Primeru Karakata Juanueri 3:1-24
3 ¡Exe je na engajtsïni xáni xénchajka Taati jimbokajtsïni arhisïnga eskachi imeeri uájpeeska!* Ka ísïisti, imeeri uájpeeskachi. Jimbojtsïnisï parhakpini anapuecha no míteti, jimbokaksï nótki mítexaka imani.
2 Juchiiti erachiicha* engaksïni ji xáni xénchajka, juchachi Tata Diosïiri uájpeeska, joperu nótki xarharaxati ambe engachi jindeuaka. Jimboka jiáni enga ima xarhantaaka, juchachi míteska eskachi ísïiuaka eska ima jimbokachi exeaka na enga jásïika ima.
3 Ka ima enga imani mintsikajka, pímbinhaxekuarhintasïndi jimboka ima pímbinhasïiska.
4 Ima enga pekadu ambe újka, no úni jarhasïndi ambe enga lei uandajka; pekadu jindeesti no úni ambe enga lei uandajka.
5 Ístu, chájtsï míteska eska ima jimbosï jupka parajtsïni pekaduechani pʼikurhiantani, ka ima no ma pekadu jukarasti.
6 Ima enga imani jingoni jaka, méntku no jámasïndi pekadu ambe niátani; ima enga pekadu ambe niátajka, no exexati imani ka nijtu míteni jaki.
7 Juchiiti sapiicha,* asï jurajku je eskaksïni nema támisï jánhastaaka. Ima enga sési jámajka, iámindu ambe sési úsïndi, ísï eska ima na iámindu ambe sési újka.
8 Ima enga pekadu ambe niátajka Noambakitiiriisti, jimboka Noambakiti méntku pekadu ambe niátaxaka desde ueenakuarhutki.* Ka Tata Diosïiri Uájpa jimbosï juti: para kʼamajkuni* ambe enga xáni úka Noambakiti.
9 Ima enga Tata Diosïiri uájpeeka no jámasïndi pekadu ambe niátani, jimboka seguiriixaka Tata Diosïiri espirituni* jatsini, ka no jámasïndi pekadu ambe niátani, jimboka Tata Diosïiri uájpeeska.
10 Arini ambe jimbo xarharasïndi né Tata Diosïiri uájpeeski ka né Noambakitiiri uájpeeski: ima enga no újka ambe enga sési jaka, no Tata Diosïiriisti, ka nijtu ima enga no xénchajka erachi jémbani.
11 Jimbokajtsï chá ini ambesï kurhandini jaka desde ueenakuarhutki: eskachi jatsiska para iáminduecha xénchperani;
12 ka nóchi ísï jámani eska Kaíni enga Noambakitiiriipka ka enga uándikupka ermanu jémbani. ¿Ka andisï uándikupi? Jimboka ima no sési ambe niátasïreenga, joperu ermanu jémba kʼóru sési jámasïreendi.
13 Erachiicha, engaksïni parhakpini anapuecha ikiacheaka, asï jáma je chérakuarheni.
14 Juchachi míteska eskachi uarhirixapka, joperu eskachi iásï tsípiti jarhaskia jimbokachi xénchaasïnga erachiichani. Ima enga no xénchpejka, útasï uarhirixati.
15 Ima enga ikiakujka erachi jémbani, uándikpiti máesti, ka chájtsï míteska eska ima enga uándikpini jámajka no uaaka jatsini tsípikua para méntkisï.
16 Ini ambe jimbochisï niáraka sési míteni néneeski xénchpeni: jimboka ima imeeri tsípikuani* íntspiska juchantsïni jimbo ka juchajtuchi jatsiska para íntspini juchaari tsípikuani* juchaari erachiichani jimbo.
17 Ka enga nema jatsikuarheaka ini parhakpini anapu ambe ka exeni eska erachi jémba uétarhinchaxaka, joperu no sáni uékani pʼamojkuni, ¿nénajtu uaa uandani eska xénchasïnga Tata Diosïni?
18 Juchiiti sapiicha,* ju je no jinijku uandani eskachi xénchpesïnga, sánderu sési, ju je úkuecha jingoni xarhatani eskachi mintsita jingoni xénchpesïnga.
19 Ísïchisï mítetini jauaka eskachi jurhimbikuarhu jarhaska ka juchaari mintsita sési mítetini jauati* eskajtsïni Tata Diosï xénchasïnga,
20 ka nájkirukajtsïni juchaari mintsita no sési pʼikuastani jauaka ambe ma jimbo, ju je miáni jarhani eska Tata Diosï sánderu kʼériiska eska juchaari mintsita ka eska méntku iámindu ambe míteska.
21 Juchiiti erachiicha engaksïni ji xáni xénchajka, engajtsïni juchaari mintsita no no sési pʼikuastani jauaka ambe ma jimbo, uaakachi no sáni chéparini kómarhini Tata Diosïni;
22 ka imajtsïnisï íntskujti ambe engachi jucha xáni kurhakujka, jimbokachi úxaka ambe enga ima juramujka ka ambe enga ima jaiapanhentajka.
23 Ka ini ambesï juramujti ima: eskachi mintsikaaka imeeri Uájpeeri nombrini enga jindeeka tata Jesukristu, ka eskachi iáminduecha xénchperaaka ísï eskajtsïni ima na juramuchika.
24 Ima enga újka ambe enga ima juramujka, imani jingoni jarhasïndi ka imajtu imani kʼuiripuni jingoni jarhasïndi. Ka indeni espirituni jimbo engajtsïni ima íntskuka, juchachi míteska eska ima juchantsïni jingoni jarhaska.
Notecha
^ Griegu jimbo: “Tata Diosïiri uájpeeska”.
^ O “ermanuecha”.
^ O “uátsïtiicha”.
^ O “desde iónisïia”. Indenisï arhikuekani jati jiáni enga ueenaka nóteru kurhajchania Tata Diosïni.
^ O “xerentani”.
^ Griegu jimbo: “Tata Diosïiri semiiani”. Semiia ma enga újka frutu jukani.
^ O “almani”.
^ O “almani”.
^ O “uátsïtiicha”.
^ O “ka jakajkutaraakachi juchaari mintsitani”.
