Primeru Karakata para Tesalónika anapuecha 5:1-28
5 Ka erachiicha,* no uétarhisïndi eskaksïni nema karachini jauaka náki tiempu o náki jurhiatikua jimbo úkuarhia i ambe,
2 jimbokajtsï chá sési míteska eska Tata Diosï Jeobaeri jurhiatikua ísï juuaka eska sïpari ma enga chúrikua jurhajka.
3 Engaksï imeecha uandani jauaka “¡Iásï kʼóru sési jánhaskuarhixatiia ka nóteruchi uandanhiaxakaia!”, jiánksïsï ma repentku kʼamajkunhaati, ísï eska uarhiiti ma na ma repentku ueenajka no sési pʼikuarherani enga kánguarhini jarhajkia charhakuni, ka méntkuksï no uaati sïpakuarhini.
4 Joperu erachiicha, chájtsï no pápkʼandu jarhaska jimbojtsïsï no uaaka uandani eskajtsï no mítespka na jatini juua ima jurhiatikua, ísï eskaksï sïpariicha na chúrikua jámajka ka nóksï jamberi kuenta íntskukuarheni eska erandeskia,
5 jimbokajtsï chá tʼíntskueri ka jurhiakueri uájpeeska. Juchachi no chúrikua anapueska nijtuchi pápkʼandekuarhu anapue.
6 Ísï jimbo, nóchi jatsiska para kʼuíni jarhani ísï eskaksï na jaka máteruecha. Ju je méntkisï tsínharhitini jarhani ka ju je seguiriini jarhani sési eratseni.
7 Imeecha engaksï kʼuíjka chúrikuaksïsï kʼuíjti, ka imeecha engaksï kauijka, chúrikuaksïsï kénharhijti.
8 Joperu jucha engachi jurhiakuarhu anapueka, ju je seguiriini jarhani sési eratseni, ka ju je sési jámani ka xénchpeni enga jindeeka jukantani indeni inchanhikuani enga iámu kʼénhikuani kuájchakujka, ka ju je méntkisï miáni jarhani eskachi pʼímutanhantaaka, inde ambe ísïisti enajkichi inchajtsïtini jaki ambe ma parachi kuájchakuni juchaari éjpuni,
9 jimbokajtsïni Tata Diosï no erakuska parajtsïni kastigarini, sánderu sési, parachi pʼímutanhantani juchaari Tata Jesukristuni jimbo.
10 Ima juchantsïni jimbo uarhisti parakachi imani jingoni irekaaka, na uéjkichi tsínharhitini jarhani o na uéjkichi kʼuíni jarhani.*
11 Ísï jimbo, seguirii je uinhaperperantani* ka jarhuajperani, ísï eskajtsï na úni jakaia.
12 Joperu iásï erachiicha, kurhachexakaksïni eskajtsï janhanharhiauaka imeechani engaksï uinhamu ánchikuarhijka chánksïni jimbo, engaksïni orhechepajka* parajtsï Tatani ánchikuarhikuni ka engaksïni arhistachijka.
13 Kánikua sési kaa je ka xénchaa je jimbokaksï imeecha uinhamu ánchikuarhisïnga, ístu, jánguarhinta je sési pájperani iáminduecha jingoni.
14 Joperu erachiicha, ístuksïni kurhachexaka eskajtsï arhiauaka sáni ambe ma imeechani engaksï no kurhandijka,* sési pʼikuastaanta je imeechani engaksï kómu pʼikuarherani* jaka, jarhuataa je imeechani engaksï chkérini jaka ka tekaakuanta je iáminduechani.
15 Enga kʼuiripu ma no sési ambe úkuaka máteru kʼuiripuni, chá xéparini jáma je paraka inde no májkueni kámaaka. Sánderu sési, jánguarhinta je parajtsï chá méntkisï sési kámberani ka ístu sési kaani máteruechani.
16 Méntkisï tsípi je.
17 Méntku únda je kómarhini Tata Diosïni.
18 Diosmaiamukua arhijpi je iámindu ambe jimbo. Indeni ambesï uéjti Tata Diosï para iámindu imeecha engaksï Kristu Jesúsiiri chúxapatiika.
19 Asï jáma je pʼínguni espiritu santuni paraksïni inde úni jarhuatani.
20 Asï jáma je ísku kurhandini ambe engaksï Tata Diosïiri uandakua páriicha* uandantaka.
21 Jatsiskajtsï para exeni eska iámindu ambe ísïiska, ka asï jáma je jurajkuni indeni ambe enga ambakitiika.*
22 Asï jáma je no sési ambe niátani.
23 Eskaksïni ima Tata Diosï, enga pínandikua íntspijka, iámu pímbinhajkuntaaka. Ka erachiicha, eska chaari espiritu, chaari alma* ka chaari kuerpu iámindu ambe jimbo seguiriini jauaka pímbinhasï jarhani ka sésiksï jarhani para jiáni enga juchaari Tata Jesukristu ixú jauakia.
24 Ima engaksïni ióarhini jaka mintsinharhikuesti ka ima ísïmindu uaati.
25 Erachiicha, méntkujtsïni kómarhijpicheni ja je.
26 Engajtsï uandajpauaka erachiichani, mintsita jingoni putinharhikua je iáminduechani.
27 Tateeri nombri jimbo, jíksïni kurhachexaka eskajtsï iámindu erachiichani arhikuantauaka ini karakatani.
28 Eskaksïni juchaari Tata Jesukristu kánikua kóndentaaka.
Notecha
^ O “ermanuecha”.
^ O “kʼuíni jarhani uarhikuarhu”.
^ O “sési pʼikuastperantani”.
^ O “orhejtsïkujka”.
^ O “eskajtsï arhistakuauaka sáni imeechani engaksï no káni sési jámajka”.
^ O “engaksï chkérini”.
^ O “profeteecha”.
^ O “enga kánikua sési jaka”.
^ O “tsípikua”. Exe je Glosario, alma.
