Úkuecha 6:1-15
6 Ka imani jurhiatikuechani jimbo engaksï sánderu uánini japka Jesúsiiri chúxapatiicha, ima judiuecha engaksï griegu uandeenga, ueenasptiksï uandakuarhintani eskaksï* judiuecha engaksï ebreu uandeenga no íntsaaxapka tʼirekua enga pauani pauani íntsperanheenga imani uarhiiti tsïndiichani engaksï griegu uandeenga.
2 Ísï jimbo, 12 apostoliichaksï tánaantaspti iámindu Jesúsiiri chúxapatichani ka arhiasptiksï: “No sési japirindi eskachi jucha nóteru jámapiringia jorhentpini Tata Diosïiri uandakuani parachi tʼirekua ambe jámani kéntpini.
3 Ísï jimbo erachiicha,* erakua je siete achamasïichani engaksï ísï mítekateeka eskaksï ambakiti kʼuiripueska* ka engaksï jatsika espiritu santu ka engaksï jánhaskatiika para imeechani jurajkukuani ini ánchikuarhitani enga xáni uétarhini jaka iáiasï.
4 Joperu jucha méntkuni kómarhini jauaka Tata Diosïni ka imeeri uandakua ambe jorhentpini”.*
5 Ísï jimbo, iámindu Jesúsiiri chúxapatiichaksï sési exespti ambe engaksï imeecha uandapka. Ka erakusptiksï Estebanini, achamasï ma enga kánikua mintsikeenga Tata Diosïni ka enga kánikua espiritu santu jatsipka. Ístuksï erakuspti Felipeni, Prókoruni, Nikanorini, Timónini, Parmenasini ka Nikolásini, Antiokía anapu achamasï ma enga judiu úkuarhipka.
6 Tátsekuaksï apostoliichani jingoni paaspti ka engaksï na kómarhipkia Tata Diosïni, pʼájtsïkuasptiksï.
7 Ísï jimbo, uápurisï mítekuarhixaptia Tata Diosïiri uandakua, ka Jerusaléni, sánderuksï uániixaptia Jesúsiiri chúxapatiicha. Ka ístu, uánikua saserdotiichaksï ueenasptia jakajkuni.*
8 Ka Tata Diosï kánikua jaiapanhentasïreendi Estebanini ka íntskuspti uinhapikua, jimbosï ima kʼérati milagruechani uaauendi iretarhisï ka ístu uánikua máteru ambe.*
9 Joperu máru achamasïicha engaksï Libertu arhikateepka ka ístu máru Sirene ka Alejandría anapuecha ka máteru Silisia ka Asia anapuecha, nirasptiksï no sési arhini Estebanini.
10 Joperuksï no úsïreendi andani jimboka Estebani kánikua jánhaskatiispka ka jimboka espiritu santu jimbo uandasïreenga.
11 Jimajkani, sïpatikuarkuksï arhiaspti máru acheetiichani eskaksï ísï uandapiringa: “Jucha kurhajchaska na enga no sési ambe uandani japka Moisésiiri ambe ka Tata Diosïiri ambe”.
12 Ka engaksï ísï uandapka, kánikuaksï ikiataaspti iretarhu anapuechani, orhejtsïkutiichani ka karariichani. Ka jimajkuksï niárakuspti Estebanini, afuersaksï jupikaspti ka jimaksï páspti engaksï Kʼérati Juesiicha* jarhajka.
13 Ka jimaksï peeraaspti máru kʼuiripuechani paraksï chkuanderakua ambe uandantani, ka imeechaksï uandaspti: “I achamasï méntku úndaxati no sési ambe uandani Tata Diosïiri templueri ambe ka ístu Leiiri ambe.
14 Kurhaaskachi eska uandaska eskanha Jesúsi, Nasareti anapu, xerentaaka templuni ka eskanha mójtakuaka pʼindekua ambe engajtsïni Moisési jurajkuchika”.
15 Ka imeecha engaksï jima uaxakatini japka nani engaksï Kʼérati Juesiicha* jarhajka, eratesptiksï ka exesptiksï eska Estebani ísï xarhanharhixapka enajki ánjeli máepi.
Notecha
^ O “no sési exeni jimbokaksï”.
^ O “ermanuecha”.
^ O “ambakiti jángua ma jatsiska”.
^ O “uandantani”.
^ O “mintsikani”.
^ O “kʼéri ambe”.
^ O “enga Sanedríni”.
^ O “enga Sanedríni”.
