Primeru Karakata Juanueri 2:1-29
-
Jesúsi kéjtsïtanhasti parachi úni ménderu sési pájperantani Tata Diosïni jingoni (1 ka 2)
-
Seguiriixakachi úni ambe enga ima juramujka (3 a 11)
-
Ióntki anapu mandamientu ma ka jimbanhi ma (7 ka 8)
-
-
Andisï karakua ini karakatani (12 a 14)
-
“Asï jáma je xénchani parhakpinini” (15 a 17)
-
Xéparini jámani imani jingoni enga ikiakujka Kristuni (18 a 29)
2 Juchiiti sapiicha,* jíksïni ini ambe karachixaka parakajtsï no jámaaka pekadu ambe niátani. Joperu enga nema pekadu ambe niátaska, jatsiskachi nemani engajtsïni jarhuatajka* ka enga Taatiiri máekandu jaka: tata Jesukristu, ima enga iámindu ambe sési újka.
2 Ima juchaari pekaduechani jimbo kéjtsïtanhasti parachi úni ménderu sési pájperantani Tata Diosïni jingoni, joperu no juchaari pekaduechani jimbojku, sino ístu iámu parhakpini anapuecheeri jimbo.
3 Ka engachi seguiriini jauaka úni ambe enga ima juramujka, ísïchisï xarhataaka eskachi míteskia imani.
4 Ima enga uandajka “Ji sési míteskia imani” ka jini no úni jarhani ambe enga ima juramujka, chkuanderaxati ka no jakajkusïndi jurhimbikua ambe.
5 Joperu enga nema újka ambe enga ima uandajka, sési jimbo xarhatani jarhasïndi eska xénchasïnga Tata Diosïni. Ísïchisï xarhatajka eskachi imani jingoni jarhaska.
6 Ima enga uandajka eska imani jingoni jarhaska, jatsisti para májkueni jámani eska ima* na jámapka.
7 Juchiiti erachiicha* engaksïni ji xáni xénchajka, nóksïni jimbanhi mandamientu ma karachixaka, sino ióntki anapu ma, ima engajtsï chá ueenakuarhutki intsïnhapka. I ióntki anapu mandamientu jindeesti ima uandakua engajtsï chá kurhajtsïtapkia.
8 Joperuksïni ji jimbanhi mandamientu ma karachixaka, ka Kristu sési ústi indeni ambe ka chájtisï. Jimboka kéndikuxakaia pápkʼandekua ka meremerexexatiia tʼíntskua enga sési jimboeka.
9 Ima enga uandajka eska tʼíntskuarhu jarhaska ka jini ikiakuni imeeri erachi jémbani, útasï pápkʼandekuarhu jarhasti.
10 Ima enga xénchajka imeeri erachi jémbani, tʼíntskuarhu jarhasïndi ka no ma ambe jauati enga no sési úraaka.*
11 Joperu ima enga ikiakujka erachi jémbani, pápkʼandekuarhu jarhasti ka pápkʼandekuarhisï jámasïndi, ka no jamberi mítesti nanisï nirani jaki, jimboka pápkʼandekuarhu jámasïnga ka no ma ambe exesïndi.
12 Juchiiti sapiicha,* jíksïni karachixaka jimbokajtsï puáminhaantaskia chaari pekaduechani imeeri nombri jimbo.
13 Taatiicha, jíksïni karachixaka jimbokajtsï chá míteskia imani enga desde ueenakuarhutki jaka. Tumbiicha, jíksïni karachixaka jimbokajtsï chá andaskia Noambakitini. Sapiicha, jíksïni karachixaka jimbokajtsï chá míteskia Taatini.
14 Taatiicha, jíksïni karachixaka jimbokajtsï chá míteskia imani enga desde ueenakuarhutki jaka. Tumbiicha, jíksïni karachixaka jimbokajtsï chá uíuinhasï jarhaska ka jimbokajtsï seguiriixaka jakajkuni Tata Diosïiri uandakuani, ka ístujtsï andaskia Noambakitini.
