Primeru Karakata para Korintu anapuecha 1:1-31
-
Ueenasïndi uandajpaani (1 a 3)
-
Pablu diosmaiamukua arhisïndi Tata Diosïni Korintu anapuechani jimbo (4 a 9)
-
Pablu kurhakuasïndi eskaksï iáminduecha májku jauaka (10 a 17)
-
Kristusï xarhatajti na enga xáni uinhapitiika Tata Diosï ka ístu na enga xáni jánhaskatiika (18 a 25)
-
Arhikuarhini jimbokachi míteska Tata Diosï Jeobani (26 a 31)
1 Ji Pablu, erakunhaska para Kristu Jesúsiiri apostoliini jimboka Tata Diosï ísï uékaska, ka juchaari erachi* Sóstenesi jingoni jarhaska.
2 Ji karakuxaka Tata Diosïiri kúnguarhikuani enga Korintu jaka, chánksïni engajtsï pímbinhajkunhantaka parajtsï májku úkuarhini Kristu Jesúsini jingoni ka engajtsï erakunhaka parajtsï pímbinhasïini iápurisï anapuechani jingoni engaksï ístu mintsikani jaka juchaari Tata Jesukristueri nombrini, ima jindeesti imeecheeri Tata ka ístu juchaari:
3 Ji kómarhisïnga eskaksïni Tata Diosï, enga jindeeka juchaari Taati, ka ístu Tata Jesukristu, kánikua kóndentaaka* ka eskaksïni jarhuataaka parajtsï pínandikua jatsini.
4 Ji méntkisï diosmaiamukua arhisïnga juchiiti Tata Diosïni chánksïni jimbo, jimbokaksïni ima kánikua kóndentaska Kristu Jesúsini jimbo.
5 Jimbokajtsï chá májku úkuarhintaska Kristu Jesúsini jingoni, Tata Diosïksïni iámindu ambe íntskusti, jarhuatastiksïni parajtsï chá sési uandantani Tata Diosïiri uandakuani ka ístu parajtsï sési míteni Tata Diosïiri uandakuani,
6 imaksïni jarhuatasti parajtsï chá uíuinhasï jarhani engajtsï ísï aiangunhaka Kristueri ambe.
7 Ísï jimbo, chájtsï no ma ambe kueratanchaxaka engajtsï jamberi seguiriini jaka tsípikua jingoni erokuarhini eska juchaari Tata Jesukristu xarhantaaka.
8 Ka imajtuksïni jarhuataati parajtsï chá uíuinhasï jarhani ka parajtsï chá no ma ambe kʼamanharhitanhantani ima jurhiatikua enga juuaka juchaari Tata Jesukristu.
9 Tata Diosï mintsinharhikuesti. Imaksïni erakusti parajtsï chá imeeri Uájpa jingoni jarhani,* enga jindeeka juchaari Tata Jesukristu.
10 Ka iásï erachiicha, jíksïni kurhachexaka juchaari Tata Jesukristueri nombri jimbo eskajtsï iáminduecha májku ambe uandaaka ka eskajtsï no jámaaka táchanisï jámani, sánderu sési, eskajtsï iáminduecha májku eratsekua jatsiaka ka eskajtsï májkueni eratseaka iáminduecha.
11 Jimboksïnisï ísï arhini jaka juchiiti erachiicha, jimbokajtsïni Kloeri kʼumanchikuarhu anapuecha máru aianguska eskajtsï chá no sési arhirperaxaka.
12 Ísï jimboksïnisï ísï arhini jaka jimbokajtsï chá mámaru ambe uandaxaka. Márujtsï uandasïnga: “Ji Pablueri chúxapatiiska”. Máteruechajtsï uandasïnga “Ji Apolosiiri chúxapatiiska”, ka máteruechajtsï uandasïnga: “Ji Sefasiiri* chúxapatiiska”, ka máteruechajtsï uandasïnga: “Ji Kristueri chúxapatiiska”.
13 ¿Andi Kristu arhukurhitixaki? ¿Andi Pablu cháparhatanhaski chánksïni jimbo? ¿O chá Pablueri nombri jimbo itsï atanhaski?*
14 Diosmaiamukua arhisïnga Tata Diosïni engaksïni ji no ma chánksïni itsï ataka, Krispuntku ka Gaiuni,
15 paraka no nema uandaaka eskajtsï chá juchiiti nombri jimbo itsï atanhaska.
16 Ísïisti, ístuni itsï ataaska Estéfanasiiri kʼumanchikuarhu anapuechani. Indeechantku ka nóteruni nemani miásïngia itsï atani.
17 Kristurini no axasti parani itsï ataani kʼuiripuechani, sánderu sési, axastireni parani aianhpini jámani ambakiti aianhperakuani ka no imani uandakuechani úrapariani engaksï ima kʼuiripuecha uandajka engaksï jánhaskatiika, jimboka engani ísï úpiringa, méntku no marhuapirindi enga Kristu ísï cháparhatanhaka chkarirhu ma.*
18 Ka para imeecha engaksï kʼamajkunhaaka,* ísku ambe máesti inde ambe enga aianhpinhani jaka, eska Kristu uándikunhaska chkarirhu ma, joperu para jucha engachi pʼímutanhantani jaka, inde aianhperakua xarhataxati na enga xáni uinhapitiika Tata Diosï.
