Úkuecha 18:1-28
18 Ísï tátsekua, ima uéakuntaspti Atenasi ka Korintu niáraspti.
2 Jima judiuni ma exentaspti enga Ákila arhinheenga, ima Pontu anapuespti. No ióniispti enga Italia uératini junguapka témba jingoni enga Prisila arhinheenga, jimboka Klaudiu juramuspka eskaksï iámindu judiuecha uéakuntapiringa Roma. Ísï jimbo, Pablu imeechani jingoni niraspti
3 ka imeecheeri kʼumanchikuarhu pakaraspti para imeechani jingoni ánchikuarhini, jimboka imajtu májkueni ambe ánchikuarhisïreenga. Imeechajtuksï kʼumanchikuechani sïkuiriiri uaasïreendi.
4 Mándani sábadu, ima arhijtsïkuasïreendi* kʼuiripuechani jima engaksï judiuecha tánguarhijka para Tata Diosïni kómarhini ka jakajkutaraasïreendi judiuechani ka grieguechani.
5 Engaksï Silasi ka Timoteu Masedonia kétsemapka, Pablu incharhetakuspti aianhpini Tata Diosïiri uandakuani. Aianguasïreendi judiuechani ka exeraasïreendi eska Jesúsi jindeeska Kristu.
6 Joperu imeechaksï no uékasïreendi kurhajchani Pabluni ka no sésiksï arhisïreendi, jimbosï ima uarauaratakuarhentapti ka arhiaspti: “Chaari jimbo niuati engajtsï niáraska uarhini.* Ji no ma ambe míteska. Iásï uératini, imeechani niuaka aianguani engaksï no judiueka”.
7 Ísï jimbo, ima kéndikuspti jima uératini* ka Tisiu Justueri kʼumanchikuarhu inchaakuspti, achamasï ma enga Tata Diosïni kómarhienga ka enga jima máekandu irekapka nani engaksï judiuecha tánguarhijka para Tata Diosïni kómarhini.
8 Ka achamasï ma enga Krispu arhinheenga, enga jima orhejtsïkuenga nani engaksï judiuecha tánguarhijka para Tata Diosïni kómarhini, niáraspti jakajkuni Tatani ka ístuksï iámindu imeeri kʼumanchikuarhu anapuecha jakajkuspti. Ka uánikua Korintu anapuecha kurhaasptiksï ambakiti aianhperakuani ka ueenasptiksï jakajkuni ka itsï atakuarhisptiksï.*
9 Ka ima chúri, Tata arhispti Pabluni jánhaskua ma jimbo: “Asï jáma chéni. Seguirii ini ambe uandantani ka asï pínasku pakara
10 jimbokani ji tʼungini jingoni jarhaska ka nókini nema no sési úchiati. Ini ireta jimbo, uánikua kʼuiripuechaksï jarhasti* engajtsïni niáraaka jakajkuni”.
11 Ísï jimbo, jima pakaraspti ma uéxurhini ka terujkani para Tata Diosïiri uandakueri ambe jorhendaani.
12 Enga Galióni Akaia juramuni japka,* judiuechaksï tánguarhintaspti paraksï kúnguarhikuntani Pabluni ka juesiicha jingonksï páspti.
13 Uandasïreendiksï: “I achamasï támisï jánhastaaxati kʼuiripuechani paraksï ménderueni kómarhini Tata Diosïni ka paraksï no úni eska na uandajka ixú anapu lei”.
14 Enga Pablu uandani jámeengia, Galióni jimajku arhiaspti judiuechani: “Enga i achamasï no káni sési jámani japiringa, o enga no sési ambe niátani japiringa, jíksïni jingontku kurhajchapiringa.
15 Joperu engajtsï uandakuechani jimbo arhirperani jaka, kʼuiripuechani jimbo o chaari juramukuani jimbo, chájtsï míteskia ambe úni. Jíksïni no uékasïnga inchaakucheni jarhani”.
