Primeru Karakata para Tesalónika anapuecha 3:1-13
3 Ísï jimbo, jimbokachi nóteru úspkia xántkisku pakarani, uandaspkachi eska sánderu sési japiringa juchajku pakarani Atenasi,
2 jimboksïnisï axachepka juchaari erachi* Timoteuni, inde Tata Diosïni marhuakuxati* para ambakiti aianhperakuani uandantani Kristueri ambe. Jucha axaska paraksïni inde uinhaperantani ka sésiksïni pʼikuastantani parajtsï chá sánderu mintsikani,
3 paraka no nema chkéaka* ini uandanhiata ambe jimbo. Jimbokajtsï chá mítetixaka eskachi jatsiska para no sési nitamakuarhini.*
4 Jimboka engani jucha chánksïni jingoni japka, juchaksïni aiangusïreenga eskachi no sési ambe nitamakuarhipiringa, ka chájtsï exeskia eska ísï úkuarhiska.
5 Ísï jimbo, ji nóteruni úspkia ísku jarhani jimbosïni axapka Timoteuni parani míteni sini chá seguirixapi mintsikani Tata Diosïni, jimbokaksïni chéjkuxapka eskaksïni Noambakiti niárapiringa tsʼéjkuni ka jucha ísku jatini xáni ánchikuarhini.
6 Joperu iásï enga Timoteu junguakia jini uératini, ambakiti ambejtsïni aiangusti. Aiangustijtsïni eskajtsï chá útasï mintsikaxaka Tata Diosïni ka eskajtsï xénchpesïnga. Ístujtsïni aiangusti eskajtsïni chá méntkisï tsípikua jingoni miáni jarhasïnga ka eskajtsïni uékaxakaia exeni ísï eskaksïni jucha na uékani jaka exeni chánksïni.
7 Ísï jimbo erachiicha, nájkirukani jucha no sési nitamakuarhini* jarhajka ka uandanhiata ambe jatsini, chájtsïni kánikua sési pʼikuastantasïnga, ka ístujtsïni sési pʼikuastantasïndi míteni eskajtsï chá seguirixaka mintsikani Tata Diosïni.
8 Jimboka enga chá no méni jurajkuaka Tatani, jucha sési pʼikuarherantaaka.*
9 ¿Ka nénachi uaa diosmaiamukua arhini Tata Diosïni chánksïni jimbo ka indeni jimbo engajtsïni xáni sési pʼikuastajka juchaari Tata Diosïni japarini?
10 Chúrikua ka jurhiakua, jucha méntku úndaxaka mintsita jingoni kómarhini Tata Diosïni paraksïni únia exeni* ka ístu paraksïni jarhuatani imani ambe jingoni engajtsï uétarhinchani jaka parajtsï sánderu mintsikani.
11 Eska juchaari Tata Diosï ka Taati ka ístu Jesúsi enga jindeeka juchaari Tata, eskajtsïni imeecha orhechepaaka paraksïni jucha úni nirani exeni.
12 Ka eskaksïni Tata jarhuataaka para chá sánderu, jo, parajtsï chá sánderu xénchperani ka ístu parajtsï sánderu xénchaani máteruechani, ísï eskaksïni jucha na xáni xénchajka chánksïni,
13 parakaksïni ima jarhuataaka para chaari mintsita uíuinhasï jarhani, para no ma ambe no sési exeminhani ka para pímbinhasï jarhani juchaari Tata Diosïni japarini, enga jindeeka Taati, jiáni enga Jesúsi, enga jindeeka juchaari Tata, ixú jauakia iámindu imeeri pímbinharhatiicha jingoni.
Notecha
^ O “ermanu”.
^ O jamberi “jarhuataxati”.
^ Griegu jimbo: “no nema támisï pánhaaka”.
^ O “eskachi ini ambe jimbosï erakunhaka”.
^ Griegu jimbo: “uétarhinchani”.
^ Griegu jimbo: “jucha tsípiti jauaka”.
^ Griegu jimbo: “erateni”.
