Úkuecha 13:1-52
13 Ka imani kúnguarhikua jimbo enga Antiokía japka, jarhasptiksï máru Tata Diosïiri uandakua páriicha* ka jorhentpiriicha: Bernabé, Simeóni engaksï arhienga Nijeri, Lusiu Sirene anapu, Manaéni enga májku kʼéri jorhendanhapka Erodesi jingoni enga jimeesïsï juramuni japka, ka ístu jima jarhaspti Saulu.
2 Engaksï Tata Diosï Jeobani marhuakuni japka ka engaksï kʼarhinda* japka, espiritu santu arhiaspti: “Míndachejtsïni je Bernabéni ka Sauluni jimbokani erakuaska paraksï úni ambe ma”.
3 Jiájkanksï kʼarhinda jarhaspti ka kómarhisptiksï, ka ísï tátsekua, pʼájtsïkuasptiksï ka axaasptiksï.
4 Jiájkani espiritu santu axaaspti ini achamasïichani ka Seleusiaksï kétsemaspti ka jimaksï barkuni ma jataspti paraksï Chipre nirani.
5 Engaksï na niárapkia Salamina, ueenasptiksï Tata Diosïiri uandakuani aianhpini jima engaksï judiuecha tánguarhijka para Tata Diosïni kómarhini. Ka Juanu imeecha jingoni jámaxapti para jarhuataani.
6 Engaksï na iámu parhimepkia islani astakaksï Pafosi niárapka, jimaksï exentaspti judiuni ma enga Bar-Jesúsi arhinheenga, i achamasï sïkuami máespti ka uandasïreendi eska Tata Diosïiri uandakua páriispka.
7 Ka juramuti* ma jingoni jarhaspti enga Serjiu Paulu arhinheenga, achamasï ma enga kánikua jorhenapka. Ka i achamasï pʼitajkuarhispti Bernabéni ka Sauluni jimboka uékaxapka míteni Tata Diosïiri uandakueri ambe.
8 Joperu Elimasi ueenaspti no sési kaani ka no uékasïreendi eska juramuti mintsikapiringa Tatani —inde nombri Elimasi, arhikuekasïndi sïkuami—.
9 Jiájkani Saulu enga ístu arhinheenga Pablu, kánikua espiritu santu intsïnhaspti, tátsekua eratespti
10 ka uandaspti: “Tʼuri no sési chkuanderasïnga ka pururi no sési ambe niátasïnga, tʼuri Noambakiti uájpeeska ka méntkuri no jaiapanhentasïnga imani ambe enga jurhimbitiika. ¿Andiresï támisï jorhentpini jaki ka no imani ambe enga Tata Diosï Jeoba uandajka?
11 Exe na engakeni no sési úchiaka Tata Diosï Jeoba: nóteruri uaakia exeni ka nóri uaaka exeni ióni sáni na enga tʼíntskajka jurhiata”. Ka ima iámu xurhanharhispti* ka mátirku pápkʼanhaskaspti ka úndaspti pʼápʼajkurhani para nema jupijtatini pántani.
12 Enga juramuti exepka ambe enga xáni úkuarhipka, niáraspti jakajkuni jimboka kánikua tsitispka ambe enga Tata Diosï Jeoba jorhentpijka.
13 Pafosi uératini, Pablu ka imeecha engaksï imani jingoni jámani japka, parhimesptiksï ka Pergaksï niáraspti enga Panfilia jaka. Joperu Juanu jima jurajkuaspti ka Jerusaléni kʼuanhatsentaspti.
14 Ka imeechaksï Perga uératini seguiriispti nirani ka Antiokíaksï niáraspti enga Pisidia jaka. Ka sábadu jurhiatikua jimbo, inchasptiksï jima engaksï judiuecha tánguarhijka para Tata Diosïni kómarhini ka jimaksï uaxakaspti.
15 Enga na arhikuarhintapkia ambe enga xáni karakata jaka Leirhu ka ambe engaksï xáni uandaka Tata Diosïiri Uandakua Páriicha, imeecha engaksï jima orhejtsïkuenga nani engaksï judiuecha tánguarhijka para Tata Diosïni kómarhini, uandakua axakuasptiksï ka arhiasptiksï: “Erachiicha,* engajtsï uéjka arhistakuani kʼuiripuechani parajtsï uinhaperaantani, uaakajtsï arhiani ambe engajtsï uéjka”.
16 Jimajkani Pablu jauaraspti, níjkurhakuaspti ka arhiaspti:
“Israeli anapu achamasïicha ka chá engajtsï chénharhijka* Tata Diosïni, kurhaa je.
17 Israeliiri Tata Diosï, juchaari ióntki anapu parientiichani erakuaspti ka kʼéri ambe úspti ini iretani jiáni engaksï Ejiptu jatsïpeni* japka ka petaatantaaspti jima uératini imeeri jájki jingoni enga xáni uinhapitiika.
