Primeru Karakata para Tesalónika anapuecha 4:1-18
4 Ka parachi kʼamarania erachiicha,* juchaksïni jorhendaskia nénajtsï jatsiski para jámani* parajtsï sési pʼikuastani Tata Diosïni, ka chájtsï ísï úxakaia. Joperu iásï Jesúsini* jimbo, kurhachexakaksïni eskajtsï sánderu jánguarhintaaka.
2 Chájtsï iásï míteskia ambe engaksïni jucha arhistachika,* jimbokajtsïni Jesúsi* ísï juramuchiska.
3 Ini ambesï uéjti Tata Diosï: eskajtsï méntkisï pímbinhasï jauaka ka eskajtsï no jámaaka ísku jándikua ambe* niátani.
4 Mándani arhini, jatsiskajtsï para míteni néna pʼínguni chaari kuerpuni para méntkisï pímbinhasï jarhani ka sési exenhani,
5 ka nójtsï jatsiska para ísï jámani eska ima kʼuiripuecha engaksï no míteka Tata Diosïni, engaksï méntku relasioni seksuali únchani jarhajka ka nóksï úni pʼíngukuarhini.
6 No nema jatsisti para no sési ambe uékani úkuni erachini ma, o ójkutani para ima no úni ambe enga sésikua jatsika para úni, jimboka ísï eskaksïni na arhikia ka eskaksïni na sési aiangukia, Tata Diosï Jeoba kastigariuasïndi imeechani engaksï ini ambe újka.
7 Jimbokajtsïni Tata Diosï ióarhiska parachi pímbinhasïini ka no parachi ikichakueni jásï ambe úni.
8 Ísï jimbo, ima enga ísku kurhandijka ini ambe, no kʼuiripunisï ma ísku kurhajchani jarhajti, sino Tata Diosïni, imani engaksïni espiritu santu íntskujka.
9 Joperujtsï chá no uétarhinchasïnga eskaksïni jucha karachini jauaka parajtsï chá ísï xénchperani enajkijtsï iáminduecha ermanutiipirini, jimbokaksïni chánksïni Tata Diosïsï jorhendani jaka parajtsï xénchperani.
10 Ka ísïjtsï úxakaia Masedonia anapu erachiichani jingoni, joperuksïni kurhachexaka eskajtsï sánderu jánguarhintaaka.
11 Jánguarhinta je sési pájperani iáminduechani jingoni ka asï jáma je máteruechani inchaakukuani ka ánchikuarhi je chaari jájkiicha jingoni ísï eskaksïni jucha na arhikia,
12 parakaksï imeecha engaksï no jakajkutiika exeaka eskajtsï chá sési jámasïnga ka parakajtsï chá no ma ambe kueratanchaaka.
13 Ístu erachiicha, jucha uékasïnga eskajtsï chá sési mítetini jauaka ambe engaksï úkuarhinchaaka imeecha engaksï uarhikia,* parakajtsï chá no xáni kómu pʼikuarheraaka komueska imeecha engaksï no ma ambe erokuarhini jaka.
14 Jimboka engachi mintsikani jaka eska Jesúsi uarhiska ka eska tsítanhantaska,* ístuchi mintsikaxaka eska Tata Diosï tsítantauaka Jesúsiiri chúxapatiichani engaksï uarhikia* paraksï imani jingoni jarhani.
15 Jucha Tata Diosï Jeobaeri uandakua jimbochisï jupindaskuarhini jaka paraksïni ísï arhini: jucha engachi tsípiti jauaka jiáni enga Tata ixú jauakia, auandarhuchi tsíntaaka, joperu imeechaksï orheta tsíntaati engaksï uarhikia* ka tátsekuachi jucha tsíntaaka.
16 Jimboka juchaari Tata auandarhu uératini kétseaka ka uinhachaati.* Ísï uinhachaati komueska arkanjeli ma ka Tata Diosïiri trompeta kámani jauati, ka imeeri chúxapatiichaksï orheta tsíntaati* engaksï uarhikia.
17 Tátsekua, jucha engachi tsípiti jauaka, nubeecharhuchi karhanchentaaka parachi Tata jingoni jarhani, ka ísïchi méntkisï Tata jingoni jauakia.
18 Ísï jimbo, sési pʼikuastperanta je iáminduecha ini ambe jingoni engaksïni arhikia.
Notecha
^ O “ermanuecha”.
^ O “irekani”.
^ Griegu jimbo: “Tata Jesúsini”.
^ O “arhika”.
^ Griegu jimbo: “Tata Jesúsi”.
^ Griegu jimbo pornéia. Exe je Glosario, ísku jándikua ambe.
^ Griegu jimbo: “engaksï kʼuíkia uarhikuarhu”.
^ Griegu jimbo: “eska jauatanhantaska”.
^ Griegu jimbo: “engaksï kʼuíkia uarhikuarhu”.
^ Griegu jimbo: “engaksï kʼuíkia uarhikuarhu”.
^ O “juramukua jingoni uandaati”.
^ Griegu jimbo: “jauaraati”.
