Úkuecha 5:1-42
-
Ananíasi ka Safira (1 a 11)
-
Apostoliichaksï uánikua milagruechani uaasïndi (12 a 16)
-
Ónhaasïndiksï ka tátsekuaksï jurajkuasïndi (17 a 21a)
-
Ménderuksï Kʼérati Juesiichani jingoni paasïndi (21b a 32)
-
Tata Diosïni kurhajchani ka no kʼuiripuechani (29)
-
-
Ambe enga Gamalieli uandajka (33 a 40)
-
Kʼumanchikuecharhisïksï jámasïndi aianhpini (41 ka 42)
5 Ka acheeti ma enga Ananíasi arhinheenga íntspikuarhispti echeri ma imeeri témba jingoni enga Safira arhinheenga.
2 Joperu ima arhutaspti sáni sentabu para ima pakatakuarhini, ka no nemani aianguspti, imeeri témbajkusï mítepti. Ka na enga xáni pakajkupka, apostoliichani pákuaspti.
3 Joperu Pedru arhispti: “Ananíasi, ¿nénakini balori jatsikuski Satanási parari ísï chkuanderakuni espiritu santuni engari tʼu ísï arhutakuarhika sáni sentabu ima echeriiri engari atarantaka?
4 ¿Andi no chiitiispi echeri engari nótki íntspikuarhini japka? Ka engari na íntspikuarhipkia, ¿andi no chiitiispi iámu sentabu parari úrani na engari tʼu uékapiringa? ¿Andiresï ísï jurajkutakuarhi para inde ambe jarhani chiiti mintsitarhu? Nóri kʼuiripunisï chkuanderakuka, Tata Diosïndisï chkuanderakuka”.
5 Enga Ananíasi ísï kurhaapka, jimajku kuarhatsespti ka uarhispti. Ka iámindu ima kʼuiripuecha engaksï kurhandipka ini ambe, kánikuaksï chérakuarhespti.
6 Jimajkani, jauarasptiksï máru tumbiicha* engaksï jima japka, takusï jingonksï irhirespti, tátsekuaksï petaspti ka jatsintasptiksï.
7 Tanimu orisï tátsekua, inchaspti imeeri témba, joperu ima no mítespti ambe enga úkuarhipka.
8 Pedru kurhamarhispti: “Aiangurini, ¿chá xáni jimbo páski echerini?”. Ima arhispti: “Jo, xáni jimbochi páska”.
9 Jimajkani Pedru arhispti: “¿Andijtsïsï chá tsimarhani ísï pakatpera para Tata Diosï Jeobaeri espirituni chkuanderakuni? ¡Exe! Jamukutenksï jarhasti imeecha engaksï chiiti acheetini nika jatsintani ka tʼungintuksïni petantaati”.
10 Ka Safira jimajku uarhispti Pedruni japarini. Engaksï tumbiicha inchapka, uarhiriksï exentaspti, ísï jimbo, petasptiksï ka imeeri uámba jingonksï jatsintaspti.
11 Ísï jimbo, iámindu kúnguarhikuarhu anapuechaksï kánikua chérakuarhespti ka ístu iámindu imeecha engaksï kurhandipka ambe enga xáni úkuarhipka.
12 Ka apostoliichaksï uánikua milagruechani uaasïreendi ka uánikua máteru ambeksï* úsïreendi iretarhisï, ka Salomóniiri Portalirhuksï tánguarhisïreendi.
13 Ka ísïisti, máteruechaksï chésïreendi imeecha jingoni jámani, joperu iretarhu anapuechaksï sési ambe uandasïreendi Jesúsiiri chúxapatiicheeri ambe.
14 Ka sánderuksï uániixapti acheetiicha ka ístu uarhiitiicha engaksï jakajkuni japka Tatani, ka Jesúsiiri chúxapatiksï úkuarhisïreendi.
