Úkuecha 14:1-28
-
Sánderuksï uániisïndia ka ístuksï no sési kánhasïndi Ikoniu (1 a 7)
-
Listraisï, arhiasïndiksï apostoliichani eskaksï diosïiska (8 a 18)
-
Tsakapu jingonksï atasïndi Pabluni joperu no uarhisïndi (19 ka 20)
-
Pablu ka Bernabé uinhaperaantasïndiksï kúnguarhikuechani (21 a 23)
-
Kʼuanhatsentasïndiksï Antiokía enga Siria jaka (24 a 28)
14 Ka engaksï ireta Ikoniu japkia, márkuksï inchaspti jima engaksï judiuecha tánguarhijka para Tata Diosïni kómarhini, ka xánksï sési uandaspti engaksï jamberi uánikua judiuecha ka grieguecha ueenapka jakajkuni.
2 Joperu ima judiuecha engaksï no jakajkupka, mámaru ambeksï arhiaspti imeechani engaksï no judiuepka parakaksï no jakajkukuapiringa erachiichani.*
3 Ísï jimbo, imeechaksï ióni sáni pakaraspti jima ka nóksï sáni chéparini uandontskuarhesïreendi kʼuiripuechani jingoni, jimboka Tata Diosï Jeoba juramukua íntsaaspka, ka Tata Diosï xarhatasïreendi eska kánikua kóndeantaxapka paraksï milagruechani uaani ka uánikua máteru ambe.*
4 Ka máru iretarhu anapuechaksï, judiuechani jingoni úkuarhispti ka máteruechaksï apostoliichani jingoni.
5 Ka imeecha engaksï no judiuepka májkuksï úkuarhintaspti judiuecha jingoni ka imeecheeri juramutiichani jingoni paraksï no sési kámani Pabluni ka Bernabéni ka tsakapu jimboksï ataani.
6 Joperu engaksï imeecha mítepka ini ambe, Listra ka Derbeisïksï niraspti sïpakuarhini —íksï ireteecha Likaonia jarhasti— ka ístu máteru ireteecharhisï engaksï jimeesïsï jaka.
7 Ka seguiriisptiksï jimeesïsï uandantani ambakiti aianhperakuani.
8 Ireta Listra jimbo, acheeti ma jarhaspti enga no ueenga jantsiriichani manataani. Ka no méni úspti xanharani jimboka ísï andajpenuspka.
9 Ima kurhaaxapti ambe enga Pablu uandani japka. Jimajkani Pablu eratespti, ka jimboka exespka eska ima mintsikasïreenga eska úpiringa ambakeranhantani,
10 uinhachaparini arhispti: “Jauara”. Ka acheeti chánhatakuarhespti ka ueenaspti xanharani.
11 Engaksï kʼuiripuecha exepka ambe enga úpka Pablu, uinhachasptiksï Likaonia anapu uandakua jimbo: “¡Diosïichaksï kʼuiripu úkuarhintasti ka kétsestiksï ka juchantsïni jingonksï jámaxati!”.
12 Ísï jimbo, ueenasptiksï uandani eska Bernabé Seusiispka,* joperuksï Pabluni Ermesi* arhispti, jimboka imasï sánderu uandeenga.
13 Seusiiri templu, iretarhu inchaakumani jarhaspti, ka jima anapu saserdoti juaaspti máru ueechani ka korona ambe enga chkurhi jingoni úkata japka, ka uékasïreendi kʼuiripuechani jingoni kéjtsïtakua ambe úni.
14 Engaksï mítepka ini ambe, apostoli Bernabé ka apostoli Pablu karunhesptiksï xukuparhakuani, uiriisptiksï inchaakurhani jimeesïsï engaksï kʼuiripuecha japka ka uinhachasptiksï:
15 “Achamasïicha, ¿andijtsïsï ísï jámani jaki? Juchajtuchi kʼuiripueska ka májkuenchi kómu nitamakuarhisïnga eska chá. Juchaksïni jurhaska aianguni ambakiti aianhperakuani parakajtsï jurajkuaka ini ambe enga no marhuajka ka parajtsï Tata Diosïni andarhientani imani enga tsípiti jaka, enga auandani úka, echerini, marini ka ístu ambe enga xáni jaka auandarhu, echerirhu ka marirhu.
16 Ióntki, ima jurajkuspti eska mándani ireta úpiringa ambe enga uékapiringa úni,
17 ka paraksïni mítetarani neespi ima, méntkisï ambakiti ambe ústi. Úspti eska janipiringa, eskajtsï kánikua pʼikuntapiringa ka ístuksïni kánikua tʼirekua íntskusti ka kánikuaksïni sési pʼikuastasti mintsitarhu”.
18 Ka nájkirukaksï i ambe arhiapka, afuersaksï pʼínguaspti kʼuiripuechani paraksï no kéjtsïtakuani.
19 Ka jimaksï niáraspti máru judiuecha, Antiokía ka Ikoniu anapuecha, ka úndasptiksï mámaru ambe arhiani kʼuiripuechani Pablueri ambe. Ísï jimbo, tsakapu jimboksï ataspti ka antsikupasptiksï petaatantani iretarhu jimbokaksï eratsesïreenga eska uarhispkia.
20 Joperu engaksï Jesúsiiri chúxapatiicha iámu uirhipandatini japka, ima jauaraspti ka ménderu inchaakuntaspti iretarhu. Ísï pauandikua, ireta Derbe niraspti Bernabé jingoni.
21 Engaksï na aianguapkia ambakiti aianhperakuani jima anapuechani ka engaksï na jarhuataapkia uánikua kʼuiripuechani paraksï Jesúsiiri chúxapatiini, ménderuksï Listra, Ikoniu ka Antiokíaksï kʼuanhatsentaspti.
22 Jimaksï uinhaperaantaspti Jesúsiiri chúxapatiichani paraksï seguiriini mintsikani Tatani. Ka ístuksï arhiaspti: “Kʼuanisïndi eskachi kánikua no sési nitamakuarhiaka parachi úni Tata Diosïiri Reinurhu inchani”.
23 Ístu, mándani kúnguarhikuarhu erakuasptiksï máru erachiichani paraksï orhejtsïkutiini, kómarhisptiksï ka kʼarhinda jarhasptiksï* ka Tata Diosï Jeobanksï jurajkukuaspti para ima exeani jarhani, imani engaksï imeecha niárapka jakajkuni.
24 Tátsekuaksï Pisidiaisï nitamaspti ka Panfiliaksï niáraspti
25 ka engaksï na aianhpipka Tata Diosïiri uandakueri ambe ireta Perga, Ataliaksï kétsemaspti.
26 Ka jimaksï barkuni ma jataspti paraksï Antiokía nirani, imani ireta jimbo engaksï erachiicha kómarhipka Tata Diosïni eska újchakurapiringa Pabluni, paraka úpiringa imani ánchikuarhitani úni enga iásï kʼamarapkia.
27 Engaksï na niárapkia, tánaantasptiksï iámu kúnguarhikuarhu anapuechani ka aianguasptiksï ambe enga xáni úpka Tata Diosï imeechani úrapariani. Ístuksï aianguaspti eska Tata Diosï mítakuaspkia puertani parakaksï no judiuechajtu úpiringa jakajkuni.
28 Ísï jimbo, iónksï sáni pakaraspti imani chúxapatiichani jingoni.
Notecha
^ O “ermanuechani”.
^ O “kʼéri ambe”.
^ O “Júpiteriispka”.
^ O “Merkuriu”.
^ O “ka no ma ambeksï arhaspti”.
