Úkuecha 25:1-27
25 Ka ísï tanimu jurhiatikua tátsekua enga Festu Judea niárapka ka enga na juramuti únhapkia, Sesarea uératini Jerusaléni karhamaspti.
2 Jimajkani kʼérati saserdotiicha ka ima judiuecha engaksï kʼéri ambeepka, nirasptiksï arhini andiksïsï kʼamanharhitantani japi Pabluni. Ka ueenasptiksï arhini Festuni
3 eska jarhuataapiringa ka eska Jerusaléni pʼitajkuarhipiringa Pabluni. Joperu imeechaksï eratsexapti jakutsekuni Pabluni paraksï xanharu jimbo uándikuni.
4 Joperu Festu arhiaspti eska Pablu Sesarea ónhakata japiringa ka eska ima no ióndapiringa ménderu kʼuanhatsentani.
5 Ka arhiaspti: “Imeecha engaksï juramukua jatsika ixú, juueksï jíndeni jingoni kétsemani ka enga inde achamasï meru no sési ambe úka, uaakajtsï uandani ambe no sési úski”.
6 No jamberi 8 o 10 jurhiatikua jarhaspti jima ka Sesarea kétsemaspti. Ísï pauandikua, jusgadurhu uaxakaspti ka pʼitajkuarhispti Pabluni.
7 Enga Pablu na inchapka, ima judiuecha engaksï Jerusaléni uératini kétsemapka, iámuksï uirhipandaspti ka ueenasptiksï mámaru ambe uandani eska Pablu kánikua no sési ambe úspka, joperuksï no úsïreendi xarhatani eska ísïispka ambe engaksï uandani japka.
8 Joperu Pablu kuájpikuarhispti ka uandaspti: “Ji méntkuni no ma ambe no sési úska, ji janhanharhisïnga judiuecheeri Leini, templuni ka ístu Roma anapu juramutini”.*
9 Joperu Festu uékasïreendi sési pakarani judiuechani jingoni, jimbosï arhipti Pabluni: “¿Uékasïndi Jerusaléni karhamani parakeni ji jini jusgarini ini ambe jimbo?”.
10 Joperu Pablu arhispti: “Ji imani kʼuiripuni japarini jarhaskia enga Roma anapu juramuti axaka ka ixúsïni jusgarinhaaka. Ka tʼuri exexakaia eskani no ma ambe no sési úkuaska judiuechani.
11 Ka engani meru no sési ambe úka ka engani jatsika parani uándikunhani, nóksïni kurhacheaka eskajtsïni no uándikuaka. Joperu enga no ma ambe ísïika ambe engaksï i achamasïicha uandani jaka juchiiti ambe, no nema sésikua jatsisti parareni indeecheeri jájki jimbo jurajkuni nomasi para indeechani kurhajchaani jarhani. ¡Ji uékasïnga eskarini Roma anapu juramuti jusgariuaka!”.
12 Enga Festu na uandontskuarhepkia imani achamasïichani jingoni engaksï arhistakuenga, arhispti Pabluni: “Engari uéjka eskakeni Roma anapu juramuti jusgariuaka, jiájkani Roma anapu juramutikeni jusgariuati”.
13 Ísï namuni jurhiatikua tátsekua, juramuti Agripa ka Berenise, Sesareaksï niáraspti paraksï Festuni sáni pʼorhembini.
14 Ka jimbokaksï jima pakarapiringa máru jurhiatikua, Festu aianguspti juramutini ambe enga úkuarhipka Pablu jingoni. Arhispti:
“Ixú jatsiska achamasïni ma enga Féliksi ónhatarkuarhika,
15 ka engani ji Jerusaléni japka, kʼérati saserdotiicha ka judiuecheeri orhejtsïkutiichajtsïni aiangusti ambe enga úka inde ka kurhachestijtsïni eskani uándikutarkuarhipiringa.
16 Joperuni ji arhiaska eska Roma anapu lei uandasïnga eskaksï no jatsiska para uándikutarkuarhini kʼuiripuni ma enga no orheta kuájpikuarhiaka imeechani japarini engaksï arhini jaka eska no sési ambe úska.
17 Ísï jimbo, engaksï ixú janopka, sóntkuni niraspka pauandikua ka jusgadurhu uaxakaspka ka pʼitajkuarhispka imani achamasïni.
18 Jimajkanksï jauaraspti imeecha engaksï arhini japka eska no sési ambe úspka ka ji eratsespka eskaksï uandapiringa eska iatiru no sési ambe niátaspka, joperuksï máteru ambesï uandani japti.
19 Ka arhirperaxaptiksï jimbokanha ima ménderueni kómarhisïnga imeecheeri diosïni* ka Jesúsini jimbo, achamasï ma enga uarhikia, joperu Pablu uandasïndi eskanha tsípiti jarhaska.
20 Ji no jánhaskasïreenga néna sési peentani indeni arhirperatani, jimbosïni kurhamarhipka sini uékasïreeni Jerusaléni nirani paraksï jima jusgarini.
21 Joperu enga Pablu kurhajkuarhipka ixú pakarani jupikakata para erokuarhini aberi ambe uandapirini Augustu,* ji ónhatarkuarhiska astakani na Roma anapu juramuti jingoni axapiringa”.
22 Jimajkani Agripa arhispti Festuni: “Jíjtuni uékapiringa kurhajchani indeni achamasïni”. Ka ima arhispti: “Pauanchkari kurhajchaakia”.
23 Ísï pauandikua, Agripa ka Berenise kʼérkuksï niáraspti ka inchasptiksï jusgadurhu sánderu kʼérati orhejtsïkutiiri sondaduecheeri jingoni ka imani achamasïichani jingoni engaksï sánderu kʼéri ambeepka iretarhu. Jimajkani Festu pʼitajkuarhispti Pabluni ka imanksï japarini peeraspti.
24 Ka Festu arhispti: “Juramuti Agripa ka iámindu chá engajtsï ixú jaka, exe je ini achamasïni. Iámindu judiuecha engaksï Jerusaléni irekani jaka ka ístu ixú, uinhachaparintsïni kurhachesti eska uándikunhaaka i achamasï.
25 Joperuni ji exeska eska i achamasï no ma ambe ma no sési úska para ísï uándikunhani. Ísï jimbo, enga i achamasï kurhajkuarhipka eska Augustu jusgaripiringa, ji sési exeska imani jingoni axani.
26 Joperuni no jánhaskaxaka ambe karakuni juchiiti tatani, jimboksïnisï ixú juácheka chánksïni japarini ka tʼungini japarini rei Agripa, parakani ji tátsekua uaaka karakuni ambe ma engari tʼu na iámindu ambe kurhamarhiakia.
27 Jimbokani ji no sési exesïnga axani nemani enga ónhakata jaka ka jini no uandani ambesï no sési ú”.
Notecha
^ Griegu jimbo: “Sésarini”. Ísïksï arhiasïreendi máru Roma anapu juramutiichani.
^ O “Ka arhirperaxaptiksï imeecheeri relijioni jimbo”.
^ Ísïksï arhisïreendi imani achamasïni enga sánderu kʼéri juramutiipka Roma.