15 Xáni ísï engaksï jamberi kʼuiripuecha petaatauenga pʼamenchatiichani kʼérati xanharuecha jimbo ka jimaksï peeraasïreendi kama sapirhatiichani jimbo ka kʼuírakueni járhatiichani jimbo, paraka Pedru imeeri kʼumanda jingoni ambakeraantapiringa enga jimeesïsï nitamapiringa.
16 Ka ístuksï uánikua kʼuiripuecha nirasïreendi engaksï Jerusaléni no iauani anapuepka ka paasïreendiksï pʼamenchatiichani ka ístu imeechani engaksï no sési nitamakuarhienga jimbokaksï no sési jásï espirituecha incharhiatixapka ka iáminduechaksï ambakeranhantasïreendi.
17 Joperu sánderu kʼéri saserdoti ka iámindu imeecha engaksï imani jingoni japka, engaksï saduseuecha jingoni* jámeenga, kánikuaksï ikiaspti ka jauarasptiksï.
18 Ísï jimbo, jupikaasptiksï apostoliichani ka iretarhu anapu kárselirhuksï ónhaaspti.
19 Joperu chúrikua, Tata Diosï Jeobaeri ánjeli, mítaaspti kárselirhu anapu puerteechani, tátsekua petaaspti ka arhiaspti:
20 “Ní je templurhu ka jima aiangua je iretarhu anapuechani ambe enga uétarhijka para jatsini tsípikua para méntkisï”.
21 Engaksï na ísï kurhaapkia, xarhentkuksï inchaspti templurhu ka úndasptiksï jorhentpini.
Ka sánderu kʼéri saserdoti ka imeecha engaksï imani jingoni japka, niárasptiksï ka tánaantasptiksï Kʼérati juesiichani* ka iámindu Israeli anapu orhejtsïkutiichani. Jimajkani uandasptiksï eskaksï petaapiringa apostoliichani engaksï ónhakata japka ka eskaksï jima peeraapiringa.
22 Joperu engaksï kuáriicha na niárapkia jima engaksï apostoliicha ónhakata japka, imeechaksï nóteru jima jarhasptia. Ísï jimbo, ískuksï kʼuanhatsentaspti ka aianguasptiksï ambe enga úkuarhipka.
23 Arhiasptiksï: “Kárseli sési míkuarhetixapti, ka kuáriichaksï jamukuteni jarhaspti, joperu engachi mítapka, tʼuini nóteru nema jarhasptia”.
24 Ka enga templurhu anapu kuári ka kʼérati saserdotiicha kurhaapka ini ambe, ískuksï pakareeraspti jimbokaksï no mítespka néna kʼamarhupirini ambe ma.
25 Joperu kʼuiripu ma niáraspti ka aianguaspti: “¡Exe je! Ima achamasïicha engajtsï chá ónhatarkuarhiapka, ménderuksï templurhu jarhastia ka iretarhu anapuechanksï jorhendaaxati”.
26 Jimajkani templurhu anapu kuári niraspti pʼiuantani máteru kuáriichani jingoni ka nóksï ataaspti jimbokaksï chésïreenga eskaksï iretarhu anapuecha ma repentku uékapiringa tsakapu jimbo ataani.
27 Ísï jimbo, paasptiksï ka jimaksï peeraaspti nani engaksï Kʼérati Juesiicha* japka. Jimajkani sánderu kʼéri saserdoti ueenaspti mámaru ambe arhiani.
28 Ka arhiaspti: “Arhispkaksïnia eskajtsï nóteru jámapiringia jorhentpini ima achamasïiri nombri jimbo. Joperu iásï iámu Jerusaléni anapuechaksï mítestia ambe engajtsï chá jorhentpini jaka. Chájtsï uékasïnga eskani jucha arhinhaaka enga ima achamasï ísï uándikunhaka”.*
29 Pedru ka máteru apostoliichaksï uandaspti: “Jucha Tata Diosïnisï jatsika para kurhajchani ka no kʼuiripuechani, jimboka imasï jindeeka juchaari juramuti.
30 Juchaari ióntki anapu parientiicheeri Tata Diosï tsítantasti* Jesúsini, imani engajtsï chá uándikuka engajtsï ísï chkarirhu* ma cháparhataka.
