Úkuecha 23:1-35
23 Pablu erateaspti Kʼérati Juesiichani* ka uandaspti: “Erachiicha,* ji sési mítetixaka eskani iásï jamberi no ma ambe no sési úxaka ka eskani sési jámaxaka Tata Diosïni japarini”.
2 Enga sánderu kʼéri saserdoti Ananíasi kurhaapka ini ambe, arhiaspti imeechani engaksï Pablueri máekandu japka eskaksï jimintku pasarhimukupiringa ma.
3 Jimajkani Pablu arhispti: “Tʼu ísku apari, tʼunginisï ataati Tata Diosï. Tʼuri jimini uaxakatixaka parareni jusgarini ísï eska na uandajka Lei, jiájkani ¿andiresï uanda eskajtsïni ataaka ka jini Lei uandani eska no sési jarhaska ísï úni?”.
4 Ka imeecha engaksï jima máekandu japka, arhisptiksï: “¿Andiresï xáni no sési arhini jaki Tata Diosïiri sánderu kʼéri saserdotini?”.
5 Pablu arhiaspti: “Erachiicha, ji no mítespka eska inde jindeeska sánderu kʼéri saserdoti. Jimboka karakata jarhaska: ‘Asï jáma no sési arhiani chiiti iretarhu anapu orhejtsïkutiichani’”.
6 Ka jimboka Pablu mítespka eskaksï máru saduseuespka ka eskaksï máteru fariseuespka, uinhachaspti Kʼérati Juesiichani* japarini: “Erachiicha, ji fariseueska, fariseuecheeri uájpeeska. Iásï jusgarinhaxaka jimbokani jakajkusïnga eskaksï uarhiriicha tsíntaaka”.
7 Ka jimboka ísï uandaspka, fariseuechaksï ueenaspti saduseuechani jingoni arhirperani ka imeecha engaksï jima tánguarhintatini japka nóteruksï úsptia kurhangutsperani,
8 jimbokaksï saduseuecha uandasïnga eskaksï uarhiriicha no úsïnga tsíntani ka ístu eskaksï no jarhaska ánjeliicha nijtu espirituecha ka fariseuechaksï kʼóru iámindu ini ambe jakajkusïndi.*
9 Ka iáminduechaksï ueenaspti mámaru ambe uinhachani. Jimajkani jauarasptiksï máru karariicha engaksï fariseuechani jingoni jámeenga ka ueenasptiksï no sési uinhachani. Uandasïreendiksï: “Jucha no ma ambe exekuntaxaka ini achamasïni. ¿Ka enga espiritu ma uandajpakia o ánjeli ma?”.
10 Enga sánderu kʼéri orhejtsïkuti sondaduecheeri exepka eskaksï sánderu no sési arhirperaxapkia, uandanhiaspti eskaksï no sési kántapiringa Pabluni paraksï uándikuni. Ísï jimbo, arhiaspti sondaduechani eskaksï kétsepiringa paraksï petantani jima uératini ka eskaksï jima pápiringa nani engaksï sondaduecha jarhajka.
11 Joperu ima chúri, Tata jimajku xarhakuspti Pabluni ka arhispti: “¡Asï ché! Jimboka ísï eskari na iámindu ambe sési uandantaka juchiiti ambe Jerusaléni, májkuendi uandantaaka Roma”.
12 Enga na erandepkia, judiuechaksï uandontskuarhespti nénaksï jámapirini paraksï Pabluni uándikuni ka jurariisptiksï eskaksï no ma ambe apiringa nijtu itsïmani astakaksï na uándikupiringa Pabluni.
13 Jukari 40 achamasïichaksï jurariispti eskaksï uándikupiringa.
14 Ísï jimbo, nirasptiksï exeani kʼérati saserdotiichani ka orhejtsïkutiichani ka arhiasptiksï: “Jucha jurariiskia eskachi no ma ambe auaka astakachi na uándikuaka Pabluni.
15 Ísï jimbo, chá ka ístu Kʼérati Juesiicha,* uandontskuarhi je sánderu kʼéri orhejtsïkuti sondaduecheeri jingoni para ima chánksïni jingoni páni ka ísï ú je enajkijtsï uéjki míteni ambemindusï ú ima. Ka jucha tʼuini xanharu jimbo jauakia parachi uándikuni ante de ima niárani”.
16 Joperu Pablueri pirembeeri uájpa mítespti eskaksï jakutsekupiringa Pabluni, ísï jimbo niraspti jima engaksï sondaduecha jarhajka ka aianguspti Pabluni.