18 Ka sáno 40 uéxurhinisï tekaakuantaspti jiáni engaksï desierturhisï jámani japka.
19 Enga na kʼamajkuapkia siete ireteechani Kanaáni, imeechani arhukukuaspti imani echeriichani.
20 Iámindu i ambe, ma 450 uéxurhini jimbo úkuarhispti.
”Tátsekua, juesiichani peeraaspti* asta jiáni jamberi enga Samueli jindeepka Tata Diosïiri uandakua pári.
21 Joperu tátsekua, ueenasptiksï inchandimeni uandani eskaksï juramutinisï ma uékeenga ka Tata Diosï Saúlini peerakuaspti, Kisi uájpani, enga Benjamíniiri kʼumanchikuarhu anapuepka, ka ima 40 uéxurhini juramukuaspti.
22 Tátsekua, kénditaspti ka Dabidini peeraspti para juramutiini ka ísï uandaspti imeeri ambe: ‘Dabidi, Jesé uájpa, achamasï máesti enga kánikua sési pʼikuastajka juchiiti mintsitani. Indesï uaati iámindu ambe engani ji uéjka’.
23 Tata Diosï i achamasïiri uájpani ma erakusti enga jindeeka Jesúsi para pʼímutantaani Israeli anapuechani, ísï eska ima na aiatspipka.
24 Ka ante de ima janoni, Juanu aianguaspti iámindu Israeli anapuechani eskaksï jatsispka para itsï atakuarhini* paraksï xarhatani eskaksï móantaspkia.
25 Joperu enga na kʼamarani japkia aianhpini,* Juanu uandasïreendi: ‘Ji no imeeska engajtsï chá eranhaskani jaka. Joperu mítetini ja je eska jurhaxaka nema engani ji no jamberini jukanchaka kuarhachiichani kuerandukuani’.
26 ”Erachiicha, chá engajtsï Abraáni uájpeeka ka engajtsï chénharhijka* Tata Diosïni, Tata Diosïjtsïni juchantsïni axachesti imeeri uandakuani parajtsïni arhini nénachi uaa pʼímutantskata uérani.
27 Joperuksï Jerusaléni anapuecha ka juramutiicha, nóksï jaiapanhentasti imani enga pʼímutaantapiringa, joperu engaksï jusgaripka, ísïksï úspti eskaksï Tata Diosïiri Uandakua Páriicha na karaka, ima ambe enga mándani sábadu arhikuarhintajka.
28 Ka nóksï ambe ma exekuntaspti ka ísku jatinksï arhispti Pilatuni eska uándikutarkuarhipiringa.
29 Ka engaksï na iámindu ambe ísï úpkia eska na karakata jaka imeeri ambe, késkuntasptiksï chkarirhu* ka tumbarhuksï ma peeraspti.
30 Joperu Tata Diosï tsítantaspti
31 ka ima uánikua jurhiatikua xarhakuaspti imeechani engaksï Jerusaléni nípka imani jingoni Galilea uératini. Ka iásï indeechaksï aianguaxatiia iretarhu anapuechani imeeri ambe.
32 ”Ísï jimbo, juchaksïni ambakiti aianhperakuanisï aianguni jaka, ima ambeeri engaksï juchaari ióntki anapu parientiicha aiaminhapka.
33 Ka Tata Diosï iámindu ambe ísï úspti eska na aiatspipka parachi jucha sési uéranchani, jucha engachi imeeri uájpeeka, enga ísï tsítantaka Jesúsini, ísï eska na karakata jaka Salmo 2 jimbo: ‘Tʼuri jindeeska juchiiti sapi,* ka iásï uératini ji jindeeskia chiiti taati’.
34 Ka Tata Diosï tsítantasti ka kuerpu ma íntskusti enga no tereaka, ima ini ambe uandasti: ‘Jíkeni kánikua xénchaaka ísï eskani na aiakuka Dabidini ka jíkeni para méntkisï xénchaaka’.
35 Ístu uandasïndi máteru salmo jimbo: ‘Nóri jurajkuaka eska tereaka chiiti jántspiri engakeni no méni jurajkuka’.*
36 Exe je, Dabidi niáraspti marhuakuni Tata Diosïni* enga tsípiti japka, tátsekua uarhispti ka imeeri ióntki anapu parientiicha jingoni jatsinhantaspti ka imeeri kuerpu teresti,
37 joperu ima enga Tata Diosï tsítantaka,* ima kʼóru no niárasti tereni.
38 ”Ísï jimbo erachiicha, mítetini ja je eskaksïni jucha aianguxaka eska imani jimbo, chájtsï uaaka puáminhaantani chaari pekaduechani.
