Primeru Karakata para Korintu anapuecha 11:1-34
11 Májkueni jáma je eskani ji, ísï eskani ji na májkueni jámajka eska Kristu.
2 Jíksïni sési arhixaka jimbokajtsïni chá méntku miáni jarhasïnga ka ísïmindujtsï úxaka eskaksïni ji na arhistachika.
3 Joperuni ji uékasïnga eskajtsï chá mítetini jauaka eska Kristu orhejtsïkuasïnga iámindu tatakeechani* ka eska tataka orhejtsïkusïnga nanakani ka eska Tata Diosï orhejtsïkusïnga Kristuni.
4 Ima tataka enga ójtsïtini kómarhijka, o uandantani Tata Diosïiri ambe, kʼuratsetani jarhasïndi imani enga orhejtsïkujka,
5 joperu enga nanaka ma no ójtsïtini kómarhiaka o uandantani Tata Diosïiri ambe, kʼuratsetani jarhasïndi imani enga orhejtsïkujka jimboka ísïiska enajki iámu jauiri pʼiki.
6 Ísï jimbo, enga nanaka ma no ójtsïaka, jimajkani jatsisti para iámu kuinakuarhini. Joperu enga nanaka kʼuratseaka iámu kuinakuarhini o iámu jauiri pʼirani, jimajkani jatsisti para ojtsïni.
7 Tataka no jatsisti para ójtsïni, jimboka ima ísï kueraanhaska eska Tata Diosï na jásïika ka Tata Diosï kʼéri ambe arhinhasïndi imani jimbo, ka tataka kʼéri ambe arhinhasïndi nanaka jimbo.
8 Jimboka Tata Diosï no nanakeeri kuerpuni úraska para tatakani kueraani, sánderu sési, tatakeeri kuerpunisï úrati para nanakani kueraani.
9 Jimajkani tataka no kueraanhasti nanakani jimbo, sánderu sési, nanakasï kueraanhati tatakani jimbo.
10 Jimajkani, ánjeliichani jimbo, nanaka jatsisti para ójtsïni para xarhatani eska kurhajchasïnga* uámbani.
11 Joperu Tateeri kúnguarhikuani jimbo, nanaka no jindeepirindi enga no tatakani jimboepiringa ka tataka no jindeepirindi enga no nanakani jimboepiringa.
12 Jimboka ísï eska na úranhaka tatakeeri kuerpu para nanaka kueraanhani, tatakajtu niárasïndi nanakani jimbo andajpenuni. Joperu Tata Diosïsï kueraati iámindu ambe.
13 Nájtsï exesïni chá ini ambe: ¿sési jarhaski eska nanaka ma no ójtsïaka para kómarhini Tata Diosïni?
14 Jimboka ísï eskaksï kʼuiripuecha na úkata jaka, kʼuratsekua ambeesti eska tataka ma jauiri iórhati jukaaka,
15 joperu nanaka ma kasïpesïndi jauiri iórhati jingoni. Jimbosï Tata Diosï jauiri iórhati jingoni kueraati nanakani para ima ójtsïni.
16 Ka nájkiruka nema no sési exeaka ini ambe, jucha kʼóruni sési exesïnga ka ístuksï Tata Diosïiri kúnguarhikuecha.
17 Jimboka engajtsï chá tánguarhintajka, masijtsï úsïnga no sési útsperani ka nójtsï jarhuajperasïnga, jimboksïnisï no újka sési arhini.
18 Paraksïni ueenani arhini, aiangustijtsïni eskajtsï chá no úsïnga sési pájperani engajtsï tánguarhintajka kúnguarhikuani jingoni ka ji ísï exesïnga enajki ísïi.
19 Jimbokaksï kúnguarhikuarhu jauaka kʼuiripuecha engaksï uékaaka táchanisï tánguarhini,* paraka ístu sési xarharaaka neechanisï jaiapanheantajki Tata Diosï.
20 Engajtsï chá tánguarhintajka, nójtsï tánguarhintasïnga parajtsï sáni májku kʼéri arhani Tateeri Senani,
21 jimbokajtsï tʼuini táchanisï atsïkuarhisïngia, ka engajtsï arhani jámajkia, ma kʼarhimani jarhasïndi ka máteru tʼuini kauirini jarhasïndia.