31 Tata Diosï imeeri jurhijkandani jimbo peerasti para ima jindeeni Sánderu Kʼéri Orhejtsïkuti ka para pʼímutaantani kʼuiripuechani parakaksï Israeli anapuecha uaaka móantani ka paraksï úni puáminhaantani pekaduechani.*
32 Juchachi exeska ini ambe. Ka espiritu santujtu enga Tata Diosï íntsaaka imeechani engaksï kurhajchajka, jarhuatastijtsïni parachi ini ambe uandantani”.
33 Engaksï imeecha kurhaapka ini ambe, kánikuaksï ikiaspti ka uékasïreendiksï uándikuani.
34 Ka jarhaspti fariseu ma enga Gamalieli arhinheenga, ima jorhentpisïreendi ambe enga Lei arhijka ka iámindu iretarhu anapuechaksï kánikua janhanharhisïreendi. Ima jauaraspti Kʼérati Juesiichani* japarini ka uandaspti eskaksï petaapiringa sáni imani achamasïichani.
35 Tátsekua arhiaspti imeechani engaksï jima pakarapka: “Israeli anapu achamasïicha, sési eratsi je ambe engajtsï uékani jaka úni ante dejtsï ambe ma úkuani ini achamasïichani.
36 Nójtsï miásïni eska jarhaspka acheeti ma enga Teudasi arhinheenga, ima uandasïreendi eska kʼéri ambeespka ka ma 400 acheetiichaksï jámasïreendi imani chúxapani. Joperu engaksï uándikupka, iámindu imeecha engaksï imani jámeenga chúxapani sïpakuarhisptiksï ka jiminksï kʼamakurhispti.
37 Ka ísï tátsekua, jiánisï enga sénsu tarhatanhapka, ueenaspti jámani máteru acheeti enga Judasï arhinheenga enga Galilea anapuepka, ka imantuksï jámaspti chúxapani. I acheetijtu uarhisti ka imeecha engaksï imani jámeenga chúxapani sïpakuarhisptiksï.
38 Jimboksïnisï arhini jaka eskajtsï no ma ambe úkuauaka ini achamasïichani ka eskajtsï ísku exeauaka. Jimboka enga i ambe engaksï imeecha eratseni jaka úni o ambe engaksï úni jaka kʼuiripuni jimboeka, ísku kʼamakurhiati.
39 Joperu enga Tata Diosïiri ambeeka, chájtsï no ma ambe uaaka úni para pʼínguani ka jamberijtsï Tata Diosïni jingoni uarhipeni japiringa”.
40 Ísï jimbo, kurhajchasptiksï. Uandajpaasptiksï apostoliichani, ataasptiksï ka arhiasptiksï eskaksï nóteru jámapiringia jorhentpini Jesúsiiri nombri jimbo ka tátsekuaksï jurajkuaspti.
41 Imeechaksï uéntaspti jima uératini engaksï Kʼérati Juesiicha* japka ka kánikuaksï tsípixapti, jimboka Tata Diosï sésikua íntsaaspka paraksï ima no sési kánhani Jesúsiiri nombri jimbo.
42 Ka nóksï kuatantasïreendi, pauani pauanksï nirasïreendi templurhu ka kʼumanchikuecharhu paraksï jorhentpini ka uandantani ambakiti aianhperakuani Jesúsiiri ambe, enga jindeeka Kristu.
Notecha
^ O “acheetiicha engaksï sapichku japka”.
^ O “k’éri ambeksï”.
^ O “saduseuecheeri sektarhu”.
^ O “tánantasptiksï Sanedrínini”.
^ O “enga Sanedríni”.
^ Griegu jimbo: “Chájtsï uékasïnga eska juchaari jimbo niuaka ima achamasïiri iurhiri”.
^ Griegu jimbo: “jauatantasti”.
^ O “anhatapurhu”.
^ O “kʼamanharhintskuechani”.
^ O “Sanedrínini”.
^ O “enga Sanedríni”.
