Úkuecha 16:1-40
-
Pablu erakusïndi Timoteuni (1 a 5)
-
Masedonia anapu achamasï ma jánhaskua ma exesïndi (6 a 10)
-
Lidia niárasïndi jakajkuni Filipusï (11 a 15)
-
Ónhasïndiksï Pabluni ka Silasini (16 a 24)
-
Kárselirhu anapu kuári ka imeeri kʼumanchikuarhu anapuechaksï itsï atakuarhisïndi (25 a 34)
-
Pablu kurhajkuarhisïndi eskaksï juramutiicha niuaka arhiani eskaksï tekaakuantauaka (35 a 40)
16 Jimajkani Derbe niáraspti ka tátsekua Listra. Jima, tumbi ma jarhaspti enga Timoteu arhinheenga, imeeri amamba judieespti ka jakajkutiispti, joperu taati jémba grieguespti.
2 Ka Listra ka Ikoniu anapu erachiichaksï* sési ambe uandasïreendi imeeri ambe.
3 Pablu uandaspti eska uékasïreenga Timoteuni pájtani, ísï jimbo, páspti paraksï pasïri pʼikujtsïkukuni tsʼiuerakuarhu jimbokaksï jimeesïsï judiuecha irekaspka ka iáminduechaksï mítespti eska taati jémba grieguespka.
4 Ka méni engaksï niáreenga ireta ma jimbo, aianguasïreendiksï erachiichani ambe engaksï pakatperapka apostoliicha ka orhejtsïkutiicha engaksï Jerusaléni japka parakaksï imeechajtu ísï úpiringa.
5 Ka ini ambe jimbo, ima kúnguarhikuarhu anapuechaksï sánderu jakajkusïreendia* ka pauani pauani sánderuksï uániixaptia.
6 Ístuksï Frijiaisï nitamaspti ka Galasiaisï, jimboka espiritu santu no jurajkuaspka paraksï Asiaisï aianhpini ambakiti aianhperakuani.
7 Ka engaksï Misia niárapkia, uékasïreendiksï Bitinia inchaakuni, joperu espiritu santu jimbo, Jesúsi no jurajkuaspti.
8 Ísï jimbo, Misiaisïksï nitamaspti ka Troasiksï kétsemaspti.
9 Ka chúrikua, Pablu arini ambe exespti jánhaskua ma jimbo: Masedonia anapu achamasï ma imeeri orhepatini jimbo jarhaspti ka arhixapti: “Ju sáni Masedonia ka jarhuatajtsïni”.
10 Enga Pablu na exepka ini ambe,* jánguarhintaspkachi jirejiresï nirani Masedonia, jimbokachi eratsespka eskajtsïni Tata Diosïsï ióarhini japka parachi jimajtu aianhpini ambakiti aianhperakuani.
11 Ísï jimbo, Troasichi jataspka barkuni ma ka seguiriispkachi Samotrasia nirani. Ísï pauandikua, Neápolisichi niraspka,
12 ka jima uératinchi Filipusï niraspka, Roma anapuecheeri ireta ma jimbo,* i jindeesti sánderu kʼéri ireta enga Masedoniaisï jaka. Ka imani ireta jimbochi pakaraspka máru jurhiatikua.
13 Ka sábadu jurhiatikua jimbo, uéakuspkachi iretarhu ka jimeesïsïchi niraspka nani enga itsï iorheni jaka, jimbokachi eratsespka eskaksï kʼuiripuecha kómarhisïreenga Tata Diosïni jimeesïsï. Jimajkanchi uaxakaspka ka ueenaspkachi uandontskuarheni imani uarhiitiichani jingoni engaksï jima tánguarhintatini japka.
14 Ka jima jarhaspti kurhaani uarhiiti ma enga Lidia arhinheenga, i uarhiiti takusï* moradu ambe atarantasïreendi, ka Tiatira anapuespti ka kómarhisïreendi Tata Diosïni. Ka Tata Diosï Jeoba jarhuataspti paraka ima jingontku kurhaapiringa ambe enga Pablu uandani japka ka niárani jakajkuni.
