Úkuecha 3:1-26
3 Ma xanhari, Pedru ka Juanu templurhuksï karhamaxapti enga jandoreepkia para kómarhini Tata Diosïni, tresisïspti xatini anapu,*
2 ka jimajkanisï, máru kʼuiripuechaksï acheetini ma páxapti enga no ueenga xanharani desde enga andajpenupka, templurhu jamukutenksï páxapti jima enga arhinhajka Sési Jásï Puerta. Jimaksï peerasïreendi pauani pauani para ima sentabu kurhakuani imeechani engaksï templurhu incheenga.
3 Ka enga ima exepka eska Pedru ka Juanu inchaxapkia templurhu, jirejiresï kurhakuaspti sentabu.
4 Joperu Pedru enga Juanu jingoni jámani japka, eratespti imani acheetini ka arhispti: “Eratejtsïni”.
5 Ísï jimbo, ima ísku jarhaspti erateani jimboka eratsespka eskaksï íntskupiringa ambe ma.
6 Joperu Pedru arhispti: “No kámaxaka plata ni oru, joperuni máteru ambe kámaxaka engakeni uaaka íntskuni. ¡Tata Jesukristueri nombri jimbo enga Nasareti anapueka, xanhara!”.
7 Enga na ísï arhipkia, jupijkuspti jurhijkandani anapu jájkini ka jauataspti. Ka acheeti jirejiresï uinhaptarhantaspti ka uinhapindurhantani
8 ka mátirku chánhatakuarhespti ka ueenaspti jámani ka xanharaparini inchaspti templurhu imeechani jingoni, tsanguaraparini ka kʼéri ambe arhiparini Tata Diosïni.
9 Ka iámindu kʼuiripuechaksï exespti eska ima xanharaxapkia ka na enga kʼéri ambe arhini japka Tata Diosïni.
10 Jimajkani mítentasptiksï eska ima acheetiispka enga templurhu uaxamukuenga sentabu kurhajkuarhini jima enga arhinhajka Sési Jásï Puerta ka iáminduechaksï ísku pakareeraspti ka nóksï úsïreendi jakajkuni ambe enga úkuarhinchapka ima acheeti.
11 Enga acheeti útasï jupijkutini japka Pedruni ka Juanuni, kʼuiripuechaksï uiriipaspti andarhieraani jima jamberi enga arhinhajka Salomóniiri Portali. Ka kʼuiripuechaksï méntku no úsïreendi jakajkuni.
12 Enga Pedru ini ambe exepka, arhiaspti: “Israeli anapu achamasïicha, ¿andijtsïsï ísku pakareera? ¿Andijtsïnisï ísï exeni jaki enajkichi juchaari uinhapikua jingoni ambakeranta ini acheetini o jimbokachi jucha xáni sési marhuakuxaka Tata Diosïni?*
13 Abraániiri Tata Diosï, Isaakiiri Tata Diosï, Jakobueri Tata Diosï ka juchaari ióntki anapu parientiicheeri Tata Diosï, kʼéri ambe ústi imeeri Jántspirini, Jesúsini, imani engajtsï chá jupirkuarhika ka Pilatu jingontsï páni ka nójtsï jaiapanhentani imani japarini, nájkiruka Pilatu uékeenga jurajkuni.
14 Ísïisti, chájtsï no jaiapanhentaska imani achamasïni enga pímbinhasïika ka enga méntkisï sési jámaka, sánderujtsï sési exespka kurhajkuarhini eska jurajkunhapiringa ima achamasï enga uándikpini jámeenga
15 ka uándikuskajtsï Sánderu Kʼéri Orhejtsïkutini enga tsípikua íntspijka. Joperu Tata Diosï tsítantasti ka jucha exekuarhiska indeni ambe.
16 I acheeti engajtsï chá ixú exeni jaka ka engajtsï sési míteka, uinhaptarhantastia Jesúsiiri nombri jimbo ka ístu jimbokachi jucha mintsikasïnga imeeri nombrini. Jimbokachi mintsikasïnga imani, i achamasï ambakeranhantastia chánksïni japarini.
17 Erachiicha,* ji mítetixaka eskajtsï chá no uékaparinisï ísï úka, májkueni eska chaari juramutiicha.
18 Joperu Tata Diosï ísï ústi eska na uandarini japkia imeeri uandakua páriicha* jimbo: eska imeeri Erakukata* no sési nitamakuarhipiringa.
19 ”Ísï jimbo, móanta je ka andarhienta je Tata Diosïni* parakajtsï nóteru exeminhauakia chaari pekaduechani,* ka ísï úparini, Tata Diosï Jeobaksïni sési pʼikuastantaati
20 ka axaati Kristuni, imani enga ima erakuka paraksïni jarhuatani: enga jindeeka Jesúsi.
21 Ima jatsisti para auandarhu jarhani asta ima jurhiatikua jamberi enga sési peenhantaaka iámindu ambe, ima ambe enga Tata Diosï tʼuini uandarini japkia imeeri pímbinharhati uandakua páriichani jimbo engaksï ióntki irekapka.
22 Ka Moisési jamberi uandaspti: ‘Chaari Tata Diosï Jeoba erakuati chaari iretarhu nemani enga jindeuaka imeeri uandakua pári paraksïni jarhuatani ísï eskani ji. Chájtsï jatsiska para kurhajchani ka úni ambe engaksïni ima arhiaka.
23 Ka ima kʼuiripu* enga no kurhajchaaka Tata Diosïiri uandakua párini, kʼamajkunhaati para nóteru iretarhu jarhani’.
24 Iámindu Tata Diosïiri uandakua páriicha engaksï aianhpipka, Samueli jingoni ueenani, ístuksï uandantaspti i jurhiatikuecheeri ambe.
25 Íksï Tata Diosïiri uandakua páriicha uandantaspti ambe enga Tata Diosï pakatperapka chaari ióntki anapu parientiicha jingoni ka chánksïni jingontu ísï pakatperasti, jimboka Tata Diosï aiakuspka Abraánini: ‘Ka iámindu familiecha engaksï echerirhu jaka újchakuranhaatiksï chiiti uájpeechani jimbo’.
26 Enga na erakupkia imeeri Jántspirini, Tata Diosïksïni orheta chánksïni axachesti paraksïni újchakurani, ka újchakurastiksïni engaksïni ísï jarhuataka mándani arhini parajtsï nóteru no sési ambe niátania”.
Notecha
^ Griegu jimbo: “jindeespti ora para nuebe úni jámani”.
^ O “méntkisï kómarhisïnga Tata Diosïni”, “no jurajkusïnga Tata Diosïni”.
^ O “Ermanuecha”.
^ O “profeetecha”.
^ O “Kristu”.
^ O “kʼuanhatsenta je Tata Diosï jingoni”.
^ O “exeminhaakia ambe engajtsï no sési niátaka”.
^ O “alma”.
