Úkuecha 22:1-30
22 “Erachiicha* ka taatiicha, kurhaa je, jurajkuksïni aianguni ambemindusï úkuarhi”.
2 Engaksï kurhajchapka eska ebreu jimbo uandaxapka, sánderuksï pínasku pakaraspti. Jimajkani ima seguiriispti arhiani:
3 “Ji judiueska. Ka Tarsu andajpenuska enga Silisia jaka, joperureni jíndeni Gamalieli arhirasti* ini iretani jimbo. Ka jorhendanhaska parani ísïmindu úni eska juchaari ióntki anapu parientiicheeri Lei na uandajka ka jíjtuni kánikua janhanharhisïnga Tata Diosïni ísï eskajtsï chá na úni jaka iásï.
4 Kánikua no sési kaasïreenga imeechani engaksï Tateeri Xanharu jimbo jámeenga ka jamberini uándikutarkuarhiaska, acheetiichani ka uarhiitiichani jamberi jupikaaska ka ónhatarkuarhiaska,
5 ka sánderu kʼéri saserdoti ka iámindu orhejtsïkutiichaksï uaati uandani eska ísïiska, imajtsïni íntsaantaspti sïrandeechani parani ji Damasku nirani ka úni jupikaani imani erachiichani engaksï jini japka ka Jerusaléni juaani paraksï kastigarinhani.
6 ”Joperu teruxutinisï engani niárani japkia Damasku, ma repentkureni tsónhastaspti auandarhu anapu tʼíntskua ma.
7 Jimajkani kuarhatsespka ka kurhaaspka engareni nema arhipka: ‘Saulu, Saulu, ¿andirenisï xáni no sési kámani jaki?’.
8 Ka ji arhispka: ‘Tata, ¿neeskiri?’. Ka imarini arhispti: ‘Jesúsiiska, Nasareti anapu, ima engari tʼu xáni no sési kámani jaka’.
9 Ka ima achamasïicha engaksï jíndeni jingoni jámani japka, exesptiksï tʼíntskuani, joperuksï no kurhangusïreendi ambe engareni ima arhini japka.
10 Jimajkani arhispka: ‘Tata, ¿ambe uaa?’. Ka Tatarini arhispti: ‘Jauara, ní Damasku ka jimaksïni arhiati ambe engari jatsika para úni’.
11 Ima tʼíntskuarini kánikua tsónhastaspti ka nóteruni úspkia exeni, jimbojtsïnisï jupijtatini pápti ima achamasïicha engaksï jíndeni jingoni jámani japka ka ísï niáraspka Damasku.
12 ”Tátsekuarini jurhasti exeni Ananíasi, achamasï ma enga kánikua janhanharhienga Tata Diosïni ka enga ísï ueenga eska Lei na arhijka. Iámindu judiuecha engaksï jima irekapka, sési ambeksï uandasïreendi imeeri ambe,
13 imarini jurhaspti andarhierani ka arhisptirini: ‘¡Erachi Saulu, éskantia!’. Ka ji sóntkuni éskantaspka ka eratespka imani.
14 Imarini arhispti: ‘Juchaari ióntki anapu parientiicheeri Tata Diosï, tʼungini erakusti parari míteni ambe enga ima uéjka ka parakari exeaka imani enga sési jámajka ka kurhaani ambe enga ima uandajka,
15 jimbokakeni ima erakuska parari uandantani ambe engari xáni exeka ka kurhaani imeeri ambe.
16 Jimajkani, ¿amberi erokuarhixaki? Ní, itsï atakuarhi* ka mintsika Jesúsiiri nombrini parakeni Tata Diosï puácheantani chiiti pekaduechani’.
17 ”Ka engani Jerusaléni kʼuanhatsentapka, ji kómarhixapka Tata Diosïni templurhu ka ma repentkuni úndaspka jánhaskua ma exeni
18 ka exespka imani. Arhisptirini: ‘Uéakunta kókuani Jerusaléni uératini, jimbokaksï ixú kʼuiripuecha no jakajkuaka ambe engari tʼu aianguauaka juchiiti ambe’.
