Úkuecha 15:1-41
-
Arhirperasïndiksï Antiokía sirkunsisioni jimbo (1 ka 2)
-
Indeeri ambeksï uandontskuarhesïndi Jerusaléni (3 a 5)
-
Orhejtsïkutiicha ka apostoliichaksï tánguarhintasïndi (6 a 21)
-
Karakata enga axajka Grupu enga Orhejtsïkuajka iámindu kúnguarhikuechani (22 a 29)
-
No jámani jiókuarhini iurhiri (28 ka 29)
-
-
Karakata kánikua sési pʼikuastaantasïndi kúnguarhikuechani (30 a 35)
-
Pablu ka Bernabé táchanisïksï nirasïndi (36 a 41)
15 Jimajkani máru achamasïicha engaksï Judea uératini kétsemupka, ueenasptiksï arini ambe jorhendaani erachiichani:* “Engajtsï chá no pasïri pʼikujtsïkukuska tsʼiuerakuani* ísï eska na arhijka Moisésiiri Lei, chájtsï no uaaka pʼímutantskata uérani”.
2 Joperu Pablu ka Bernabé nóksï májkueni eratsesïreendi eska imeecha, ka engaksï na no sési arhirperapkia, pakatperasptiksï eska Pablu ka Bernabé ka máteru erachiicha, karhamapiringa apostoliichani jingoni ka Jerusaléni anapu orhejtsïkutiichani jingoni paraksï iiri ambe uandontskuarheni.*
3 Ísï jimbo, kúnguarhikuarhu anapuechaksï niraspti pámbeni sáni. Ka tátsekuaksï ima Fenisia ka Samariaisï nitamaspti. Ka erachiichaksï kánikua tsípisïreendi engaksï imeecha iámindu ambe aianguani japka na engaksï no judiuechajtu andarhientani japkia Tata Diosïni.
4 Ka engaksï na niárapkia Jerusaléni, kúnguarhikuarhu anapuecha, apostoliicha ka orhejtsïkutiichaksï kánikua sési erokaaspti, ka imeechaksï aianguaspti ambe enga xáni úpka Tata Diosï imeechani úrapariani.
5 Joperuksï máru kʼuiripuecha engaksï fariseuechani jingoni* jámeenga ka engaksï jakajkupkia tata Jesukristuni, jauarasptiksï ka uandasptiksï: “Kʼuanisïndi eskaksï tatakeechani pasïri pʼikujtsïkukuauaka tsʼiuerakuarhu ka juramukuani eskaksï iáminduecha uaaka ambe enga Moisésiiri Lei arhijka”.
6 Ísï jimbo, apostoliicha ka orhejtsïkutiichaksï tánguarhintaspti paraksï iiri ambe uandontskuarheni.
7 Ka engaksï na sési uandontskuarhepkia, Pedru jauaraspti ka arhiaspti: “Erachiicha, chájtsï míteska eska iáminduecheeri, Tata Diosïreni jíndeni orheta erakuska parani ambakiti aianhperakua aianguani no judiuechani ka imaksï niárani jakajkuni.
8 Ka Tata Diosï, ima enga míteka ambe engaksï jatsika kʼuiripuecha imeecheeri mintsitarhu, xarhatasti eska jaiapanheantaska* jimboka íntsaaska espiritu santu, ísï eskajtsïni juchantsïni na íntskuka.
9 Ima májkueni kaasti imeechani ísï eskajtsïni juchantsïni na kámaka ka pímbinhajkuantasti imeecheeri mintsiteechani jimbokaksï mintsikaska.
10 Jimajkani, ¿andijtsïsï tsʼéjkuni jaki Tata Diosïni engajtsï ísï uananchatarakua ma páraani jaka jakajkutiichani, ima uananchatarakua enga no nema úka páni, ni juchaari ióntki anapu parientiicha ka nijtu jucha?
11 Sánderu sési, jucha mintsikasïnga eskachi pʼímutanhantaska jimbokajtsïni Tata Diosï kánikua kóndentaska Jesúsini* jimbo ísï eskaksï imeechajtu na pʼímutanhantaka”.