17 Jimajkani Pablu uandajpaspti sondaduecheeri orhejtsïkutini ma ka arhispti: “Pá ini tumbini sánderu kʼéri orhejtsïkuti sondaduecheeri jingoni paraka aianguaka ambe ma”.
18 Ísï jimbo, ima páspti sánderu kʼéri orhejtsïkuti sondaduecheeri jingoni ka arhispti: “Pablu, ima enga ónhakuarhetini jaka, uandajpastirini ka arhistirini eskakeni juáchepiringa ini tumbini, jimbokakeninha uékasïnga aianguni ambe ma”.
19 Sánderu kʼéri orhejtsïkuti sondaduecheeri jupijkuspti tumbini, támu páspti ka arhispti: “¿Amberinisï aiangua?”.
20 Ima arhispti: “Judiuechaksï pakatperastia eskaksïni arhiaka tʼungini parari pauani Kʼérati Juesiichani* jingoni páni Pabluni ka ísïksï jámaati enajkiksï uékapirini míteni ambemindusï ú ima.
21 Joperu asï jáma jakajkukuani, jimbokaksï jukari 40 achamasïicha listu jarhaskia paraksï jakutsekuni. Ka imeechaksï jurariisti no ma ambe arhani nijtu itsïmani astakaksï na uándikuaka. Ka indentkuksïsï erokuarhini jati eskari tʼu uandaaka eska jo”.
22 Sánderu kʼéri orhejtsïkuti sondaduecheeri axantaspti tumbini, joperu arhispti: “Asï nemani jáma aianguni eskari jíndeni jingoni uandontskuarheska”.
23 Tátsekua uandajpaaspti tsimani sondaduecheeri orhejtsïkutiichani ka arhiaspti: “Jirinhaa je 200 sondaduechani paraksï Sesarea nirani nuebisï enga na chúriakia.* Ístu paa je 70 kabaiu jatariichani ka 200 sondaduechani engaksï lanseechani paajka.
24 Ka ístu juaa je máru kabaiuechani parajtsï Pabluni páni, paraka ima sési niáraaka juramuti Féliksini jingoni”.
25 Jimajkani karakata ma karaspti enga ísï arhienga:
26 “Ji, Klaudiu Lisiasi, karachixakakeni tʼungini tata juramuti Féliksi: ¡Uandajperataksïni ma axachexaka!
27 Judiuechaksï jupikaspti ini achamasïni ka uándikuxamendiksïa. Joperu engani ji mítepka eska Roma anapueska, jirejiresï niraspka juchiiti sondaduechani jingoni ka euajkuantaspka.
28 Ji uékasïreenga míteni andiksïsï kʼamanharhitantani japi, jimbosïni Kʼérati Juesiichani* jingoni pápka.
29 Ka jima mítespka eskaksï indeecheeri Lei jimbosï kʼamanharhitantani japka, joperu no ma ambe ústi enga jimbo jatsika para uándikunhani o ónhanhani.
30 Ka iásï aiangunhaskia eskaksï uékaxaka uándikuni, jimbokenisï sóntku axacheka, ka ístuni arhiaskia imeechani engaksï uandani jaka eska no sési ambe úska eskaksïni tʼungini niuaka aianguni ambesï no sési ú”.
31 Ka ima sondaduechaksï ísï úspti ka nirasptiksï pʼirani Pabluni ka chúrikuaksï páspti Antípatrisi.
32 Ka ísï pauandikua, jurajkuasptiksï kabaiu jatariichani paraksï imeecha páni ka máteruechaksï kʼuanhatsentaspti jima engaksï sondaduecha jarhajka.
33 Engaksï kabaiu jatariicha niárapka Sesarea, nirasptiksï juramuti jingoni ka íntskuntasptiksï karakatani ka imani jingonksï jurajkuspti Pabluni.
34 Ísï jimbo, ima arhintaspti karakatani ka kurhanguarhispti nani anapuespi* Pablu ka jiáni mítespti eska ima Silisia anapuespka.
35 Ka ima arhispti: “Engaksï na janoakia imeecha engaksï uandani jaka eskari no sési ambe úska, jiánkeni jusgariuakia”. Tátsekua juramuspti eskaksï Erodesiiri kʼéri kʼumanchikuarhu pápiringa ka eskaksï jima kuáni japiringa.
Notecha
^ O “Pablu eraaspti Sanedrínini”.
^ O “Ermanuecha”.
^ O “Sanedrínini”.
^ O “uandantasïndi”.
^ O “Sanedríni”.
^ O “Sanedríni”.
^ Griegu jimbo: “ora para tanimu úni jámani”.
^ O “Sanedríni”.
^ O “náki probinsiarhu anapuespi”.
