Úkuecha 26:1-32
26 Agripa arhispti Pabluni: “Uaakaria uandani”. Jimajkani Pablu iójkurhantaspti ka ueenaspti uandani para kuájpikuarhini:
2 “Juramuti Agripa, sési pʼikuarherasïnga engani iásï tʼungini japarini kuájpikuarhini jaka iámindu ima ambeeri engajtsïni judiuecha arhini jaka eskani no sési úska,
3 ka ísï uandaxaka jimbokani ji míteska eskari tʼu sési míteska ambe engaksï judiuecha pʼindeka úni ka andiksïsï arhirperajki. Jimbokenisï kurhacheni jaka eskarini jingontku kurhajchaaka.
4 ”Uánikua judiuechajtsïni sési mítesti desde engani tumbiipka ka asta jiáni jamberi engani Jerusaléni japka.
5 Engaksï imeecha uékapiringa, úpirindiksïni arhini eskani ji fariseuespka, ka fariseuechaksï sánderumindu ísï úsïndi eska Lei na uandajka ka eska máteru judiuecha.
6 Joperuni iásï jusgarinhaxaka jimbokani mintsikasïnga eska Tata Diosï ísï uaaka eska na aiakuapka juchaari ióntki anapu parientiichani.
7 Oh juramuti, juchaari 12 Israeli anapu ireteechaksï kánikua jánguarhintaxati marhuakuni Tata Diosïni chúrikua ka jurhiakua, jimbokaksï erokuarhixaka ambe enga ima aiakuaka. Ka iásïjtsïni judiuecha no sési arhixati engani ísï mintsikani jaka.*
8 ”¿Andijtsïsï no újki jakajkuni* eska Tata Diosï tsítantauaka* uarhiriichani?
9 Jíjtuni eratsesïreenga eskani jatsispka para mámaru ambe úni ka uarhipeni Jesúsi jingoni enga Nasareti anapueka.
10 Ka indeni ambemindusïni úka Jerusaléni. Ka jimbokajtsïni kʼérati saserdotiicha sésikua íntskuspka parani ísï úni, uánikua jakajkutiichani ónhaaspka. Ka ji sési exesïreenga engaksï uándikunhani jámeengia.
11 Someni no sési kaasïreenga jima engaksï judiuecha tánguarhijka para Tata Diosïni kómarhini paraksï nóteru jakajkunia tata Jesukristuni. Ka iauanisï jamberi niraska jirinhaantani parani no sési kaani jimbokani kánikua ikiakuasïreenga.
12 ”Ísï jimbosïni nirani japka Damasku, jimbokajtsïni kʼérati saserdotiicha sésikua íntskuspka ka imajtsïni axaspti,
13 ka teruxutinisï, engachi xanharu jimbo nirani japkia, oh juramuti, tʼíntskuajtsïni ma tsónhastaspti jíndeni ka ístu imeechani engaksï jíndeni jingoni nirani japka. Inde tʼíntskua sánderu tʼíntskasïreendi eska jurhiata.
14 Engachi iáminduecha kuarhatsepka, kurhaaspka eskarini nema arhixapka ebreu jimbo: ‘Saulu, Saulu, ¿andirenisï xáni no sési kámani jaki? Jandiajkuri atakuarhixaka engari ísï tʼauarheni jaka chʼurhuretarakuani’.*
15 Joperu ji arhispka: ‘Tata, ¿neeskiri?’. Ka Tatarini arhispti: ‘Jesúsiiska, ima engari tʼu xáni no sési kámani jaka.
16 Joperu jauara. Ini ambe jimbokenisï xarhachika: jimbokakeni erakuska parareni marhuacheni ka parari uandantani ambe engari exeka ka ístu ambe engakeni exeraaka juchiiti ambe.
