Úkuecha 27:1-44
27 Jimajkanksï uandaspti eskachi barku jimbo nipiringa Italia, ísï jimbo, arhisptiksï achamasïni ma enga Juliu arhinheenga eska ima pápiringa Pabluni ka ístu imeechani engaksï jupikakata japka, i achamasï orhejtsïkuasïreendi máru sondaduechani engaksï ísï mítekateepka komueska Augustueri sondaduecha.
2 Ka jucha barkuni ma jataspka enga Adramitiu uératini jupka ka i barku uápuru ireteecharhu niárapirindi engaksï Asia uanamukutenisï jaka ka seguiriispkachi nirani. Ka juchantsïni jingoni niraxapti Aristárku, achamasï ma enga Tesalónika anapuepka enga Masedonia jaka.
3 Ísï pauandikua, Sidónchi kétsespka. Juliu kánikua sési kámaspti* Pabluni ka jurajkuspti eska nipiringa pʼorhembiani amigu jémbeechani ka eskaksï imeecha exeni japiringa.
4 Ka jima uératini, ménderuchi barkurhu jataspka ka seguiriispkachi Chipreisï nirani, parachi jimeesïsï kuájchakukuarhini jimboka no sési tarhiaxapka ka tarhiatajtsïni kʼuanhaskuntasïreendi.
5 Ka ménderuchi parhimeska marirhu ka Silisia ka Panfilia uanamukutenisïchi niraspka ka Mirachi anhaxurhispka sáni enga Lisia jaka.
6 Engachi jima japkia, sondaduecheeri orhejtsïkuti barkuni ma exentaspti enga Alejandría uérapka ka enga Italia nirani japka, ísï jimbo, imani barku jimbojtsïni jatsiraspti.
7 Barku kánikua iatsitapaxapti, jimbochisï ióni jámapka marirhu ka nónachi niáraspka Knidu. Ka jimboka uinhamu tarhiaxapka, jucha nóna niraxapka barkurhu, ísï jimbo, Kretaisïchi niraspka ka Salmoneisïchi nitamaspka.
8 Ka nónachi jámaxapka barku jingoni astakachi andamukuentapka jima engaksï barkuecha niárajka enga ísï arhinhajka Bellos Puertos ka Lasea no iauani jarhaspti.
9 Iónchi sáni pakaraspka jima ka kánikua chékuarhisptia barku jingoni nirani marirhisï ka ima jurhiatikua jamberi nitamasptia enga kʼarhinda janheenga.* Jiájkani Pablu arhiaspti:
10 “Tateecha, engachi uéntaska ixú uératini, ji ísï exesïnga eskachi no sési ambe úkuarhinchaaka ka iámindu ambechi tsïtaaka ka barku jamberi uekameati ka úpiringachi jucha jamberi uarhini”.
11 Joperu sondaduecheeri orhejtsïkuti no kurhajchaspti Pabluni ka sánderu sési exespti imani kurhajchani enga barkuni páni japka ka barkueri dueniuni.
12 Ka ueenapirindia iauani ka jima engachi japka no ambandespti, jimboksïsï sáno iáminduecha uandapti eska sánderu sésiipiringa Fenise nirani, aberi siengaksï úpiringa jima jarhania enga na ueenapiringa iauani. Fenise Kreta jarhaspti ka barkuechaksï úsïreendi jima niárani esteisï uératini.
13 Enga úndapka sánisï tarhiani surisï uératini, imeechaksï uandaspti eska iámindu ambe sési uéraxapkia ísï eskaksï na eratsepka. Ísï jimbo, antsimaantasptiksï ankleechani ka Kreta uanamukutenisïksï nitamaspti.
14 Joperu no ióni jimbo ueenaspti no sési tarhiani, ka enga xáni uinhamu tarhiani jarhajka ísï mítekateesti komueska euroakiloni.*
15 Barku kánikua no sési niraxapti ka nóteru úsïreendia orhepanisï nirani, jimbochisï mejori jurajkutakuarhepka eskajtsïni tarhiata pápiringa.
