Úkuecha 28:1-31
28 Engachi na iáminduecha sési uémentapkia, jiánchi mítespka eska ima isla Malta arhinhasïreenga.
2 Ka jima anapu kʼuiripuechajtsïni* kánikua sési kámaspti.* Kurhikasptiksï ka kánikuajtsïni sési erokaspti jimboka janixapka ka kánikua tsʼirakuarhixapti.
3 Joperu Pablu chkari sáni kʼarhantaspti ka enga na kʼuanijpapka chpirirhu, akuitsi ma jimajku uéraspti ka mápkuspti Pabluni.
4 Ka engaksï jima anapuecha erajkupka Pabluni eska akuitsini ma tirijkurhatixapka, ueenasptiksï arhijperani: “I achamasï uándikpini jámeendi. Ka nájkiruka tsípiti uémentaka marirhu, Jurhimbikua* no jurajkuati para útasï irekani jarhani”.
5 Ka Pablu uauajkurhantaspti akuitsini ka akuitsi chpirirhu uejkajpespti, ka nájkiruka katsajkupka, Pablu no ma ambe úkuarhinchaspti.
6 Imeechaksï erokuarhixapti eska kʼújkurhapiringa o eska jimajku uarhipiringa. Joperu sáni ióni nitamaspti ka ima no ma ambe úkuarhinchaspti, jimboksïsï iásï uandeendia eska diosï máespka.
7 Ka jima anapu achamasï ma, ima enga sánderu kʼéri ambeepka, jima no iauani jatsiaspti máru echeriichani, ima achamasï Publiu arhinhasïreendi. Imajtsïni erokaspti ka kánikuajtsïni sési kámaspti ka imeeri kʼumanchikuarhuchi pakaraspka tanimu jurhiatikua.
8 Joperu Publiueri taati jémba ísku apondikuspti, jimboka tinharaxapka* ka iurhiri éskua pʼiraspti, ísï jimbo, Pablu inchaspti jima enga ima japka ka kómarhispti Tata Diosïni ka tátsekua pʼárhispti ka ambakerantaspti.
9 Enga na ísï úkuarhipkia, máteru kʼuiripuecha engaksï jima anapuepka ka engaksï ístu pʼamenchani japka, nirasptiksï exeni ka ambakeranhantasptiksï.
10 Ístujtsïni uánikua ambe intsïkuarhispti, ka engachi na barkurhu jatantapiringia parachi uéntani, íntskusptijtsïni ambe engachi xáni uétarhinchani japka.
11 Tanimu kutsïchi pakaraspka imani islarhu, tátsekuachi barkurhu ma jataspka enga Seusi uájpeechani* jukarhuapka. Barku Alejandría uératini jurhaspti ka imani isla jimbo pakaraspti xáni ióni enga jamberi ueenapka iauani.*
12 Tátsekuachi anhaxurhispka sáni, ka Sirakusachi pakaraspka tanimu jurhiatikua.
13 Jima uératinchi seguiriispka nirani ka Rejiuchi niáraspka. Ísï pauandikua, ueenaspti tarhiani surirhisï uératini, ka máteru pauandikua jimbo úspkachia niárani Puteoli.
14 Ka jimachi exeantaspka máru erachiichani* ka méntkujtsïni úndaspti arhini eskachi imeechani jingoni pakarapiringa siete jurhiatikua. Ka jima uératinchi Roma niraspka.
15 Engaksï jima anapu erachiicha mítepka eskachi jucha niáraxapkia, jurhasptijtsïni kúmuni asta Merkadurhu jamberi enga Apiu arhinhajka ka jima jamberi nani engaksï Tanimu Kʼumanchikuecha jaka engaksï jindeeka para mintsikuarhini. Enga Pablu exeapka, diosmaiamukua íntskuntaspti Tata Diosïni ka kánikua sési pʼikuarherantaspti.
16 Engachi na niárapkia Roma, jurajkusptiksï Pabluni eska jandiajku pakarani japiringa kʼumanchikuarhu ma ka eska sondadu ma kuáni japiringa.
17 Joperu ísï tanimu jurhiatikua jimbo, pʼitajkuarhiaspti imani judiuechani engaksï sánderu kʼéri ambeepka. Ka engaksï na iáminduecha tánguarhintatini japkia, arhiaspti: “Erachiicha, ji méntkuni no ma ambe no sési úska ka janhanharhisïnga iretani ka ístu ambe engaksï juchaari ióntki anapu parientiicha pʼindepka úni, joperujtsïni Jerusaléni jupikasti ka Roma anapuecha jingontsïni jurajkusti.
