Primeru Karakata para Tesalónika anapuecha 1:1-10
1 Ji Pablu, ístu Silbanu* ka Timoteu engaksï jíndeni jingoni jaka, karakuxaka Tesalónika anapu kúnguarhikuani enga Tata Diosïiriika, enga jindeeka Taati, ka enga ístu Tata Jesukristueriika:
Eskaksïni Tata Diosï kánikua kóndentaaka* ka eskaksïni pínandikua íntskuaka.
2 Méntkisïchi diosmaiamukua arhisïnga Tata Diosïni engaksïni kómarhijpichejka iámindu chánksïni.
3 Jimboka juchaari Tata Diosïni japarini enga jindeeka juchaari Taati, nóchi méni mirikurhisïnga ambe engajtsï chá xáni úka jimbokajtsï mintsikasïnga Tata Diosïni ka jimbokajtsï xénchpesïnga ka ístu indeni jimbo engajtsï xáni tekaantakia jimbokajtsï mintsikasïnga juchaari Tata Jesukristuni.
4 Juchaari erachiicha* engaksïni Tata Diosï xáni xénchajka, jucha sési míteska eskaksïni ima erakuska chánksïni.
5 Jimboka engajtsï chá kurhandipka ambakiti aianhperakuani, no uandakua jimbojkujtsïsï kurhaapka, sánderu sési, espiritu santu jimbo. Ka sésichi mítetixaka eska inde ambe engaksïni jucha aianguka, jurhimbikua ambeeska ka eskaksïni kánikua jarhuataskia. Ka chájtsï sési míteska na engachi xáni jánguarhintaka paraksïni chánksïni jarhuatani.
6 Ístu, chájtsï májkueni úska eska jucha ka eska Tata, jimboka nájkirukajtsï kómu nitamakuarhini japka, chájtsï jiókuarhiska Tata Diosïiri uandakuani jimbokaksïni espiritu santu jarhuataska parajtsï chá tsípikua jingoni jiókuarhini.
7 Ka engajtsï ísï úka, chájtsï exeraaska Masedonia ka Akaia anapu jakajkutiichani na engaksï jatsika para jámani.
8 Jo, chánksïni jimbo, Masedonia ka Akaia anapuechaksï kurhandixati Tata Diosï Jeobaeri uandakuani, joperu no inde ambejku, iápurisï mítekuarhixati na engajtsï xáni mintsikajka Tata Diosïni. Ísï jimbo, jucha nóteruni ambe ma uandaakia.
9 Jimbokaksï imeecha útasï uandasïnga ambe enga úkuarhipka ima jurhiatikua engachi jucha mítperapka, na engajtsï chá jurajkuaka diosï úkatechani ka na engajtsï andarhieraka Tata Diosïni, parajtsï jántspikuni imani Tata Diosïni enga tsípiti jaka ka enga sési jimboeka,
10 ka parajtsï erontani imeeri Uájpani enga auandarhu uératini juuaka, imani enga ima tsítantaka,* Jesúsini, imajtsïnisï pʼímutantaati parachi no kastigarinhani imani jurhiatikua enga jurhani jaka.
Notecha
^ Enga ístu arhinheenga Silasi.
^ Exe je Glosario, Tata Diosï kánikua kóntpintasïndi.
^ O “ermanuecha”.
^ Griegu jimbo: “jauatantaka”.