16 Tátsekuachi jimeesïsï niraspka enga isla sapichu ma jaka enga Kauda arhinhajka parachi jimeesïsï kuájchakukuarhini, joperuchi útasï nóna pʼínguxapka barku sapichuni* enga barku antsimapani japka.
17 Engaksï na karhatantapkia barku sapichuni, uinhamuksï jótaspti barkuni kétsekisï paraka uíuinhasï japiringa. Ka jimbokaksï chéxapka eska barku Sirte* mátsepiringa, antsitaasptiksï sïndariichani paraksï irhiantani takusïichani ka jurajkusptiksï eska tarhiata paapiringa.
18 Ka pauandikua, ueenasptiksï kʼuanimani máru ambe jimboka kʼéri ma janixapka ka barku méntku no sési niraxapti manakuarhini.
19 Ka ménderu ísï pauandikua, imeechaksï marirhu kʼuanimaspti barkurhu anapu ambe.
20 Jiánisï, ióniisptia engachi nóteru exepka jurhiatani ni jóskuechani ka akuitsi janikuajtsïni* kánikua no sési kántaxapti ka ísïchi pʼikuarheraxapkia enajkichi jima uarhipirini.
21 Ka ióniisptia engaksï no ma ambe ápka imeecha engaksï barkurhu nirani japka. Jimajkani Pablu terujkani niáraspti ka arhiaspti: “Tateecha, arhixapkaksïni eskajtsïni kurhajchapiringa ka eskachi Kreta pakarapiringa, ísïchi no ma ambe úkuarhinchapiringa ka nóchi ambe ma tsïtapiringa.
22 Joperu asï ché je jimboka no nema uarhiaka, barkujkusï iámu xerekuarhentaati.
23 Chúri, juchiiti Tata Diosï, ima engani ji marhuakuni jaka axasti imeeri ánjelini
24 ka arhistirini: ‘Pablu, asï jáma chéni. Tʼuri jatsiska para Roma anapu juramuti* jingoni niárani; ístu, Tata Diosïkeni tsípiti pakataati tʼungini ka ístu iáminduechani engaksï tʼungini jingoni nirani jaka’.
25 Ísï jimbo tateecha, asï jáma je chéni jimbokani ji jakajkukusïnga Tata Diosïni ka mítetixaka eska ísïmindu úkuarhiaka eskarini ima na arhika.
26 Joperu barku iámu xerekuarhentaati jima no iauani enga isla ma jaka”.
27 Ka 14 jurhiatikua nitamasptia engachi erantskutapka jini ka jini jámani marirhu enga Adria anapueka. Ka terujkani chúri, ima achamasïicha engaksï barkurhu ánchikuarhienga úndasptiksï eratseni eskaksï jamberi andantaxapkia.
28 Ísï jimbo, sïndariksï ma uekamaspti paraksï exeni na xánderu jauamespi. Ka exesptiksï eska ma 36 metrisï* jauamespka. Tátsekuaksï jiniani sánderu niraspti ka ménderuksï ueenaspti sïndari ma uekamani ka útasï jukari 27 metru* jauamespti.
29 Joperu kánikuaksï chéxapti jimbokaksï uandasïreenga eskachi tsakapurhisï uátatakuarhipiringa, ísï jimbo, kʼuanimaasptiksï tʼámu ankleechani barkurhu tátsepani uératini ka ísïksï pʼikuarherasïreendi enajki kókuani erandepirinia.
30 Ka imeecha engaksï barkurhu ánchikuarhienga, uékasïreendiksï sïpakuarhini, jimboksïsï kʼuanimapti barku sapichuni uandaparini eskaksï barkurhu orhepani nipiringa paraksï jima uératini kʼuanimaani ankleechani.
31 Jimajkani Pablu arhispti sondaduecheeri orhejtsïkutini ka ístu sondaduechani: “Chájtsï ixú uarhiaka engaksï i achamasïicha sïpakuarhiska”.
