskia eska Tata Diosï iáminduechani májkueni kaasïnga,*
35 ka eska jaiapanheantasïnga imeechani engaksï chénharhijka* ka engaksï újka ambe enga sési jaka, nani uéjkiksï anapueni.
36 Ima uandakua axakuaspti Israeli anapuechani para aianguani ambakiti aianhperakuani pínandikueri ambe enga tata Jesukristuni jimbo jurhajka. Ka ísï jindeeti iáminduecheeri Tata.
37 Chájtsï míteska ambe enga uandanheenga iámu Judeaisï, ambe ma enga Galilea ueenaka uandanhani, ísï tátsekua enga Juanu na uandantapka eskaksï kʼuiripuecha jatsispka para itsï atakuarhini:*
38 Jesúsi Nasareti anapueri ambesï uandanheendi, na enga Tata Diosï espiritu santu jimbo erakuka ka uinhapikua jimbo, ka ístu eska ima echerirhisï jámasïreenga ambakiti ambe úni ka jarhuataasïreendi imeechani enga Noambakiti no sési úkuani japka,* jimboka Tata Diosï imani jingoni jarhaspka.
39 Jucha exekuarhiska ambe enga xáni úka judiuecheeri ireteecharhu ka Jerusalénisï, joperuksï imeecha chkarirhu* ma uándikusti.
40 Ka tanimu jurhiatikua jimbo, Tata Diosï tsítantaspti* ka sésikua íntskuspti para kʼuiripuechani xarhakuani,
41 joperu no iámindu iretarhu anapuechani sino imeechantku enga Tata Diosï erakuapkia parakaksï exepiringa, juchantsïni engachi imani jingoni tʼirepka ka itsïmani ísï tátsekua enga ima na tsítanhantapkia.*
42 Ístu, imajtsïni juramuchisti eskachi aianguapiringa iretarhu anapuechani ka eskachi iámindu ambe sési aianhpepiringa, eska ima jindeeska enga Tata Diosï erakuka para jusgariuani tsípitiichani ka uarhiriichani.
43 Iámindu Tata Diosïiri uandakua páriichaksï* uandantaxati imeeri ambe, eska imeeri nombri jimbo, iámindu imeecha engaksï imani mintsikaaka puáminhantaaka imeecheeri pekaduechani”.
44 Ka enga Pedru útasï uandani japka, espiritu santuksï intsïnhaspti iámindu imeecha engaksï kurhajchani japka.
45 Ka ima judiuecha engaksï jakajkupkia ka engaksï nípka Pedruni pámbeni, ískuksï pakareeraspti jimbokaksï imeecha engaksï no judiuepka, ístuksï intsïnhaxaptia espiritu santu enga Tata Diosïiri intsïmperata máeka,
46 jimbokaksï kurhachakuaxapka eskaksï mámaru jásï idioma uandaxapka ka ístu eskaksï kʼéri ambe arhixapka Tata Diosïni. Tátsekua, Pedru uandaspti:
47 “Íjtuksï intsïnhastia espiritu santu ísï eska jucha. ¿Andi nema uaa pʼínguani paraksï itsï jingoni itsï atanhani?”.
48 Ísï jimbo, uandaspti eskaksï tata Jesukristueri nombri jimbo itsï atanhapiringa. Tátsekuaksï arhispti eska imeecha jingoni pakarapiringa máru jurhiatikua.
Notecha
^ O “Uánikua ambe íntspisïreendi iretarhu pʼamojperakua jimbo”.
^ Griegu jimbo: “ora para sáno nuebe úni jámani”.
^ Griegu jimbo: “jindeespti ora para seisi úni jámanisï”.
^ O “ka ístu akuitsiicha ka tikuiniini járhatiicha”.
^ O “janhanharhijka”.
^ O “ermanuecha”.
^ Griegu jimbo: “ora para nuebe úni jámani”
^ O “májkueni exeasïnga”.
^ O “janhanharhijka”.
^ Exe je Glosario, itsï atakuarhini; itsï atani.
^ O “ka ambakeraantasïreendi imeechani engaksï Noambakitiiri jájki jimbo japka”.
^ O “anhatapurhu”.
^ Griegu jimbo: “jauatantaspti”.
^ Griegu jimbo: “jauatanhantapkia”.
^ O “profeteechaksï”.