15 Tátsekua, enga Lidia ka imeeri kʼumanchikuarhu anapuechaksï na itsï atakuarhipkia,* imajtsïni arhispti: “Enga chá exejka eskani ji mintsikasïnga Tata Diosï Jeobani, ju je jucheeni pakarani”. Ka nóteruchi úspkia arhini eska nómbe, jimbochisï jima pakarapka.
16 Ma xanhari, jimachi niraxapka nani engaksï kʼuiripuecha kómarhienga Tata Diosïni, ka uátsïjtsïni ma kúmuspti enga jántspini jámeenga ka ini uátsïni demoniu ma incharhitixapti. Ka patroni jémbeechaksï kánikua sentabu andasïreendi jimbokaksï kʼuiripuecha indeni jingoni nirasïreenga xérkuarhini.*
17 Ka ima uátsï méntkujtsïni jámaxapti chúxapani ka uinhachasïreendi: “Íksï achamasïicha auandarhu anapu Tata Diosïni marhuakusïndi ka jámaxatiksïni aianguni nénajtsï uaa pʼímutantskata uérani”.
18 Ka uátsï ióni sáni ísï jámaspti. Tátsekua kuatajkusptia Pabluni jimbosï pʼirhipakuarhepti ka arhispti demoniuni: “Tata Jesukristueri nombri jimbo, juramuchixakakini eskari uérhintaaka uátsïni”. Ka demoniu jirejiresï uérhintaspti.
19 Joperu engaksï uátsïiri patroniicha exepka eskaksï nóteru úpiringia sentabu andani, jupikasptiksï Pabluni ka Silasini ka merkadurhu jamberiksï antsikupaaspti ka jimaksï peeraaspti engaksï juramutiicha japka.
20 Ka engaksï na iretarhu anapu juramutiichani* jingoni peeraapkia, uandasptiksï: “Íksï achamasïicha kánikua no sési úxati iretarhu. Judiuestiksï
21 ka imani pʼindekuechanksï jorhentpiaxati engachi jucha no jatsika para úni, jimbokachi Roma anapueska”.
22 Ka kʼuiripuechaksï ueenaspti kánikua no sési arhiani. Jimajkani iretarhu anapu juramutiichaksï karundurhikuaspti xukuparhakuani ka tátsekuaksï pirimu jimbo kʼuikirhitarkuarhiaspti.
23 Ka engaksï na no sési kaapkia ataani, ónhaasptiksï ka arhisptiksï kárselirhu anapu kuárini eska sési kuaani japiringa.
24 Enga kárselirhu anapu kuári ísï juramuminhapka, ima jima ónhaaspti nani engaksï no úpiringa uéntani ka kʼéri chkari ma* jatsindukuaspti paraksï no úni manakuarhini.
25 Ka terujkani chúrisï, Pablu ka Silasi kómarhixaptiksï Tata Diosïni ka pirekuxaptiksï ka máteru kʼuiripuecha engaksï ístu ónhakuarhetini japka, kurhajchaaxaptiksï.
26 Ka tátsekua ma repentku uinhamu jenchespti ka uinhamu xamataaspti kárselirhu anapu pítsekuechani. Ka iámindu puerteechaksï mítsatakuarhispti ka chkétakuarhisptiksï imeecheeri kadeneecha engaksï ónhakuarhetini japka.
27 Enga kárselirhu anapu kuári tsínharhipka ka exeni eskaksï iámu mítakuarhetixapka kárselirhu anapu puerteecha, pʼitajtarhaspti espadani para uándikukuarhini, jimboka eratsespka eskaksï iámu sïpakuarhispkia imeecha engaksï jima ónhakuarhetini japka.