32 Ísï jimbo, sondaduechaksï niraspti katsïkuani imani sïndariichani engaksï barku sapichuni pʼínguni japka ka marirhuksï kʼuanimaspti.
33 Erandexaptia ka Pablu ueenaspti arhiani iáminduechani eskaksï apiringa sáni ambe ma. Arhiaspti: “14 jurhiatikuestia engajtsï chá no ma ambe arhani jaka xáni uandanhiani.
34 Ísï jimboksïnisï arhini jaka eskajtsï auaka sáni ambe ma. Jíksïni chaari sési jimbosï arhini jaka, jimbokajtsï no jamberi tsïtaaka ni sikiera ma jauiri”.
35 Enga na ísï uandapkia, pʼíkuspti kurhinda ma ka iáminduechani japarini diosmaiamukua íntskuntaspti Tata Diosïni, arhukuspti ka ueenaspti arhani.
36 Jimajkani iáminduechaksï sési pʼikuarherantaspti ka ueenasptiksï tʼireni.
37 Ka 276 kʼuiripuechachi* niraxapka barkurhu.
38 Engaksï na iáminduecha sési tʼirepkia astakaksï uiniarhapka, marirhuksï kʼuanimaspti triguni paraka barku nóteru xáni kʼuetsapepiringia.
39 Enga na erandepkia, imeechaksï no mítespti naniispi jima, joperuksï exespti eska marirhu uanamukutenisï kánikua kutsari jatamespka. Jimajkani uandasptiksï eskaksï jánguarhintapiringa jima jamberi peerani barkuni.
40 Ísï jimbo, katsïkuasptiksï imani sïndariichani engaksï ankleechani pʼínguani japka ka marirhuksï kʼuanimaaspti. Ka chkétaasptiksï sïndariichani engaksï pʼakamatarakuechani pʼínguani japka para barku marirhu uanamukutenisï nirani ka pʼirakusptiksï imani takusïni enga barkurhu jukarhupka para tarhiata paani.
41 Ka marirhu uanamukuteni kánikua kutsari jatamespti ka barku jima atarhukukuarhispti ka jimaksï mátsespti. Barku sési mátsetixapti orhepanisï ka tátsepani ueenaspti iámu xerekuarhentani jimbokaksï oleecha no sési manamixapka.
42 Jimajkani sondaduechaksï ueenaspti uandani eskaksï uándikuapiringa imeechani engaksï jupikakata paani japka paraksï no marirhu kʼuanimeni ka sïpakuarhinksï.
43 Joperu sondaduecheeri orhejtsïkuti uékasïreendi kuájpini Pabluni jimbosï no jiáretaapti paraksï ísï úni. Ka uandaspti eskaksï marirhu kʼuanimepiringa imeecha engaksï jorhenapka xarhiameni paraksï imeecha orheta andantani
44 ka arhiaspti máteruechani eskaksï tátsepapiringa ka eskaksï kʼereri ambe pʼíkupiringa o barkurhu anapu ambe paraksï úni uémentani. Últimu, iáminduechaksï sési andantaspti.
Notecha
^ O “pʼamojkuspti”.
^ O “enga no ma ambe anheenga”. Ima kutsï Tisri arhinhasïreendi ka jiánisï ueenasïreendi janini ka no sési jánhaskuarhisïreendi marhirisï.
^ Indenisï arhikuekani jati enga nordesterisï uératini tarhiajka.
^ I barku sapichu marhuasïreendi para jiáni enga barku kʼéri uekameenga.
^ Exe je Glosario, Sirte.
^ O “kʼéri janikuajtsïni”.
^ Griegu jimbo: “Sésari”. Ísïksï arhiasïreendi máru Roma anapu juramutiichani.
^ Griegu jimbo: “20 brasa”. Exe je Glosario, brasa.
^ Griegu jimbo: “15 brasa”. Exe je Glosario, brasa.
^ O “almeechachi”.