39 Ka Moisésiiri Lei jingoni, chájtsï no úsïreenga arhinhani eskajtsï ambakiti kʼuiripuespka, joperu iásï enga i achamasï ísï uarhika, Tata Diosï arhiauati imeechani engaksï jakajkuaka eskaksï ambakiti kʼuiripueska.
40 Ísï jimbo, jingontku jáma je parakajtsï no ísï úkuarhinchaaka eskaksï Tata Diosïiri Uandakua Páriicha na karaka:
41 ‘Chá engajtsï tsitijka teresmarpeni, exe je, ji úxaka ambe ma iáiasï engajtsï chá irekani jaka,* ka chájtsï no jamberi jakajkuaka na uéjkiksïni nema iámindu ambe sési aianguni, ískujtsï pakareeraaka ka jimajkujtsï uarhiaka’”.
42 Ka engaksï na uéntani japkia, kʼuiripuechaksï arhiaspti eskaksï máteru sábadu jimbo ménderu indeeri ambe uandapiringa.
43 Ka enga na kʼamakurhipkia tánguarhikua* jima engaksï judiuecha tánguarhijka para Tata Diosïni kómarhini, uánikua kʼuiripuecha engaksï Tata Diosïni marhuakuenga, judiuecha ka imeecha engaksï judiu úkuarhipka, nirasptiksï chúxapani Pabluni ka Bernabéni ka iichaksï uandontskuarhekuaspti sáni ka arhiasptiksï eskaksï jánguarhintapiringa para Tata Diosï méntkisï xénchaani.
44 Ka máteru sábadu jimbo, sáno iámindu iretarhu anapuechaksï tánguarhintaspti paraksï kurhaani Tata Diosï Jeobaeri uandakuani.
45 Engaksï judiuecha exepka xáni uánikua kʼuiripuni, kánikuaksï ikiaspti ka úndasptiksï no sési arhini Pabluni, ka ísï úparini, no sési ambeksï uandaxapti Tata Diosïiri ambe.
46 Jimajkani, Pablu ka Bernabé nóksï sáni chéparini arhiaspti: “Chájtsï orheta jatsispka para aiangunhani Tata Diosïiri uandakueri ambe. Joperujtsï no jiókuarhiska ka eratsesïngajtsï eskajtsï no jukanchaska intsïnhani tsípikua para méntkisï..., jimbochisï iásï imeechani niuakia aianguani engaksï no judiueka.
47 Tata Diosï Jeobajtsïni juramuchisti ini ambe engajtsïni arhika: ‘Jíkeni erakuska parari tʼíntskakuani imeechani engaksï no judiueka, parari nirani aianhpini eskaksï kʼuiripuecha uaaka pʼímutanhantani asta jima jamberi enga sánderu iauaniika parhakpinirhu’”.
48 Ka engaksï no judiuecha mítepka ini ambe, kánikuaksï tsípispti ka ueenasptiksï uandani eska kánikua ambakiti ambeespka Tata Diosï Jeobaeri uandakua, ka imeecha engaksï mintsita jingoni uékeenga tsípikua para méntkisï jatsini niárasptiksï jakajkuni.
49 Ka xánisï enga jamberi iámu jimeesïsï mítekuarhipkia Tata Diosï Jeobaeri uandakua.
50 Joperu judiuechaksï mámaru ambe arhiaspti imani uarhiitiichani engaksï kʼéri ambeepka ka engaksï chénharhienga* Tata Diosïni ka ístuksï mámaru ambe arhiaspti imani achamasïichani engaksï kʼéri ambeepka iretarhu. Ka úndasptiksï no sési kámani Pabluni ka Bernabéni ka petaatantaasptiksï iretarhu uératini.
51 Ísï jimbo, imeechaksï uarhanduntaspti* tʼupurini paraksï iretarhu anapuecha mítetini jarhani eskaksï no sési úspka ka tátsekuaksï Ikoniu niraspti.
52 Ka Jesúsiiri chúxapatiichaksï seguiriixapti espiritu santu intsïnhani ka kánikuaksï tsípixapti.
Notecha
^ O “profeteecha”.
^ O “no ma ambe arhani”.
^ O “prokonsuli”. Exe je Glosario, prokonsuli.
^ O “nóteru úsptia exeni”.
^ O “Ermanuecha”.
^ O “janhanharhijka”.
^ O “irekani”.
^ O “íntsaaspti”.
^ Exe je Glosario, itsï atakuarhini; itsï atani.
^ O “imeeri ánchikuarhitani”.
^ O “janhanharhijka”.
^ O “anhatapurhu”.
^ O “uátsïti”.
^ O “engakeni méntkisï kurhajchaka”.
^ O “úspti ambe enga Tata Diosï uéjka”.
^ Griegu jimbo: “jauatantaka”.
^ O “chaari jurhiatikuechani jimbo”.
^ O “kʼéri tánguarhikua”.
^ O “janhanharhienga”.
^ O “uauanduntaspti”.