18 Engajtsïni na mámaru ambe kurhamarhipkia, uékasïreendijtsïni jurajkuni jimbokajtsïni no ma ambe exechintaspka parajtsïni uándikuni.
19 Joperuksï judiuecha no uékaspti jimbosïni kurhajkuarhipka eskarini Roma anapu juramuti* jusgariipiringa, joperu no jimbokani uékapiringa uandakuantani juchiiti iretarhu anapuechani.
20 Jimboksïnisï pʼitajkuarhika parani chánksïni jingoni uandontskuarheni, jimbokani ini kadena jingoni jótakuarhetixaka imani ambe jimbo engaksï Israeli anapuecha mintsikani jaka”.
21 Jimajkani imeechaksï arhispti: “Judea anapuechajtsïni no ma karakata axachesti enga chiiti ambe uandapiringa ka no ma erachi jurhaxati jini uératini parajtsïni chiiti ambe aianguni o no sési uandani chiiti ambe.
22 Joperu sési japirindi eskaksïni tʼungini kurhajchapiringa parachi míteni nári exesïni tʼu, jimbokachi míteska eska iápurisï no sési ambe uandanhasïnga i jimbanhi relijioniiri ambe”.*
23 Jimboksïsï uandapti eskaksï nipiringa ma jurhiatikua para imani jingoni tánguarhintani ka sánderu uánikua kʼuiripuechaksï niraspti imani kʼumanchikua jimbo enga pakarani japka. Ka chúskutaspti iámindu ambe sési aianguani Tata Diosïiri Reinueri ambe ka aianguaspti ambe enga arhijka Moisésiiri Lei ka ístu ambe engaksï karapka Tata Diosïiri Uandakua Páriicha* paraksï niárani jakajkuni Jesúsini.
24 Máruksï jakajkukuspti ka máteruechaksï nómbe.
25 Ka mámaru ambeksï uandaxapti, jimboksïsï máru uéakuntapti. Ka Pablu xántkisï uandaspti:
“Ísï jimbosï espiritu santu arhiapti chaari ióntki anapu parientiichani arini ambe enga Isaíasi uandapka, Tata Diosïiri uandakua pári,
26 ka uandaspti: ‘Ní ini iretarhu anapuechani jingoni ka arhia: “Chájtsï kurhauaka, joperujtsï no méni kurhanguaka ambe engajtsï kurhaajka. Chájtsï exeaka, joperujtsï no méni kurhanguaka ambe engajtsï exejka.
27 Jimboka i kʼuiripuecheeri mintsita nóteru ambe ma pʼikuarherasïngia. Óndikuarhistiksï* ka mínharhistiksï paraksï no úni exeni ka nijtuksï kurhaani, nijtuksï kurhanguni imeecheeri mintsita jingoni, niksï andarhientani Tata Diosïni* parani ji sési pʼikuastantaani”’.
28 Ísï jimbo, mítetini ja je eskaksï no judiuecha aiangunhaska ambeksï uaa úni para Tata Diosï pʼímutantaani. Imaksï kʼóru kurhauati”.
29 *
30 Pablu jima pakaraspti tsimani uéxurhini, kʼumanchikua ma jimbo engaksï kuániteenga ka kánikua sési erokaasïreendi iámindu imeechani engaksï nireenga pʼorhembini,
31 ka aianguasïreendi Tata Diosïiri Reinueri ambe ka no sáni chéparini jorhendaasïreendi Tata Jesukristueri ambe, méntku no ma ambe pʼíngusïreendi para ísï úni.
Notecha
^ O “ima kʼuiripuecha engaksï máteru idioma uandeenga”.
^ O “kánikua pʼamojkuspti”.
^ Griegu jimbo jindeesti Díkē. I uandakua jamberi imani diosani arhikuekajti enga jusgarpijka.
^ O “chupichupijkuxapka”, “kalentura jukaspka”.
^ O “Kástorini ka Póluksïni”.
^ O “iéstani”.
^ O “ermanuechani”.
^ Griegu jimbo: “Sésari”. Ísïksï arhiasïreendi máru Roma anapu juramutiichani.
^ O “sekteeri ambe”.
^ O “Profeteecha”.
^ O “Kurhaasïndiksï joperuksï no ma ambe úsïndi”.
^ O “niksï kʼuanhatsentani Tata Diosï jingoni”.
^ Exe je ambe enga arhijka nota enga Mateu 17:21 jimbo jaka.