12 Ka engaksï ísï kurhaapka, iáminduechaksï pínasku pakaraspti. Ka kurhajchasptiksï Bernabéni ka Pabluni engaksï aianguani japka na enga Tata Diosï imeechani úraapka paraksï milagruechani uaani ka uánikua máteru ambe* no judiuechani japarini.
13 Ka engaksï na kʼamarapkia uandani, Santiagu uandaspti: “Erachiicha, kurhaa je ambe engaksïni arhiaka.
14 Simeóntsïni iámindu ambe aiangustia na enga Tata Diosï ueenapka jaiapanheantani no judiuechani para iretani ma erakuni enga imeeri nombrini paaka.
15 Ka inde ambe terukuntasïndi imani ambe jingoni engaksï Tata Diosïiri uandakua páriicha* uandapka, ísï eska na karakata jaka:
16 ‘Ka enga na i ambe úkuarhiakia, kʼuanhatsentaaka ka jauatantaaka Dabidiiri kʼumanchikuani* enga uekorhetini jaka. Ménderuni úntaaka ambe enga xerentskata jaka,
17 ka imeecha engaksï útasï pakarani jauaka, uaatiksï iámu mintsita jingoni jirinhantani Tata Diosï Jeobani, iámindu imani kʼuiripuechani jingoni engaksï no judiueka ka ini kʼuiripuechani erakuaska paraksï juchiiti nombrini páni. Ísï uandasïndi Tata Diosï Jeoba, ima enga ini ambe úni jaka,
18 i ambe enga iónisï mítekuarhikia’.
19 Ísï jimbo, ji exesïnga eskachi no jatsiska para pʼínguani jarhani imeechani engaksï no judiueka ka engaksï andarhientani jakaia Tata Diosïni.
20 Sánderu sési, ju je karakuani eskaksï no jámaaka jiókuarhini ima ambe engaksï diosï úkateechani kéjtsïtakuajka, eskaksï no jámaaka ísku jándikua ambe niátani,* eskaksï no auantauaka imani animaliichani engaksï pirajchakukateuaka* ka ístu eskaksï no jámaaka jiókuarhini iurhiri.
21 Ka iónisïistia engaksï mándani ireta jimbo jaka kʼuiripuecha engaksï uandantajka ambe enga Moisési karaka, jimboka jima engaksï judiuecha tánguarhijka para Tata Diosïni kómarhini, mándani sábadu arhikuarhintasïnga ambe enga Moisési karaka”.
22 Ísï jimbo, apostoliicha ka orhejtsïkutiicha ka ístu iámu kúnguarhikuarhu anapuecha, erakuasptiksï máru achamasïichani paraksï Antiokía axaani Pablu ka Bernabé jingoni. Ka Judasïnksï axaspti, engaksï ístu arhienga Barsabási, ka ístu Silasini, íksï achamasïicha kʼéri ánchikuarhita ma jatsispti* kúnguarhikuarhu.
23 Ka arini ambeksï karaspti ka imeechani jingonksï axakuaspti:
“Jucha apostoliicha ka orhejtsïkutiicha engachi chaari erachiika, juchaksïni ini karakatani axachexaka, juchaari erachiicha engajtsï no judiueka ka engajtsï Antiokía, Siria ka Silisia anapueka: ¡Uandajperataksïni ma axachexaka!
24 Jucha kurhandiska eskaksï máru engaksï juchantsïni jingoni jámajka, ísku jatinksï pʼitsïkuarhiska nirani paraksïni mámaru ambe arhini ka támisïksïni jánhastani.
25 Ísï jimbo, iáminduechachi sési exeska erakuani máru achamasïichani paraksïni Bernabé ka Pablu jingoni axacheani, juchaari erachiicha engachi jucha xáni xénchaajka,
26 ka engaksï iámindu ambe jurajkuka juchaari Tata Jesukristueri nombri jimbo.