15 Asï jáma je xénchani parhakpinini ka níjtu parhakpini anapu ambe. Ima enga xénchajka parhakpinini, no xénchasïndi Taatini.*
16 Jimboka ambe enga xáni jaka parhakpinirhu, ambe enga kuerpu tsitijka, ambe engaksï éskuecha xáni tsitijka exeni ka arhikuarhini jatsikuarhekua ambe jimbo, inde ambe no Taatiiriisti, sino parhakpini anapu ambeesti.
17 Ístu, parhakpini kʼamakurhiati ka ístu ambe engaksï parhakpini anapuecha xáni tsitijka; joperu ima enga újka ambe enga Tata Diosï uékajka, irekaati para méntkisï.
18 Sapiicha, tiempu kʼamakurhixatiia. Chájtsï kurhaaskia eska jurhaxaka ima enga ikiakujka Kristuni.* Ka iásïtki uánikuechaksï jarhastia engaksï ikiakujka Kristuni ka jimbochisï míteka eska tiempu kʼamakurhixakaia.
19 Imeechaksï ixú uérasti ka juchantsïni jingonksï jarhaspti, joperuksï no juchantsïni jingoniispti;* jimboka engaksï juchantsïni jingoniipiringa, juchantsïni jingonksï pakarapirindi. Joperuksï uérasti paraka mítekuarhipiringa eskaksï no iáminduecha juchantsïni jingoniiska.
20 Ima enga pímbinhasïika, chánksïni erakusti ka chájtsï sési míteska jurhimbikua ambe.
21 Jíksïni karachixaka no jimbokajtsï no míteska jurhimbikua ambe, sánderu sési, jimbokajtsï míteska ka jimboka chkuanderakua ambe no jurhimbikueriiska.
22 ¿Nésï chkuanderani jaki? ¿Andi no imeeski enga uandajka eska Jesúsi no jindeeska Kristu? Ísï jindeeti enga ikiakujka Kristuni:* ima enga no jakajkujka Taatini ka nijtu Uájpani.
23 Ima enga no jakajkujka Uájpani, no ma ambe jatsisti Taatini jingoni. Joperu ima enga uandajka eska jakajkusïnga Uájpani sési pájperasïndi Taatini jingoni.
24 Ka chájtsï jatsiska para seguiriini jarhani úni ambe engajtsï ueenani jámani kurhandika. Ka engajtsï seguiriini jauaka úni ambe engajtsï ueenani jámani kurhandika, ístujtsï seguiriini jauaka Uájpani jingoni jarhani ka ístu Taatini jingoni jarhani.
25 Ka ini ambejtsïnisï aiachiti ima: tsípikua para méntkisï.
26 Jíksïni ini ambe karachixaka, jimbokaksï jarhaska máru engaksïni uéjka támisï jánhastani.
27 Ka chánksïni Tata Diosï erakusti imeeri espiritu santu jimbo. Ka jimboka espiritu chánksïni jingoni jarhaska, nójtsï uétarhinchasïnga eskaksïni máteru nema jorhendani jauaka. Joperuksïni Tata Diosï indeni espiritu jimbo jorhendasïndi iámindu ambe, inde jurhimbitiisti ka no jámasïndi chkuanderani. Ísï jimbo, imani jingoni ja je ísï eskaksïni espiritu na jorhendaka.
28 Ísï jimbo juchiiti sapiicha,* imani jingoni ja je parakachi uaaka no sáni chéparini uandani jiáni enga ima xarhantaaka ka parachi no kʼuratseparini kéndikukuni jiáni enga ima ixú jauakia.
29 Chájtsï sési míteskia eska ima iámindu ambe sési úsïnga, ka ístujtsï míteska eska imeeri uájpeeska ima enga sési jámajka.
Notecha
^ O “uátsïtiicha”.
^ O “nemani engajtsïni uandapechejka”, “abogaduni ma”.
^ Ixú Jesúsinisï arhikuekani jati.
^ O “ermanuecha”.
^ O “enga téksarhutaraaka”.
^ O “uátsïtiicha”.
^ O “Taati no xénchasïndi imani”.
^ Griegu jimbo: “antikristu”.
^ O “joperuksï no ísïispti eska jucha”.
^ Griegu jimbo: “antikristu”.
^ O “uátsïtiicha”.