19 Jimboka ísï karakata jarhaska: “Kʼamajkuaka imani ambe engaksï xáni uandajka jánhaskani imeecha engaksï jánhaskatiika ka no jaiapanhentaaka* ambe engaksï xáni míteka imeecha engaksï kánikua jorhenaka”.
20 Ini tiempu* jimbo, ¿nani jarhaski ima enga kánikua jánhaskatiika? ¿Nani jarhaski ima enga sési míteka ambe enga lei uandajka?* ¿Nani jarhaski ima enga tsitijka arhistatspini? ¿Andi no úski Tata Diosï eska méntku no marhuapiringa ambe engaksï parhakpini anapuecha xáni jánhaskajka?
21 Parhakpini anapu kʼuiripuechaksï no niárasti míteni Tata Diosïni, jimbokaksï sési xékuarhisïnga engaksï xáni jánhaskatiika, joperu Tata Diosï xarhatasti eska kánikua sánderu jánhaskatiiska enga ísï pʼímutantaaka kʼuiripuechani engaksï jakajkuka ambe engachi uandantani jaka, ini ambe engaksï kʼuiripuecha ísï exejka enajki ísku ambe máe.
22 Jimbokaksï judiuecha uékasïnga milagruechani exeani ka grieguechaksï uékasïndi sánderu uánikua ambe míteni.
23 Joperu juchachi Kristueri ambe uandantasïnga, ima enga chkarirhu ma cháparhatanhaka. Judiuechaksï no sési exesïndi ini ambe* ka no judiuechaksï ísï exesïndi enajki ísku ambe máe.
24 Joperu para imeecha engaksï erakunhaka, na uéjkiksï judiueni o griegueni, Kristusï xarhatajti na enga xáni uinhapitiika Tata Diosï ka ístu na enga xáni jánhaskatiika.
25 Jimboka Tata Diosïiri ambe engaksï kʼuiripuecha ísï exejka enajki ísku ambe máe, inde ambe sánderu jánhaskatiisti ka eskaksï kʼuiripuecha, ka Tata Diosïiri ambe engaksï kʼuiripuecha ísï exejka eska no uinhapitiiska, sánderu uinhapitiisti eskaksï kʼuiripuecha.
26 Erachiicha, chá mismu exekuarhi je, chá engajtsï erakunhaka: nójtsï uánikua erakunhaska engajtsï kánikua jánhaskatiika, ísï eskaksï parhakpini anapuecha na exejka, nijtujtsï uinhapitii ka nijtujtsï ambakiti kʼumanchikuarhu ma anapue.*
27 Sánderu sési, Tata Diosï imani ambe erakusti engaksï parhakpini anapuecha ísï exejka enajki ísku ambe máe, para imeechani kʼuratsetaani engaksï jánhaskatiika. Tata Diosï imani ambe erakusti engaksï parhakpini anapuecha ísï exejka enajki no uinhapi para imani ambe kʼuratsetani enga uinhapitiika.
28 Tata Diosï imani ambe erakusti engaksï parhakpini anapuecha ísï exejka enajki no ma ambe máe ka imani ambe engaksï no jaiapanhentajka, imani ambe enga méntku no marhuajka, para kʼamajkuni indeni ambe enga kánikua jukaparhakueka para parhakpini anapuecha,
29 paraka no nema uaaka arhikuarhini* Tata Diosïni japarini.
30 Tata Diosïni jimbochisï újka májku úkuarhintani Kristu Jesúsini jingoni, ima xarhatasïndi na enga xáni jánhaskatiika Tata Diosï ka ístu na enga iámindu ambe sési újka. Jesúsini jimbo, kʼuiripuechaksï úsïndi pímbinhasï jarhani, ka jimboka ima euajpiantaska kʼuiripuechani, imaksï nóteru jántspiriistia,
31 paraka ísï úkuarhiaka eska na karakata jaka: “Ima enga arhikuarhijka, eska arhikuarhiaka jimboka míteska Tata Diosï Jeobani”.
Notecha
^ O “ermanu”.
^ Exe je Glosario, Tata Diosï kánikua kóntpintasïndi.
^ O “márku jarhani”.
^ Enga ístu arhinheenga Pedru.
^ Exe je Glosario, itsï atakuarhini; itsï atani.
^ Exe je Glosario, chkari enga jindeeka para no sési nitamakuarhini.
^ O “engaksï uarhini jaka”.
^ O “támu peeraaka”.
^ Exe je Glosario, tiempu.
^ Griegu jimbo: “karari”.
^ O “téksarhutasïndi ini ambe jimbo”.
^ O “nijtujtsï juramutiicheeri uájpee”.
^ O “jatsijpakuarhini”.
