Úkuecha 8:1-40
8 Ka Saulu sési exespti engaksï ísï uándikupka.
Ka ima jurhiatikuaksï ueenaspti kánikua no sési kánhani ima kúnguarhikuarhu anapuecha enga Jerusaléni japka. Iáminduechaksï etsakuarhispti, iámu Judea ka Samariaisïksï niraspti, joperuksï apostoliicha jima pakaraspti.
2 Máru achamasïicha engaksï kánikua janhanharhienga Tata Diosïni, pásptiksï Estebanini paraksï jatsintani ka kánikuaksï ueraspti imani jimbo.
3 Ka Saulu ueenaspti iatiru no sési kaani kúnguarhikuarhu anapuechani. Inchaakukuasïreendi kʼumanchikuecharhu ka antsikupaasïreendi petaataani acheetiichani ka uarhiitiichani para ónhatarkuarhiani.
4 Joperu imeecha engaksï etsakuarhipka, uandantapaxaptiksï ambakiti aianhperakuani Tata Diosïiri uandakueri ambe.
5 Ka Felipe, Samaria* kétsemaspti ka ueenaspti Kristueri ambe aianguani kʼuiripuechani.
6 Iámindu kʼuiripuechaksï jingontku kurhaasïreendi ambe enga Felipe uandeenga, kurhajchasïreendiksï ka ístuksï exeasïreendi imani milagruechani enga ima uaauenga.
7 Uánikuechaksï jarhaspti engaksï no sési jásï espirituecha incharhiatini japka ka iichaksï uinhachaparini uérhiantasïreendi. Ka ístu, uánikua kʼuiripuechaksï ambakeranhantaspti engaksï no ueenga xanharani ka engaksï rengejteenga.
8 Jimboksïsï imani ireta jimbo, kʼuiripuecha kánikua tsípini japti.
9 Ka imani ireta jimbo, achamasï ma jarhaspti enga Simóni arhinheenga, ka ante de iámindu i ambe úkuarhini, ima sïkuamikua ambe kámasïreendi ka ísku pakataasïreendi Samaria anapuechani ka uandasïreendi eska kʼéri ambeespka.
10 Iáminduechaksï jingontku kurhajchasïreendi, sapirhatiicha ka kʼératiicha jamberi ka uandasïreendiksï: “I achamasï jatsisti Tata Diosïiri Uinhapikuani”.
11 Ka jingontkuksï kurhajchasïreendi jimboka ióniispkia enga ísku pakatauenga sïkuamikua ambe jingoni.
12 Joperu enga Felipe aianguapka ambakiti aianhperakua Tata Diosïiri Reinueri ambe ka tata Jesukristueri nombriiri ambe, jakajkukusptiksï ka niárasptiksï itsï atakuarhini* acheetiicha ka uarhiitiicha.
13 Simónijtu ueenaspti jakajkuni ka enga na itsï atakuarhipkia, méntku Felipe jingoni jámani jarhasïreendia. Ka ima ísku pakarasïreendi enga exeauenga milagruechani ka uánikua máteru ambe* enga Felipe ueenga.
14 Ka engaksï apostoliicha, engaksï Jerusaléni japka, mítepka eskaksï Samaria anapuecha jiókuarhispka Tata Diosïiri uandakuani, axasptiksï Pedruni ka Juanuni.
15 Ísï jimbo, kétsemasptiksï iretarhu ka kómarhisptiksï Tata Diosïni parakaksï Samaria anapuechajtu espiritu santu intsïnhapiringa,
16 jimbokaksï Jesúsiiri* nombri jimbojkusï itsï atakuarhipka ka nótki nema intsïnhaxapti espiritu santu.
17 Ísï jimbo, pʼájtsïkuasptiksï ka imeechaksï ueenaspti espiritu santu intsïnhani.
18 Ka enga Simóni exepka eskaksï espiritu santu intsïnhasïreenga imeecha engaksï apostoliicha pʼájtsïkuauenga, sentabu aiakuaspti apostoliichani
19 ka arhiaspti: “Jíndentujtsïni íntsku je indeni uinhapikuani, paraka ima kʼuiripu engani ji pʼájtsïkuaka, intsïnhaaka espiritu santu”.
20 Joperu Pedru arhispti: “Eska chiiti sentabu tʼungini jingoni uarhiaka, jimbokari eratseska eskari úpiringa sentabu jimbo piáni Tata Diosïiri intsïmperatani.
21 Tʼuri méntku no jatsiska para ixúesïsï inchaakurhani jarhani, jimboka Tata Diosï exexaka eska chiiti mintsita no sési jarhaska.
22 Móanta indeni ambe jimbo engari xáni no sési niátaka, ka kómarhikuarhi Tata Diosï Jeobani, nandikakini uaaka puáchentani engari ísï xáni no sési ambe eratseka chiiti mintsitarhu;
23 jimbokani ji exexaka eskari tʼu kánikua enbidiarpisïnga ka méntkuri uékani jarhasïnga no sési jásï ambe úni”.
