Úkuecha 19:1-41
19 Enga Apolosi Korintu japka, Pablu juátarhisï teruakuspti ka Éfesu kétsemaspti. Jima exeantaspti máru chúxapatiichani
2 ka arhiaspti: “¿Intsïnhaspijtsï espiritu santu engajtsï jakajkupka?”. Imeechaksï arhispti: “Nómbe, jucha no méni kurhandixapka eska jarhaska espiritu santu”.
3 Ima ménderu arhiaspti: “Jiájkani, ¿nénajtsï itsï atakuarhiski?”.* Imeechaksï arhispti: “Ísïchi itsï atakuarhiska eska Juanu na jorhentpienga”.
4 Ka Pablu arhiaspti: “Juanu itsï ataaspti kʼuiripuechani paraksï xarhatani eskaksï móantaspkia ka arhiasïreendi iretarhu anapuechani eskaksï jakajkupiringa imani enga ísï tátsekua jupiringa eska ima, ka Jesúsinisï arhikuekani japti”.
5 Engaksï na ini ambe kurhaapkia, itsï atakuarhisptiksï Jesúsiiri* nombri jimbo.
6 Enga Pablu pʼájtsïkuapka, espiritu santu andarhieraaspti ka úndasptiksï mámaru jásï idioma uandani ka uandantani ambe enga Tata Diosï uandeenga.
7 Ka ma 12 achamasïisptiksï.
8 Ka ima inchaspti jima engaksï judiuecha tánguarhijka para Tata Diosïni kómarhini ka no sáni chéparini tanimu kutsï jámaspti arhijtsïkuani kʼuiripuechani Tata Diosïiri Reinueri ambe ka jánhastaasïreendi paraksï imeecha jakajkuni.
9 Joperuksï máru méntku no ma ambe uékaspti kurhandini nijtuksï jakajkuni, ka no sési ambeksï uandasïreendi Tateeri Xanharueri ambe kʼuiripuni japarini. Ísï jimbo, ima kéndikukuaspti ka támu paaspti chúxapatiichani. Ka pauani pauani nirasïreendi arhijtsïkpini jima engaksï uánikua kʼuiripuecha tánguarhienga Tiranueri eskuela jimbo.
10 Ísï úspti tsimani uéxurhini, ísï jimbo, iáminduecha engaksï Asiaisï irekapka, judiuecha ka grieguecha, kurhaasptiksï Tateeri uandakuani.
11 Ka Tata Diosï seguiriixapti kʼérati milagruechani uaani Pabluni úraparini.
12 Ka Pablueri xukuparhakua ka tánharhikua jamberiksï pákuasïreendi pʼamenchatiichani ka imaksï ambakentasïreendi ka ístuksï no sési jásï espirituecha uérhiantasïreendi.
13 Joperu máru judiuecha engaksï iápurisï jámani japka demoniuechani petarpiantani, ístuksï jámaspti petarpiantani no sési jásï espirituechani Jesúsiiri* nombri jimbo. Uandasïreendiksï: “Jesúsiiri nombri jimbo, imeeri nombri jimbo enga Pablu uandantajka, jíksïni juramuchixaka eskajtsï uérhintaaka”.
14 Ini ambeksï úsïreendi siete kʼuiripuecha engaksï Eseba uájpeepka, kʼéri saserdoti ma enga judiuepka.
15 Joperu no sési jásï espiritu ma arhiaspti: “Ji míteska Jesúsini ka ístuni míteska Pabluni. Joperujtsï, ¿chá neeski?”.
16 Jimajkani, ima achamasï enga no sési jásï espiritu incharhitini japka, uiriispti andanguani iáminduechani ka iáminduechani no sési kaantaspti. Ka imaksï uiriispti uéntani kʼumanchikuarhu, xásku ka atakata.
17 Ka iámindu judiuecha ka grieguecha engaksï Éfesu irekani japka, niárasptiksï míteni ambe enga úkuarhipka. Ísï jimbo, iáminduechaksï kánikua chérakuarhespti ka Jesúsiiri* nombri sánderu kʼéri ambe exenhaxaptia.
18 Ka iáminduecha engaksï niárapkia jakajkuni, nirasïreendiksï uandakuarhintani ambe engaksï xáni ueenga.
19 Ka imeecha jamberi engaksï sïkuamikua ambe kámeenga, tánaantasptiksï imeecheeri libruechani ka iáminduechani japarinksï kurhiraaspti. Kuenta pʼikuntasptiksï ka ima libruechaksï 50 mili moneda plateeri jukaparhaspti.
20 Ísï jimbo, Tata Diosï Jeobaeri uandakua sánderu etsakurhixaptia ka sánhani arhixapti sánderu uinhapikua jatsini.
21 Tátsekua, Pablu uandaspti eska Jerusaléni nipiringa enga na Masedonia ka Akaiaisï nitamapiringia. Ístu uandaspti: “Jerusaléni uératini, Roma niuaka”.
22 Ísï jimbo, axaaspti Masedonia tsimani kʼuiripuechani engaksï jarhuateenga: Timoteuni ka Erastuni. Joperu ima ióni sáni pakaraspti Asiaisï.