16 Jiájkani iáminduechani petaatantaaspti jima uératini engaksï juesiicha jarhajka.
17 Ísï jimbo, iáminduechaksï niraspti jupikani Sóstenesini, ima orhejtsïkusïreendi jima engaksï judiuecha tánguarhijka para Tata Diosïni kómarhini ka ueenasptiksï jamukuteni atani jima engaksï juesiicha jarhajka. Joperu Galióni méntku no uékaspti inchaakukuani.
18 Pablu útasteru jima pakaraspti máru jurhiatikua. Tátsekua uandanuantaspti erachiichani* ka barkuni ma jataspti para Siria nirani Prisila ka Ákilani jingoni. Ka kuinakuarhispti enga Senkreasi japka jimboka aiakuspka ambe ma Tata Diosïni.
19 Enga na niárapkia Éfesu, jima jurajkuaspti. Joperu ima jima inchaspti nani engaksï judiuecha tánguarhijka para Tata Diosïni kómarhini ka ueenaspti jánhastaani judiuechani paraksï kurhanguni ambe engaksï Karakateecha arhijka.
20 Ka nájkirukaksï arhini japka eska útasï jima pakarapiringa, ima no uékaspti,
21 ka uandanuantaspti ka arhiaspti: “Engareni Tata Diosï Jeoba íntskuska sésikua, ménderuksïni juuaka exeni”. Ka barku ma jataspti Éfesu
22 ka Sesarea kétsemaspti. Jimajkani karhamaspti* para kúnguarhikuarhu anapuechani sáni exeani. Tátsekua Antiokía kétsemaspti.
23 Ísï tátsekua enga na ióni sáni pakarapkia jima, níntaspti ka Galasia ka Frijiaisï, iápurisï jámaspti para chúxapatiichani uinhaperaantani.
24 Ka judiu ma enga Apolosi arhinheenga enga Alejandría anapuepka, Éfesu niáraspti. Ima achamasï kánikua sési uandasïreendi ka sési mítespti ambe engaksï arhijka Karakateecha.
25 Ka inde achamasï sési jorhendanhaspti Tata Diosï Jeobaeri xanharueri ambe, ka jimboka kánikua espiritu santu intsïnhaspka, iámindu ambe sési uandantasïreendi ka jorhentpisïreendi Jesúsiiri ambe, joperu ima imani ambejkusï mítepti ambe enga Juanu uandanteenga, eskaksï kʼuiripuecha jatsispka para itsï atakuarhini.
26 Ima no sáni chéparini ueenaspti aianhpini jima engaksï judiuecha tánguarhijka para Tata Diosïni kómarhini, ka engaksï Prisila ka Ákila kurhajchapka, támuksï páspti ka sánderuksï sési aianguspti Tata Diosïiri xanharueri ambe.
27 Ístu, jimboka Apolosi uékasïreenga Akaia nirani, Éfesu anapu erachiichaksï karakuaspti Akaia anapu erachiichani paraksï kurhakuani eskaksï sési erokapiringa Apolosini. Enga na niárapkia jima, kánikua jarhuataaspti imeechani enga Tata Diosï kánikua kóndeantapka paraksï jakajkuni,
28 jimboka kʼuiripuechani japarini ka no sáni chéparini, exeraaspti judiuechani eskaksï támisï jarhaspka, ka Karakateecha jingoni exeraasïreendi eska Jesúsi jindeeska Kristu.
Notecha
^ O “jánhastaasïreendi”.
^ O “Chaari jimbo niuati chaari iurhiri”.
^ O “jima engaksï judiuecha tánguarhijka para Tata Diosïni kómarhini”.
^ Exe je Glosario, itsï atakuarhini; itsï atani.
^ Griegu jimbo: “uánikua kʼuiripuechani jatsiaska”.
^ O “jindeepka prokonsuli”. Exe je Glosario, prokonsuli.
^ O “ermanuechani”.
^ Péringa Jerusaléni karhamapka.
