Primeru Karakata para Korintu anapuecha 12:1-31
12 Erachiicha,* ji uékasïnga eskajtsï chá sési mítetini jauaka ambe enga Tata Diosï intsïmpijka.
2 Chájtsï sési mítetixaka eska engajtsï nótki jakajkutiipka,* chájtsï diosï úkateechani kómarhiasïreenga, diosï úkateechani engaksï no újka uandani ka chájtsï nani uéjkisï chúxapaasïreenga.
3 Ka jimbosïni uéjka eskajtsï chá mítetini jauaka eska Tata Diosïiri espiritu no nemani uandaraaka: “¡Jesúsi no ambakisti!” ka eska enga no espiritu santu jimboeuaka, no nema uaati uandani: “¡Jesúsi Tateesti!”.
4 Ísïisti, espiritu santu mámaru ambe intsïmpisïndi;
5 ka mámaru ambe jarhasti para úni para Tata Diosïni marhuakuni, joperu ambe enga xáni únhajka jindeesti para Tata,
6 ka espiritu santu úsïndi eskaksï kʼuiripuecha mámaru ambe uaaka, joperu májkusï Tata Diosï jati enga újka eskaksï kʼuiripuecha ísï uaaka.
7 Joperu sésimindu xarharasïndi na enga espiritu santu jarhuajpejka, ka Tata Diosï mándani kʼuiripuni íntskusïndi espiritu santu para máteru kʼuiripuechani jarhuataani.
8 Espiritu santuni jimbo, kʼuiripu ma intsïnhasïndi uinhapikua para jánhaskakua jingoni uandani; ka máteru intsïnhasïndi uinhapikua para jorhendaani imeechani engaksï no míteka;
9 ka ístu indeni espiritu jimbo, máteru kʼuiripu niárasïndi sánderu mintsikani; ka ístu indeni espiritu santuni jimbo, máteru kʼuiripu intsïnhasïndi uinhapikua para ambakeraantani pʼamenchatiichani;
10 ka máteru intsïnhasïndi uinhapikua para milagruechani uaani;* máteru para uandantani Tata Diosïiri ambe; máteru para úni míteni sini Tata Diosïni jimboeski o nómbe inde ambe enga jorhentpinhani jaka; ka máteru para mámaru jásï idioma jimbo uandani ka máteru para máteru idioma jimbo peentani ambe enga uandanhajka.
11 Joperu espiritu santusï újti eskaksï kʼuiripuecha iámindu ini ambe uaaka, ka ísï eska espiritu santu na uékaaka, uinhapikua íntskusïndi mándani kʼuiripuni.
12 Kuerpu uánikua ambe jukasti, joperu nájkiruka uánikua ambe jukaka, májku kuerpuesti ka ísïmindu jindeesti Kristu.
13 Jimboka iámindu jucha, judiuecha o grieguecha, jucha engachi jántspiriika ka engachi no jántspiriika, májku espiritu santu jimbochi itsï atanhaska* parachi jindeeni májku kuerpu ka iáminduechachi intsïnhaska indeni espirituni.
14 Ka kuerpu uánikua ambe jukasti, no májku ambe.
15 Enga jantsiri uandapiringa: “Ji no kuerpurhu anapueska jimbokani no jájkiiska”, jiájkani, ¿ísï jimbo nóteru kuerpurhu anapuepirinia?
16 Ka enga kutsïkua uandapiringa: “Ji no kuerpurhu anapueska jimbokani no éskueska”, jiájkani, ¿ísï jimbo nóteru kuerpurhu anapuepirinia?
17 Enga iámu kuerpu éskuepiringa, jiájkani, ¿nénachi kurhaapirini? Ka enga iámu kuerpu kutsïkuepiringa, jiájkani, ¿nénachi sïpirupirini?
18 Joperu Tata Diosï mámaru ambe jatsikusti kuerpuni ísï eska ima na sési exeka.
19 Enga iámindu ambe májku ambeepiringa, ¿úpirini kuerpu máeni?
20 Joperu nájkiruka kuerpu uánikua ambe jukaka, májku kuerpuesti.
21 Éskua no uaati arhini jájkini, “Jíkeni no uétarhinchasïnga”, nijtu éjpu újki arhiani jantsiriichani “Jíksïni chánksïni no uétarhinchasïnga”.
22 Sánderu sési, inde ambe enga ísï xarharajka enajki no marhuajki para kuerpu, inde ambejtu uétarhisïndi,
23 ka inde ambe engachi jucha ísï exejka enajki no káni sési xarharajki, indeni ambechisï sánderu sési xukutajka paraka sánderu sési xarharaaka inde ambe engajtsïni kʼuratsetajka,
24 joperu inde ambe enga sánderu sési xarharajka juchaari kuerpurhu, nóteru ambe ma uétarhinchasïndia para sési xarharani. Joperu Tata Diosï ísï ústi juchaari kuerpuni paraka sánderu sési xarharaaka inde ambe enga no káni sési xarharajka
25 paraka kuerpurhu anapu ambe no táchanisï jámapiringa, sánderu sési, paraksï iáminduecha jarhuajperani.
26 Enga kuerpu nani pʼamerhikuarhini jarhajka, iámindu kuerpurhu anapu ambe no sési pʼikuarherasïndi. Joperu enga kuerpu nani sési xarharajka, iámu kuerpurhu anapu ambe sési pʼikuarherasïndi.
27 Ísï jimbo, chájtsï jindeeska Kristueri kuerpu, ka mándani arhini, ma ambeeskajtsï imeeri kuerpurhu.
28 Ka Tata Diosï ísï peeraasti kʼuiripuechani kúnguarhikuarhu: orheta, apostoliichaksï jarhasti; tátsekua Tata Diosïiri uandakua páriicha;* tátsekua jorhentpiriicha; tátsekua imeecha engaksï milagruechani uaajka;* tátsekua imeecha engaksï uinhapikua intsïnhaka para ambakeraantani pʼamenchatiichani; imeecha engaksï jarhuajpejka; imeecha engaksï sési orhejtsïkpijka; imeecha engaksï mámaru jásï idioma uandajka.
29 Nóksï iáminduecha apostoliisti, nijtuksï iáminduecha jindee Tata Diosïiri uandakua páriicha, nijtuksï iámindu jorhentpijki, nijtuksï iámindu milagruechani uaajki,* ¿a no?
30 Nóksï iáminduecha intsïnhasti uinhapikua paraksï ambakeraantani pʼamenchatiichani, nijtuksï iáminduecha mámaru jásï idioma uandajki ka nijtuksï iáminduecha újki máteru idioma jimbo peentani ambe enga uandanhajka,* ¿a no?
31 Ísï jimbo, méntku jánguarhintani ja je parajtsï sánderu ambakiti ambe intsïnhani. Joperu sánderu ambakiti xanharu ma jarhasti engaksïni ji exeraaka.
Notecha
^ O “Ermanuecha”.
^ Griegu jimbo: “engajtsï máteru ireteecharhu anapuepka”.
^ O “para kʼéri ambe úni”.
^ Exe je Glosario, itsï atakuarhini; itsï atani.
^ O “profeteecha”.
^ O “engaksï kʼéri ambe újka”.
^ O “kʼéri ambe újki”.
^ O “nijtuksï iáminduecha újki traduktoriini”.