24 Simóni arhiaspti: “Kómarhi je Tata Diosï Jeobani jíndeni jimbo, parakani no ísï úkuarhinchaaka eskajtsï chá na uandani jaka”.
25 Engaksï na iámindu ambe sési aianguapkia kʼuiripuechani ka engaksï na aianhpipkia Tata Diosï Jeobaeri uandakueri ambe, kʼuanhatsentasptiksï Jerusaléni ka nirasptiksï uánikua ireteecha jimbo engaksï Samaria jaka ka uandantasptiksï ambakiti aianhperakuani.
26 Joperu Tata Diosï Jeobaeri ánjeli uandajpaspti Felipeni ka arhispti: “Jauara ka surisï ní, imani xanharu jimbo enga Jerusaléni kétsemajka para Gasa niárani”. —I xanharu desierturhisï jarhasti—.
27 Ísï jimbo, ima jauaraspti ka niraspti. Jimajkani kúntaspti Etiopía anapu achamasïni ma,* i achamasï kʼéri ánchikuarhita ma jatsispti Kandaseeri kʼumanchikuarhu, enga Etiopía anapu juramutiipka,* ka i achamasï exeni jarhasïreendi iámu imeeri jatsikuarhekua ambe. Achamasï Jerusaléni niraspti para Tata Diosïni kómarhini,
28 ka iásï kʼuanhatsentaxaptia. Imeeri karreta jimbo níntaxapti ka arhipantaxapti Isaíasiiri karakata enga Tata Diosïiri uandakua páriipka.*
29 Ísï jimbo, espiritu santu arhispti Felipeni: “Ní andarhierani indeni karretani”.
30 Felipe uiriispti andarhierani ka máekandu niárakuspti, ka kurhaaspti eska ima arhintaxapka Isaíasiiri karakatani, enga Tata Diosïiri uandakua páriipka. Jimajkani, kurhamarhispti: “¿Kurhanguxakiri ambe engari arhintani jaka?”.
31 Ima arhispti: “¿Ka nénajtuni uaa kurhanguni enga no nema jaka parareni jorhendani?”. Ísï jimbo, méntku úndaspti arhini Felipeni eska jatapiringa ka eska imani jingoni uaxakapiringa.
32 I jindeespti karakata enga arhintani japka: “Ima ísï pánhaspti para uándikunhani komueska karichi ma; ka ísï eska karichi sapichu ma na no mintsirajka engaksï kuinani jarhajka, imajtu no ma ambe uandasïndi.
33 Engaksï no sési arhini japka, kánikuaksï no sési kámaspti. ¿Ka né uandantaa náki kʼumanchikua jimbo jurhaski?* Jimboka euanhantaaka tsípikua ixú parhakpinirhu”.
34 Jimajkani achamasï arhispti Felipeni: “Arhireni sáni, ¿néni arhikuekaxaki Tata Diosïiri uandakua pári? ¿Imeeri ambe uandaxaki o máteru nemeeri?”.
35 Felipe ueenaspti uandani ka ini karakata jingoni ueenani, aianguspti ambakiti aianhperakuani Jesúsiiri ambe.
36 Ka engaksï xanharu jimbo nirani japka, jimeesïsïksï nitamaspti enga itsï jatapka, ka achamasï arhispti: “¡Exe! Ixú itsï jatasti. ¿Andisïni no mátirku itsï atakuarhijki?”.
37 *
38 Ísï jimbo, achamasï uandaspti eskaksï anhaxustapiringa karretani ka Felipe ka ima achamasï itsïirhuksï inchamespti. Jimajkani Felipe itsï ataspti.
39 Engaksï na itsïirhu uémentapkia, Tata Diosï Jeobaeri espiritu santu jirejiresï páspti Felipeni máteru naniisïsï ka achamasï nóteru méni exesptia. Jiájkani achamasï níntaspti ka tsípipantaspti.
40 Joperu Felipe Asdodi niáraspti ka enga jimeesïsï nirani japka, iámu ireteecha jimbo aianhpispti ambakiti aianhperakuani astaka Sesarea niárapka.
Notecha
^ O jamberi “Samaria anapu ireta ma jimbo”.
^ Exe je Glosario, itsï atakuarhini; itsï atani.
^ O “kʼéri ambe”.
^ Griegu jimbo: “Tata Jesúsiiri”.
^ Griegu jimbo: ‘eunukuni ma’. Exe je Glosario, eunuku.
^ O “reineepka”.
^ O “enga profeteepka”.
^ O “¿né uandantaa nani uératini jurhaski?”.
^ Exe je ambe enga arhijka nota enga Mateu 17:21 jimbo jaka.
