Primeru Karakata para Tesalónika anapuecha 2:1-20
2 Erachiicha,* chájtsï mítetixaka eskaksïni jucha no ísku jatinisï nípka exeni.
2 Chájtsï míteska eskachi jucha kómu nitamakuarhiska ka eskachi no sési kánhaska Filipusï, joperujtsïni Tata Diosï jarhuatasti parachi jucha balori jukantani* paraksïni aianguni ambakiti aianhperakuani Tata Diosïiri ambe nájkirukachi xáni no sési kánhani japka.*
3 Jimboka no ísku ambe máeska ambe engaksïni jucha arhistachijka,* nijtu ikichakueni jásï ambe ka nijtu jindee paraksïni támisï jánhastani,
4 sánderu sési, Tata Diosïjtsïni jaiapanhentasti ka ístujtsïni mintsikasti engajtsïni ísï jurajkuka parachi ambakiti aianhperakuani jámani uandantani, jimbochisï jucha no ísï uandajka nomasi parachi kʼuiripuechani jingoni sési pakarani, sánderu sési, parachi sési pʼikuastani Tata Diosïni, imani enga exeni jarhajka ambe enga juchaari mintsitarhu jaka.
5 Chájtsï míteska eskaksïni jucha no méni ísku jatini sési arhiska paraksïni támisï jánhastani ka nóchi méni ísku jatini ísï jámaska enajkichi ambakiti kʼuiripuepirini nomasi parachi intsïnhani ambe ma. ¡Tata Diosï mítesti eska i ambe ísïiska!
6 Ístuchi no méni uékaska eskajtsïni kʼuiripuecha kʼéri ambe exepiringa, nijtu chá ka nijtu máteru kʼuiripuecha, nájkirukaksïni úpiringa chánksïni arhini parajtsïni kéndani jarhani, jimbokachi jucha Kristueri apostoliiska.
7 Sánderu sési, juchaksïni méntkisï sési kámaska, ísïksïni kámaska eska naandi ma na xáni sési kámajka tʼirerani imeeri charhakuni ka enga exeni jarhajka* jimboka xénchasïnga.
8 Ísï jimbo, jimbokaksïni jucha kánikua xénchasïnga, jucha uandaspkia eskaksïni aiangupiringa* ambakiti aianhperakuani Tata Diosïiri ambe, joperu no inde ambejku, ístuksïni íntskupiringa juchaari tsípikua.
9 Erachiicha, jamberijtsï miáni jaka na engachi jucha uinhamu ánchikuarhipka ka na engachi xáni jánguarhintapka. Jiáni engaksïni aiangupka ambakiti aianhperakua Tata Diosïiri ambe, jucha chúskutasïreenga ánchikuarhini ka chúrikua jamberichi ánchikuarhisïreenga paraksïni no chánksïni arhini jarhani eskajtsïni kéndapiringa.
10 Chá engajtsï jakajkutiika sésijtsï míteska ka Tata Diosïjtu sési mítesti eskachi jucha méntkisï xarhataska chánksïni japarini eskachi mintsinharhikueska, eskachi sési jámasïnga ka eskachi no ma ambe no sési exeminhaska.
11 Chájtsï míteska eskaksïni jucha ísï kámaska eska taati ma na kaajka imeeri uájpeechani, jimbokaksïni arhistachisïreenga,* sésiksïni pʼikuastantasïreenga ka ístuksïni mándani arhini arhisïreenga na engajtsï jatsika para jámani
12 parakajtsï chá seguiriipiringa ísï jámani eska Tata Diosï na jaiapanhintajka, ima engaksïni ióarhini jaka imeeri Reinurhu ka ístu paraksïni kʼéri ambe úni.
13 Ísï jimbo, juchajtuchi méntkisï diosmaiamukua arhisïnga Tata Diosïni, jimboka jiáni engaksïni jucha aiangupka Tata Diosïiri uandakuani, chájtsï jiókuarhispka, joperujtsï no ísï jiókuarhispka komueska kʼuiripueri uandakua ambe, sánderu sési, komueska Tata Diosïiri uandakua, jo, jimboka sési jimbo Tata Diosïiri uandakueska ka iásï indeksïnisï jarhuatani jatiia chánksïni engajtsï jakajkutiika.
14 Erachiicha, chájtujtsï májkueni úska eska Tata Diosïiri kúnguarhikuecha engaksï Judea jaka ka engaksï Kristu Jesúsiiri chúxapatiika, jimbokajtsï chá no sési nitamakuarhiska engaksïni chaari iretarhu anapuecha no sési kámaka ka imajtuksï iásï májkueni no sési nitamakuarhixati jimbokaksï judiuecha no sési kaaxaka,
15 imeechaksï Jesúsini* jamberi uándikusti ka Tata Diosïiri uandakua páriichani,* ka ístu, juchantsïni jamberi no sési kámasti. Ístu, imaksï no jaiapanherantaxati Tata Diosïni ka méntkuksï no uékasïndi jarhuataani kʼuiripuechani
16 jimbokaksï imeecha no uékasïnga eskachi jucha aianguauaka no judiuechani nénaksï uaa pʼímutanhantani. Ka engaksï ísï újka, sánderuksï no sési ambe niátaxati. Joperu iásï kʼóru ima xarhataxati na enga xáni ikiakuani jaka.
17 Erachiicha, jiáni engaksïni jucha ma tiempu jurajkupka,* nóteruksïni úspkia exeni, joperuksïni méntku miáxapka. Juchaksïni uékaxapkia exeni,* jimbochisï no na jámapka parachi nirani.
18 Jimboksïnisï uékani japka nirani pʼorhembini. Ji Pablu, ji tsimani xanhari jámaspka nirani, joperujtsïni Satanási ójkutaspti.
19 Jimboka jiáni enga ixú jauakia Jesúsi, enga jindeeka juchaari Tata, ¿juchachi néni mintsikaa? ¿Néni jimbochi xáni sési pʼikuarheraa? Ka ¿néksï jindeua juchaari intsïmperata engachi jimbo xáni tsípini jauaka imani japarini? ¿Andi no cháeua?
20 Jo, chánksïni jimbochisï jucha xáni sési pʼikuarherajka ka chánksïni jimbochisï xáni tsípijka.
Notecha
^ O “Ermanuecha”.
^ O “uinhapikuarhintani”.
^ O jamberi “xáni úkua jukanchani japka”.
^ O “arhijka”.
^ O “enga pʼarhipʼarhitajka”.
^ Griegu jimbo: “juchaksïni tsípikua jingoni aianguska”.
^ O “uandontskuarhechesïreenga”.
^ Griegu jimbo: “Tata Jesúsini”.
^ O “profeteechani”.
^ O “jiáni engajtsïni nóteru jurajkupkia parachi chánksïni jingoni jarhani”.
^ O “erateni”.