22 ¿Andi nójtsï jatsikuarheski kʼumanchikua ma parajtsï jima tʼirekuarhini ka itsïmakuarhini? ¿Ojtsï ísï jámaxaki jimbokajtsï no jaiapanhentasïnga Tata Diosïiri kúnguarhikuani ka jimbokajtsï uékasïnga kʼuratsetaani imeechani engaksï no ma ambe jatsikuarheka? ¿Ka ambeksïnisï arhiaia? ¿Eskajtsï sési úxaka? Nóksïni uaaka sési arhini engajtsï ísï jámani jaka.
23 Jimbokaksïni jíjtu májkueni arhistachiska ísï eskarini Tata na arhistachika jíndeni: eska ima chúri enga traisionariinhapiringa, Jesúsi* pʼíkuspti kurhinda ma
24 ka enga na diosmaiamukua arhipkia Tata Diosïni, arhukuspti kurhindani ka uandaspti: “I kurhinda arhikuekasïndi juchiiti kuerpu enga chánksïni jimbo íntspinhaka. Ú je ini ambe jíndeni miántaparini”.
25 Engaksï na tʼirepkia, májkueni úspti kopa jingoni ka uandaspti: “I kopa arhikuekasïndi jimbanhi pakatperakua enga juchiiti iurhirini jimbo ueenaka jarhani. Méni engajtsï itsïmaaka ini kopa jimbo, jíndentsïni miánta je”.
26 Jimboka méni engajtsï auaka ini kurhindani ka ístu méni engajtsï itsïmaaka ini kopa jimbo, chájtsï uandantani jauaka Tateeri uarhikuani asta jiáni jamberi enga ima juuaka.
27 Ísï jimbo, enga nema auaka Tateeri kurhindani ka itsïmani imeeri kopa jimbo, ka jini no sésikua jatsini, no sési úni jauati jimboka no janhanharhini jauaka Tateeri kuerpuni ka nijtu imeeri iurhirini.
28 Ísï jimbo, eska orheta exekuarhiaka ka enga na sési mítetini jauakia eska uaaka ísï úni, jimajkani kʼóru uaatia arhani kurhindani ka itsïmani indeni kopa jimbo.
29 Jimboka enga nema arhani jaka ka ístu itsïmani jarhani ka jini no kurhanguni eska inde ambe Tateeri kuerpunisï arhikuekajka, jandiajku jirinhakuarhixati eska kastigarinhaaka* enga ísï arhani jaka ka itsïmani.
30 Jimbojtsïsï uánikua jaka engajtsï chkerini jaka ka engajtsï pʼamenchani jaka, ka ístuksï uánikua jarhasti engaksï uarhikia.*
31 Joperu engachi jucha sési exepiringa nénachisï jámani jaki, nóchi jusgarinhapiringa.
32 Joperu engajtsïni Tata Diosï Jeoba jusgarijka, ístujtsïni arhistachisïndi parachi no parhakpini anapuechani jingoni kastigarinhani.
33 Ísï jimbo, juchiiti erachiicha,* erokpera je iáminduecha parajtsï sáni márku arhani indeni tʼirekuani.
34 Enga nema kʼarhimani jauaka, eska imeo atsïkuarhiaka ambe ma parajtsï no kastigarinhani engajtsï tánguarhintatini jauaka. Joperu jarhasti máteru ambe, ka jiánksïni arhiakia engani na niáraakia chánksïni jingoni.
Notecha
^ Ini kapitulu jimbo, uandakua pʼurhe jimbo “orhejtsïkuni” griegu jimbo jindeesti “éjpu”.
^ O “eska janhanharhisïnga”.
^ O “máteru ambe jorhentpini”.
^ Griegu jimbo: “Tata Jesúsi”.
^ O “eska jusgarinhaaka”.
^ Ixú no arhikuekasïndi eskaksï meru uarhispkia, sánderu sési, eskaksï nóteru sési pájperasïreengia Tata Diosïni jingoni.
^ O “ermanuecha”.
