Úkuecha 12:1-25
12 Ka ístu jiánisïispti enga juramuti Erodesi ueenapka no sési kaani máru kúnguarhikuarhu anapuechani.
2 Espada jimbo uándikutarkuarhispti Santiaguni, Juanueri ermanu jémbani,
3 ka enga exepka eskaksï judiuecha sési exespka ambe enga ima úpka, Pedruntu jupirkuarhispti. —I ambe jiáni úkuarhispti enga Kʼuínchikua úkuarhini japka enga Kurhinda No Xarhipiti* Jukari Únheenga—.
4 Ísï jimbo, jupirkuarhispti, ónhatarkuarhispti ka 16 sondaduechani arhiaspti parakaksï chúskutapiringa tʼámuchani kuáni, jimboka uékasïreenga iretarhu anapuecha jingoni páni* ísï tátsekua enga na nitamapiringia Paskua.
5 Ísï jimbo, ónhasptiksï Pedruni ka jimaksï jurajkuspti. Ka kúnguarhikuarhu anapuechaksï méntku kómarhijpikuxapti Pedruni.
6 Ima chúrikua ante de Erodesi iretarhu anapuecha jingoni páni Pedruni, ima kʼuíxapti ka tsimani sondaduechaksï mándani ladu jimbo jakuspti ka tsimani kadeneecha jimbo jójkurhatixapti, ka jarhasptiksï máteru sondaduecha engaksï kárselirhu jamukuteni kuáni japka.
7 Joperu jimajku xarharaspti Tata Diosï Jeobaeri ánjeli ma ka tʼíntskua ma iámu tʼíntskaspti jima enga Pedru ónhakuarhetini japka. Jimajkani ánjeli pʼáparhakuspti Pedruni para tsínharhitani ka arhispti: “¡Jauara kókuani!”. Ka ima jirejiresï uéjkurhantaaspti kadeneechani.
8 Ánjeli arhispti: “Jukanta kókuani takusï ambe* ka jukaanta kuarhachiichani”. Ima jirejiresï ísï úspti. Ka tátsekua arhispti: “Jukanta chiiti takusïni ka ju kókuani”.
9 Jiájkani Pedru uéntaspti ka niraspti chúxapani, joperu ima no kuenta íntskukuarhespti eska meru ísïispka ambe enga ánjeli úni japka, jimboka eratsesïreenga eska jánhaskua ma exexapka.
10 Ka uanopakuasptiksï imani sondaduechani engaksï orheta japka ka ístu imeechani engaksï tátsekua japka astakaksï niárapka imani puertarhu enga tiámueriipka ka enga iretarhu pájpienga ka puerta ísku mítakuarhespti. Tátsekuaksï uéakuspti ka xanharuksï ma jupikaspti ka ánjeli jimajku nóneespti.*
11 Ka Pedru jiáni kuenta íntskukuarhespti ambe enga úkuarhini japka ka uandaspti: “Iásï kʼóruni sési míteskia eska Tata Diosï Jeoba axaska imeeri ánjelini ka eskarini kuájchakuska Erodesiiri, ka ístureni kuájchakusti ima ambeeri engaksï judiuecha uékeenga eskani úkuarhinchapiringa”.
12 Enga na kuenta íntskukuarhepkia ambe enga úkuarhini japka, Maríeri kʼumanchikuarhu niraspti, María Juanueri amambeespti engaksï Markusï arhienga, jimaksï tánguarhintatixapti uánikua chúxapatiicha ka kómarhixaptiksï.
13 Enga na niárapkia, téndenastaspti ka uátsï ma niraspti kurhakuarhini, ima uátsï Rode arhinhasïreendi ka jima jántspisïreendi.
14 Ka enga míchakupka Pedruni, ima kánikua tsípispti ka no jamberi mítakuspti, masi úspti kʼuanhajpatseni para aianguani eska Pedru jamukuteni jarhaspka.
15 Joperu imeechaksï arhispti: “Tʼuri ísku ambe ma uandaxaka”.* Joperu ima méntku úndaxapti arhiani eska meru ísïispka. Jiájkanksï arhispti: “Ánjeli máesti”.*
16 Ka jiniani Pedru seguirixapti téndenastani, ka engaksï na mítakupkia, ískuksï pakareeraspti engaksï exepka.
17 Ka ima níjkurhakuaspti parakaksï nóteru xáni uinhachapiringia ka aianguaspti na enga Tata Diosï Jeoba petantapka kárselirhu. Jimajkani arhiaspti: “Aiangu je ini ambe Santiaguni ka ístu erachiichani”.* Ka enga na ísï arhiapkia, uéntaspti ka máteru naniisï niraspti.
18 Ka enga na erandepkia, sondaduechaksï no jánhaskasïreendi ambe úni, jimbokaksï no mítespka nani jarhaspi Pedru.
19 Erodesi méntku iápurisï jámaspti jirinhantani, joperu no nani exentaspti, jimbosï pʼitajkuarhiapti sondaduechani para kurhamarhiani ambe úkuarhispi ka tátsekua juramuspti eskaksï kastigariuapiringa. Ísï tátsekua, Sesarea niraspti Judea uératini ka ióni sáni pakaraspti jima.
20 Ka Erodesi kánikua ikiakuaxapti Tiru ka Sidóni anapuechani.* Íksï kʼuiripuecha jima nirasïreendi tʼirekua ambe piáni nani enga Erodesi juramuni japka, jimboksïsï nípti Blastu jingoni uandontskuarheni ka kurhakusptiksï eska jarhuataapiringa ka eska uandontskuarhepiringa juramuti jingoni paraksï nóteru arhirperata ambe jatsinia. Blastu exesïreendi iámindu ambe juramutiiri kʼumanchikuarhu.*
21 Enga niárapkia ima jurhiatikua engaksï kʼuiripuecha tánguarhinteenga, Erodesi sési xukuparhantaspti* ka jima uaxakaspti nani engaksï juesiicha jarhajka ka ueenaspti arhijtsïkuani kʼuiripuechani.
22 Jiájkani ima kʼuiripuecha engaksï jima tánguarhintatini japka, ueenasptiksï uinhachani: “¡No kʼuiripusï ma uandani jati, diosïsï ma uandani jati!”.
23 Ka Tata Diosï Jeobaeri ánjeli ma úspti eska Erodesi jirejiresï pʼamenchapiringa, jimboka no kʼéri ambe arhispka Tata Diosïni. Ka karhasïichaksï arhaspti ka ísï uarhispti.
24 Joperu uápurisï mítekuarhixaptia Tata Diosï Jeobaeri uandakua ka sánderu uánikua kʼuiripuechaksï jakajkuxaptia.
25 Engaksï Bernabé ka Saulu na kʼamarapkia jarhuataani Jerusaléni anapuechani, kʼuanhatsentasptiksï ka Juanunksï pájtaspti, imani engaksï ístu Markusï arhienga.
Notecha
^ O “No Kʼúratarakua”.
^ O “iretarhu anapuechani japarini jusgariini”.
^ O “Jónguarhinta”.
^ O “jurarkuspti”.
^ O “Tʼuri loka jarhaska”.
^ Griegu jimbo: “Imeeri ánjeliisti”.
^ O “ermanuechani”.
^ O “uékaxapti uarhipeni Tiru ka Sidóni anapuecha jingoni”.
^ Griegu jimbo: “jima enga juramuti kʼuíenga”.
^ O “imani xukuparhakuani jukantaspti engaksï juramutiicha jukantajka”.