19 Ka ji arhispka: ‘Tata, tʼuri sési mítetixaka eskani ji inchapuska jima engaksï judiuecha tánguarhijka para Tata Diosïni kómarhini, eskani ónhatarkuarhiaska ka eskani ataaska imeechani engaksïni tʼungini jakajkuenga.
20 Ka jiáni engaksï Estebanini uándikuni japka, ima enga chiiti ambe uandanteenga,* ji jima jarhaspka ka sési exespka engaksï ísï atani japka, ka ji kaaxapka takusïichani imeecheeri engaksï Estebanini uándikuni japka’.
21 Ka nájkirukani ji ísï jámapka, imarini arhispti: ‘Ní kókuani, jimbokakeni ji iauanisï axaaka no judiuechani jingoni’”.
22 Ka jiáni jamberi, kʼuiripuechaksï ísku jarhaspti kurhajchani. Joperuksï tátsekua ueenaspti uinhachani: “¡Mátirku uándiku ini achamasïni! ¡Ásteru jurajkia para útasï jámani jarhani!”.
23 Jimbokaksï kʼuiripuecha uinhachaxapka, ka takusï ambeksï kʼuanikuxapti ka tʼupuri ambe,
24 sánderu kʼéri orhejtsïkuti sondaduecheeri juramuspti eskaksï Pabluni jima incharapiringa nani engaksï sondaduecha jarhajka. Ka ístu uandaspti eskaksï kʼuikirhipiringa engaksï kurhamarhini japiringa ambe ma, jimboka uékasïreenga sési míteni andisï kʼuiripu xáni no sési ambe uandani japi imeeri ambe.
25 Joperu engaksï jótapka paraksï kʼuikirhini, Pablu arhispti sondaduecheeri orhejtsïkutini: “¿Chaari leiksïni sésikua íntskusïni parajtsï kʼuikirhini Roma anapuni ma enga nótki jusgarinhani jaka?”.*
26 Enga ísï kurhaapka, ima* seguiriispti nirani sánderu kʼéri orhejtsïkuti sondaduecheeri jingoni ka arhispti: “¿Ka iásïri néna jámaia? Jimboka i achamasï Roma anapueska”.
27 Ísï jimbo, sánderu kʼéri orhejtsïkuti sondaduecheeri, niraspti Pabluni exeni ka kurhamarhispti: “¿Andi tʼu Roma anapueski?”. Ka ima arhispti: “Jo”.
28 Ka sánderu kʼéri orhejtsïkuti sondaduecheeri arhispti: “Ji kánikua sentabu maiampiska parani úni Roma anapueni”. Joperu Pablu arhispti: “Ka ji Roma anapueska desde engani andajpenuka”.
29 Ka ima achamasïicha engaksï kurhamarhipiringa ambe ma ka engaksï kʼuikirhipiringa, jirejiresïksï kéndikukuspti. Ka sánderu kʼéri orhejtsïkuti sondaduecheeri kánikua chérakuarhespti enga mítepka eska Pablu Roma anapuespka jimboka ima jupirkuarhispka.
30 Ka jimboka uékasïreenga sési míteni andiksïsï judiuecha uandani japi eska no sési ambe niátaspka, ísï pauandikua jurajkuspti ka juramuspti eskaksï kʼérati saserdotiicha ka Kʼérati Juesiicha* tánguarhintapiringa. Jimajkani arhispti Pabluni eska kétsepiringa ka imeechani jingoni páspti.
Notecha
^ O “Ermanuecha”.
^ O “jorhendasti”.
^ Exe je Glosario, itsï atakuarhini; itsï atani.
^ Griegu jimbo: “chiiti testiguni”.
^ O “enga nótki arhinhani jaka ambesï no sési ú”.
^ Ixú sondaduecheeri orhejtsïkutinisï arhikuekani jati.
^ O “Sanedríni”.