27 Jimboksïnisï axacheka Judasïni ka Silasini paraksïni ini ambe aianguni.
28 Jimboka espiritu santu ka juchajtuni sési exeska nóteruksïni xáni úkua ambe jatsikuchenia, i ambejku engajtsï kʼóru jatsika para úni:
29 eskajtsï no jámaaka jiókuarhini ima ambe engaksï diosï úkateechani kéjtsïtakuajka, nijtu iurhiri, eskajtsï no auantauaka imani animaliichani engaksï pirajchakukateuaka* ka eskajtsï no jámaaka ísku jándikua ambe niátani.* Ka engajtsï chá méntku no jiókuarhiaka ini ambe, kánikuaksïni sési nicheati. ¡Eskajtsï sési jámani jauaka!”.*
30 Ka engaksï na uandanukuarhipkia, íksï achamasïicha Antiokía kétsemaspti. Ka jimaksï tánguarhintaspti iámindu chúxapatiichani jingoni ka íntsaantasptiksï imani karakatani.
31 Ka engaksï na arhintapkia, kánikuaksï tsípispti engaksï xáni sési arhinhapka.
32 Ka jimboka Judasï ka Silasi ístuksï Tata Diosïiri uandakua páriispka, kánikuaksï sési pʼikuastaantaspti erachiichani jimbokaksï someni arhijtsïkuaspka ka ístuksï uinhaperaantaspti.
33 Ka iónksï sáni jima pakaraspti, ka tátsekuaksï erachiicha uandanuantaaspti ka imaksï Jerusaléni kʼuanhatsentaspti.
34 *
35 Joperu Pablu ka Bernabé, Antiokíaksï pakaraspti ka jimaksï uánikua erachiichani jingoni jámaspti jorhentpini ka uandantani ambakiti aianhperakuani Tata Diosï Jeobaeri uandakueri ambe.
36 Ka ísï máru jurhiatikua tátsekua, Pablu arhispti Bernabéni: “Juia ménderu pʼorhembiani* imani erachiichani engaksï imani ireteecha jimbo jaka nani engachi aianhpika Tata Diosï Jeobaeri uandakuani, parachi exeni náksï jámaxaki”.
37 Bernabé uékasïreendi eskaksï Juanuni pájtapiringa, imani engaksï Markusï arhienga.
38 Joperu Pablu no uékasïreendi pájtani jimboka ima Panfilia jurajkuaspka ka nóteru pámbetaasptia paraksï aianhpini Tata Diosïiri uandakuani.
39 Ka ini ambe jimbo, Pablu ka Bernabé no sésiksï arhirperaspti, jimboksïsï táchanisï nípti. Bernabé Markusïni pájtaspti ka barkuni ma jataspti para Chipre nirani.
40 Pablu Silasini pájtaspti ka erachiichaksï kómarhispti paraka Tata Diosï Jeoba kóndeantapiringa.
41 Ka tátsekua seguiriispti nirani ka Siria ka Silisiaisï nitamaspti para kúnguarhikuarhu anapuechani uinhaperantaani.
Notecha
^ O “ermanuechani”.
^ O “sirkunsidarikuarhiska”.
^ O “indeeri ambe uandontskuarheni engaksï arhirperapka”.
^ O “fariseuecheeri sektarhu”.
^ Griegu jimbo: “uandantasti eska jaiapanheantaska”.
^ Griegu jimbo: “Tata Jesúsini”.
^ O “kʼéri ambe”.
^ O “profeteecha”.
^ O “kʼumanchikua sïkuiriirini”.
^ Griegu jimbo pornéia. Exe je Glosario, ísku jándikua ambe.
^ O “engaksï ataajka ka nóksï tsïtakuani iurhiri”.
^ O “orhejtsïkutiispti”.
^ O “engaksï ataajka ka nóksï tsïtakuani iurhiri”.
^ Griegu jimbo pornéia. Exe je Glosario, ísku jándikua ambe.
^ O “¡Tátsekia je!”.
^ Exe je ambe enga arhijka nota enga Mateu 17:21 jimbo jaka.
^ O jamberi “Jatsiskachi para ménderu pʼorhembiani”.