23 Imani jurhiatikuechani jimbo, ueenaspti kánikua no sési jánhaskuarhini Tateeri Xanharu ambe jimbo.
24 Acheeti ma jarhaspti enga Demetriu arhinheenga, i acheeti jatakuechani uaasïreendi plateeri para Ártemisi,* kánikua sentabu andasïreendi imeechani jingoni engaksï májkueni ambe ánchikuarhienga.
25 Jiájkani tánaantaspti iichani ka imeechani engaksï májkueni ambe ánchikuarhienga ka arhiaspti: “Tateecha, chájtsï sési mítetixaka eskachi ini ánchikuarhita jimbosï xáni sentabu andajka.
26 Ka iásïjtsï chá exekuarhixaka ka kurhaani na enga inde Pablu uánikua kʼuiripuechani jakajkutaraani jaka ka támisï jánhastaani, jimboka arhiaxaka eskaksï no diosïiska imeecha engaksï jájki jimbo úkateeka ka no Éfesujkusï ísï úni jati, sino ístu iámu Asiaisï.
27 Uandanhiaxaka eskaksï kʼuiripuecha ueenaka no sési ambe uandani juchaari ánchikuarhiteeri ambe ka ístuksï úndani ísku exeni kʼéri diosa Ártemisiiri templuni. Ka nájkirukaksï iámu Asia anapuecha ka interu parhakpini anapuecha kómarhijka, jamberiksï nóteru kʼéri ambe arhiatia”.
28 Engaksï achamasïicha ini ambe kurhaapka, kánikuaksï ikiaspti ka ueenasptiksï uinhachani: “¡Kʼéri ambeesti Ártemisi, Éfesu anapu diosa!”.
29 Ísï jimbo, iretarhu anapu kʼuiripuechaksï ueenaspti no sési jámani ka iáminduechaksï uiriispti májku kʼéri inchani jima engaksï kʼuiripuecha nirajka exejpeni* ka antsikupasptiksï Gaiuni ka Aristarkuni, íksï tsimani achamasïicha Masedonia anapuespti ka Pablunksï jámasïreendi pámbeni.
30 Ka Pablu inchakuekaxapti jima engaksï kʼuiripuecha japka, joperuksï chúxapatiicha pʼínguspti.
31 Ka ima kʼuiripuecha jamberi engaksï kʼuínchikua ka chʼanakua ambe únteenga ka engaksï sési uandajpeenga, uandakua axakusptiksï ka arhisptiksï eska méntku no jámapiringa inchani jima engaksï kʼuiripuecha nirajka exejpeni.*
32 Ka kʼuiripuechaksï mámaru ambe uinhachaxapti jimbokaksï no jánhaskasïreenga ambesï úkuarhini japi ka uánikuechaksï no mítespti andiksïsï jima japi tánguarhintatini.
33 Ka máru judiuechaksï pʼákchakuspti Alejandruni ka orhepanksï peeraspti ka máruksï arhispti eska ima uandapiringa. Jimbosï Alejandru níjkurhakuapti kʼuiripuechani jimboka uékasïreenga arhiani ambe enga úkuarhini japka.
34 Enga kʼuiripu exepka eska ima judiuespka, iáminduechaksï úndaspti uinhachani. Ka ísïksï uinhachaspti tsimani ora: “¡Kʼéri ambeesti Ártemisi, Éfesu anapu diosa!”.
35 Enga iretarhu anapu juramuti na ísku jatsipkia kʼuiripuni, uandaspti: “Éfesu anapu achamasïicha, ¿andi né no míteski eska ireta Éfesu kuáni jarhasïnga kʼéri diosa Ártemisiiri templuni, inde enga auandarhu uératini juka?
36 No nema uandaxati eska i ambe no ísïiska, ísï jimbo, ísku ja je ka asï jáma je ísku jatini úni ambe ma.
37 Íksï achamasïicha engajtsï chá ixú juaaka, nóksï jámasïndi templuecharhu sïpani ka ístuksï no no sési ambe uandasti juchaari diosa Ártemisiiri ambe.
38 Jimajkani, enga Demetriu ka imeecha engaksï plata jingoni ánchikuarhijka arhirperata ma jatsika, eskaksï juesiichani jingoni niuaka jiáni engaksï tánguarhintajka ka ístu jimboksïsï jati juramutiicha* paraksï imeechani nirani aianguani engaksï arhirperaka nemani jingoni.
39 Joperu engajtsï chá máteru ambe uéjka, i ambe jiáni exekuarhiati engajtsïni Roma anapu juramuti pʼitajkuarhiaka.
40 Jimboka engachi seguiriiska ini ambe úni, juchachisï no sési uéranchaaka, jimbokachi jucha arhinhaaka engaksï kʼuiripuecha ísï no kurhajchaani jaka juramutiichani ka jimbokachi no uaaka arhiani andiksïsï kʼuiripuecha no sési jámani jaki”.
41 Ka enga na ísï arhiapkia, axaantaspti kʼuiripuechani.
Notecha
^ Exe je Glosario, itsï atakuarhini; itsï atani.
^ Griegu jimbo: “Tata Jesúsiiri”.
^ Griegu jimbo: “Tata Jesúsiiri”.
^ Griegu jimbo: “Tata Jesúsiiri”.
^ O “Diana”.
^ O “teatrurhu”.
^ O “teatrurhu”.
^ O “prokonsuliicha”. Exe je Glosario, prokonsuli.