17 Ka jíkeni kuájchakuaka paraksïni i iretarhu anapuecha ka ístu imeecha engaksï no judiueka nóksïni ambe ma úchini, jimbokakeni imeecha jingoni axaaka
18 parakari éskatarauaka ka paraksï nóteru pápkʼandu jarhania ka ménderuksï tʼíntskuarhu niántani, ka nóteru Satanási juramukuania sino Tata Diosï juramukuani, paraksï puáminhaantani imeecheeri pekaduechani ka pʼiranksï imani ambe enga Tata Diosï íntspijka, ísï eskaksï na pʼiuaka imeecha enga ima erakuaka paraksï pímbinhasïini jimbokajtsïni mintsikasïnga’.
19 ”Eskari na exeni jakaia, juramuti Agripa, ji ísï úxaka eskajtsïni na exeraka auandarhu uératini,
20 jimbokani orheta niraska aianguani Damasku anapuechani, tátsekua Jerusaléni anapuechani ka ístu iámu Judeaisï jámaska ka jimeesïsï engaksï no judiuecha irekaka, ka aianguaska eskaksï jatsiska para móantani ka andarhientani Tata Diosïni xarhataparini eskaksï móantaskia imani ambe jimbo engaksï újka.
21 Jimbojtsïnisï judiuecha jupikapti templurhu ka uándikuxamendijtsïnia.
22 Joperu Tata Diosïiri jarhuajperata jimbo, iásï jamberini aianguaxaka kʼératiichani ka ístu sapirhatiichani. Joperuni ji no ma ambe jatsikuntasïnga, imani ambejkusïni uandajka ambe engaksï Tata Diosïiri Uandakua Páriicha* ka Moisési uandaka eska úkuarhipiringa:
23 eska Kristu no sési nitamakuarhipiringa ka eska tʼíntskueri ambe aianguapiringa ini iretarhu anapuechani ka ístu no judiuechani, jimboka ima jindeeska enga ueenaka tsíntani”.
24 Ka enga Pablu ini ambe uandani japka para kuájpikuarhini, Festu uinhachakuspti: “¡Pablu, tʼuri loku jarhaskia! ¡Iámuri xerejtsïskia xáni uánikua ambe jorhenguarhini!”.
25 Joperu Pablu arhispti: “Ji no loku jarhaska tata Festu. Jurhimbikua ambe uandaxaka ka míteska ambe engani uandani jaka.
26 Ji mítetixaka eska juramuti iámu ambe sési míteska, jimbosïni no sáni chéparini uandani jaka. Ka juramuti sési mítesti iámindu ambe, jimboka i ambe no sïpatikuarku úkuarhiska.
27 Juramuti Agripa, ¿tʼuri jakajkusïni ambe engaksï Tata Diosïiri Uandakua Páriicha uandajka? Ji míteska eskari tʼu jakajkusïnga indeni ambe”.
28 Joperu Agripa arhispti Pabluni: “Tʼureni sóntku jakajkutarapiringa parani jíjtuni kristianu úkuarhini”.
29 Ka Pablu arhispti: “Kurhakuxaka Tata Diosïni eska no ióni jimbo, tʼu ka iáminduecha engajtsïni kurhajchani jaka niáraaka ísïini eskani ji, joperu eskajtsï chá kʼóru no niáraaka ónhanhani”.
30 Jimajkani juramuti Agripa jauaraspti ka máteru juramutijtu jauaraspti ka ístu Berenise ka ima achamasïicha engaksï imeecha jingoni uaxakatini japka.
31 Engaksï uéntani japkia, ísïksï arhijperapaxapti: “I achamasï no ma ambe no sési ústi paraksï uándikuni o paraksï ónhani”.
32 Ka Agripa arhispti Festuni: “I achamasï úpirindi jurajkunhani enga no kurhajkuarhipiringa eska Roma anapu juramuti* jusgaripiringa”.
Notecha
^ Griegu jimbo: “engani ísï erokuarhini jaka”.
^ Griegu jimbo: “no sési exejki”.
^ Griegu jimbo: “jauatantauaka”.
^ Uandakua enga ixú úrakuarhika griegu jimbo, pirimuni ma arhikuekaxati enga tsurhuntsurhumujka ka jindeespti para animaliichani arhijchukuani.
^ O “Profeteecha”.
^ Griegu jimbo: “Sésari”. Ísïksï arhiasïreendi máru Roma anapu juramutiichani.