28 Joperu Pablu mátirku uinhachaspti: “¡Asï jáma atakuarhini! ¡No nema sïpakuarhisti!”.
29 Ísï jimbo, kárselirhu anapu kuári uandaspti eskaksï erajkutapiringa, ka tátsekua uiriispti inchani jima enga Pablu ka Silasi japka, ka manaraxapti* xáni chéni jimbosï tinguikuatsepti imeechani japarini.
30 Tátsekua petaaspti ka arhiaspti: “Achamasïicha, ¿ambe uaa úni parani pʼímutanhantani?”.
31 Imeechaksï arhispti: “Jakajku Jesúsini* ka tʼu ka chiiti kʼumanchikuarhu anapuechaksï pʼímutanhantaati”.
32 Jimajkani imeechaksï aianguaspti Tata Diosï Jeobaeri uandakueri ambe imani ka iámindu imeeri kʼumanchikuarhu anapuechani.
33 Ka nájkiruka terujkani chúriipka, kárselirhu anapu kuári ima jandora paaspti ka jupamakuaspti nani engaksï atakata japka. Tátsekua ima ka iámindu imeeri kʼumanchikuarhu anapuechaksï itsï atanhaspti.
34 Tátsekua ima inchaataspti imeeri kʼumanchikuarhu ka mesarhu peerakuaspti tʼirekua ambe. Ka ima kánikua tsípispti iámindu imeeri kʼumanchikuarhu anapuechani jingoni jimboka iásï jakajkusïreengia Tata Diosïni.
35 Enga na erandepkia, iretarhu anapu juramutiichaksï axaaspti máru kuáriichani paraksï kárselirhu anapu kuárini arhini: “Jurajkua indeni achamasïichani”.
36 Jiájkani kárselirhu anapu kuári aianguspti Pabluni. Ka arhispti: “Iretarhu anapu juramutiichaksï axaasti máru acheetiichani parajtsïni arhini eskaksïni jurajkuakia tsimarhani. Ísï jimbo, uaakajtsïa níntani, níia je”.
37 Joperu Pablu arhiaspti: “Nójtsïni jamberi jusgariisti* ka kʼuiripu japarintsïni atasti nájkirukani jucha Roma anapueka ka ónhastijtsïni. ¿Ka iásïjtsïni sïpatikuarku uékasïnia petantani? ¡Nóchi níntaaka! Eskaksï juuaka ka eskajtsïni imeecha petantaaka”.
38 Ka kuáriichaksï aianguaspti iretarhu anapu juramutiichani ambe enga ima arhiapka ka kánikuaksï chérakuarhespti engaksï mítepka eskaksï ima achamasïicha Roma anapuespka.
39 Ísï jimbo, nirasptiksï arhiani eskaksï tekaakuantapiringa, ka engaksï na petaantapkia, arhiasptiksï eskaksï uéakuntapiringa iretarhu.
40 Joperu enga Pablu ka Silasi na uéntapkia kárselirhu, jirejiresïksï niraspti Lidieri kʼumanchikuarhu ka jimaksï exeaspti máru erachiichani ka uinhaperaantasptiksï. Tátsekua, seguiriisptiksï níntani.
Notecha
^ O “ermanuechaksï”.
^ O “mintsikasïreendia”.
^ O “ini jánhaskuani”.
^ I ireta máespti enga no Italia japka, nani engaksï jima anapu kʼuiripuecha májkueni ambe intsïnheenga eska Italia anapuecha.
^ O “pintura”.
^ Exe je Glosario, itsï atakuarhini; itsï atani.
^ O “pʼitarkuarhini”, “jimboka i uátsï uandasïreenga ambe enga úkuarhipiringa sánderu orhepani”.
^ O “majistraduechani”.
^ O “sepu”. Exe je Glosario, sepu.
^ O “tsirintsirirhikuarhixapti”.
^ Griegu jimbo: “Tata Jesúsini”.
^ O “Nójtsïni jamberi arhisti ambe engachi no sési úka”.
