Primeru Karakata Juanueri 5:1-21
-
Mintsikani Jesúsini jarhuajpesïndi para andani parhakpinini (1 a 12)
-
Ísïsï jindeeti para xénchani Tata Diosïni (3)
-
-
Mintsikani eska kánikua marhuasïnga kómarhini (13 a 17)
-
Jingontku jámani ini parhakpini jimbo enga xáni no sési jánhaskuarhika (18 a 21)
-
“Iámu parhakpini Noambakitiiri jájki jimbo jarhasti” (19)
-
5 Ima enga jakajkujka eska Jesúsi Kristueska, Tata Diosïiri uájpeesti. Ka ima enga xénchajka Taatini, ístu xénchaasïndi imeeri uájpeechani.
2 Ísï jimbochisï míteka eskachi xénchaasïnga Tata Diosïiri uájpeechani: engachi xénchajka Tata Diosïni ka engachi újka ambe enga ima juramujka.
3 Jimboka ísïsï jindeeka para xénchani Tata Diosïni: eskachi uaaka ambe engajtsïni ima juramuchijka; ka no jukari úkua jukasti* ambe engajtsïni ima juramuchijka,
4 jimboka ima* enga Tata Diosïiri uájpeeka, andasïndi parhakpinini. Ka i ambejtsïnisï jarhuatajti parachi jucha andani parhakpinini: mintsikani.
5 ¿Ka nésï uaa andani parhakpinini? ¿Andi no imeeski enga mintsikajka eska Jesúsi Tata Diosïiri Uájpeeska?
6 Ísï jindeeti enga itsï ka iurhiri jimbo juka, tata Jesukristu; ka no itsï jimbojku, sino ístu iurhiri jimbo. Ka espiritu uandantasïndi eska i ambe ísïiska, jimboka espiritu jurhimbitiiska.
7 Jimbokaksï tanimueska engaksï uandajka eska i ambe ísïiska:
8 espiritu, itsï ka iurhiri, ka inde tanimu ambe májkueni ambeksï uandantasïndi.
9 Jucha jakajkusïnga ambe engaksï kʼuiripuecha uandantajka, joperu ambe enga Tata Diosï uandantajka, sánderu ambakiti ambeesti. Jimboka i ambesï uandantati Tata Diosï: ambe enga xáni uandantaka Uájpeeri ambe.
10 Ima kʼuiripu enga mintsikajka Tata Diosïiri Uájpani, imeeri mintsitarhu jatsisti ambe enga Tata Diosï jorhendaka. Ima kʼuiripu enga no mintsikajka Tata Diosïni, ísï uandani jarhasïndi enajki Tata Diosï chkuanderani japirini, jimboka no mintsikasïnga ambe enga xáni uandantaka Tata Diosï imeeri Uájpeeri ambe.
11 Ka i ambesï uandantati: Tata Diosïjtsïni íntskusti tsípikua para méntkisï ka imeeri Uájpani jimbochisï intsïnhajka indeni tsípikuani.
12 Ima enga Uájpa jingoni jaka, intsïnhaati indeni tsípikuani; ima enga no Tata Diosïiri Uájpa jingoni jaka, no intsïnhaati indeni tsípikuani.
13 Jíksïni ini ambe karachixaka parajtsï chá mítetini jarhani eskajtsï intsïnhaaka tsípikua para méntkisï, chá engajtsï mintsikajka Tata Diosïiri Uájpeeri nombrini.
14 Ka juchachi mintsikasïnga imani, jimbokachi mítetixaka eskajtsïni ima kurhajchasïnga ambe uéjkichi kurhakuni, joperu kʼóru jatsisti para terukuntani imani ambe jingoni enga ima uéjka.
15 Ka engachi mítetini jaka eskajtsïni ima kurhajchasïnga ambe uéjkichi kurhakuni, ístuchi mítetixaka eskachi intsïnhaaka ambe engachi kurhakuka, jimbokachi imanisï kurhakuka.
16 Enga nema exeska imeeri erachi jémbani* pekadu ma niátani jarhani, joperu inde pekadu no uarhikuarhu pájpeni, eska kómarhijpikuaka ka Tata Diosï íntskuati tsípikua. I ambe jindeesti para imeecha engaksï no niátajka imani pekaduni enga uarhikuarhu pájpejka. Jimboka jarhaska pekadu ma enga uarhikuarhu pájpejka, joperu indeni pekadu jimbo kʼóru no arhixaka eska kómarhijpikuaka.
17 Iámindu ambe enga no sési jaka, pekaduesti. Joperu jarhasti pekadu ma enga no uarhikuarhu pájpejka.
18 Juchachi míteska eska no ma Tata Diosïiri uájpa jarhaska enga pekadu ambe niátajka, sánderu sési, ima enga Tata Diosïiri uájpeeka* kuájchakusïndi* ka Noambakiti méntku no úsïndi pʼárhini.*
19 Juchachi míteska eskachi Tata Diosïiriiska, joperu iámu parhakpini Noambakitiiri jájki* jimbo jarhasti.
20 Ka juchachi míteska eska Tata Diosïiri Uájpa jurhaska ka eskajtsïni jánhaskataraska* parachi jucha úni míteni imani enga sési jimboeka. Ka juchachi imani jingoni jarhaska enga sési jimboeka, imeeri Uájpani jimbo enga jindeeka tata Jesukristu. Imasï jindeeti Tata Diosï enga sési jimboeka ka tsípikua para méntkisï.
21 Juchiiti sapiicha,* xéparini jáma je diosï úkatechani jingoni.*
Notecha
^ O “no kʼuetsapiti ambeesti”.
^ Griegu jimbo: “ambe”.
^ O “ermanu jémbani”.
^ Ixú tata Jesukristuni arhikuekaxati, enga jindeeka Tata Diosïiri Uájpa.
^ O “kuásïndi”.
^ O “jupikani”.
^ O “juramukua”.
^ O “kurhangutaraska”.
^ O “uátsïtiicha”.
^ O “sïpakuarhikua je diosï úkateechani”.
