Primeru Karakata para Korintu anapuecha 14:1-40
14 Seguirii je uékaani kʼuiripuechani, joperu ístu kánikua jánguarhinta je paraksïni Tata Diosï úni intsïmbini ambe ma, ka sánderu jánguarhinta je parajtsï sésikua intsïnhani parajtsï chá uandantani ambe enga Tata Diosï uandajka.
2 Jimboka ima enga máteru idioma jimbo uandajka no kʼuiripuechanisï uandontskuarhekuani jarhajti, sino Tata Diosïni, jimboka no nema kurhangukuni jarhasïnga nájkiruka espiritu santu jimbo uandantani jarhajka indeni ambe enga Tata Diosïiriika.*
3 Joperu ima enga uandantajka ambe enga Tata Diosï uandajka, jarhuataasïndi máteruechani, uinhaperaantasïndi ka sési pʼikuastaantasïndi jimboka sési ambe arhiasïnga.
4 Ima enga máteru idioma jimbo uandajka, imajkusï jarhuakurhini jarhajti, joperu ima enga uandantajka ambe enga Tata Diosï uandajka, iámu kúnguarhikuarhu anapuechani jarhuataasïndi.
5 Ji uékapiringa eskajtsï iáminduecha mámaru jásï idioma jimbo uandapiringa, joperu ji ísï exesïnga eska sánderu sési jarhaska eskajtsï chá uandantaaka ambe enga Tata Diosï uandajka, jimboka Tata Diosïiri uandakua pári* ma sánderu kʼéri ambeesti eska ima enga mámaru jásï idioma jimbo uandajka. Joperu kʼóru sési japirindi enga, ima enga mámaru jásï idioma jimbo uandajka, úpiringa uandani ambesï arhikuekani jaki* para úni jarhuataani iámindu kúnguarhikuarhu anapuechani.
6 Joperu erachiicha,* ¿andi jíksïni jarhuatapirini engaksïni jimintku niárachepiringa ka engaksïni ueenapiringa mámaru jásï idioma jimbo uandontskuarhechini? Paraksïni ji jarhuatani, jatsipiringa paraksïni aianguni ambe engareni Tata Diosï exeraka, ambe engareni mítetaraka, ambe enga ima uandajka o ambe engareni jorhendaka.
7 Májkueni úkuarhisïndi kústatarakua ambe jingoni komueska flauta o arpa jingoni. Joperu enga nema ísku no nani máru kústani jauaka flautani o arpani, jiájkani, ¿nénajtu mítekuarhia ambesï kústani jaki?
8 Ka enga nema no káni sési kústapiringa trompetani, jiájkani ¿né chánhatakuarhepirini para nirani uarhipeni?
9 Májkueniisti, ¿nénaksïni uaa kʼuiripu ma kurhanguchini engajtsï chá imani uandakuechani uandauaka engaksï no sóntku kurhangukuarhijka? Chájtsï ísku jatini uandani japiringa.
10 Parhakpinirhu, kʼuiripuechaksï mámaru jásï idioma jimbo uandasïndi ka iáminduechaksï kurhangukuarhisïndi.
11 Joperu engani ji no kurhanguaka ambe enga uandanhani jaka, ima enga uandani jaka ísïrini exeati enajkini ji uérakua anapue ka jíjtuni májkueni exeaka imani enga uandani jaka.
12 Ka chájtu májkueni. Chájtsï tsitisïnga jatsini indeni ambe enga espiritu santu intsïmpijka, ísï jimbo, kánikua jánguarhinta je indeni ambe jatsini enga jarhuatauaka kúnguarhikuarhu anapuechani.
13 Ísï jimbo, ima enga máteru idioma jimbo uandajka, eska kómarhiaka Tata Diosïni para úni uandantani ambesï arhikuekani jaki.*
14 Jimboka engani ji máteru idioma jimbo kómarhini jauaka, espiritu santueri intsïmperata jimbosïni kómarhini jauaka, no jísïni kómarhini jauaka jimbokani ji no kurhangusïnga ambe engani uandani jaka.
15 Jiájkani, ¿nénachi jámaa? Espiritu santueri intsïmperata jimbosïni kómarhiaka, joperuni ístuni jatsiska para kurhanguni ambesïni kómarhini jaki. Espiritu santueri intsïmperata jimbosïni pirekuaka Tata Diosïni, joperuni ístu jatsiska para kurhanguni ambe engani pirekuni jaka.
16 Joperu engari tʼu espiritu santueri intsïmperata jimbo pirekuni jauaka Tata Diosïni, jiájkani ima kʼuiripu enga chánksïni jingoni jaka ka enga kurhaani jaka engari tʼu diosmaiamukua arhini jaka Tata Diosïni, ¿nénajtu uaa uandani “Eska ísï úkuarhiaka” ka jini no jamberi kurhanguni jarhani amberisï uandani jaki tʼu?
17 Kánikua sési jarhasti na engari diosmaiamukua arhini jaka Tata Diosïni, joperuri no jarhuataxaka máteru kʼuiripuni.
18 Ji diosmaiamukua arhisïnga Tata Diosïni jimbokani ji sánderu mámaru jásï idioma jimbo uandasïnga eska chá.
19 Joperu kúnguarhikuarhu, ji sánderuni sési exesïnga sinko uandakuechani uandaani engaksï kurhangukuarhiaka parani úni máteruechani jorhendaani ka eskani 10 mili uandakuechani uandaani máteru idioma jimbo ka nóksï jamberi kurhangukuarhini.
20 Erachiicha, asï jáma je ísï eratseni eskaksï sapiicha. Sánderu sési, ísï jáma je eskaksï sapiicha engaksï no míteka no sési ambe úni, joperu ísï eratsi je eskaksï kʼératiicha.
21 Ísï karakata jarhasti Leirhu: “‘Ji imani kʼuiripuechani uandarauaka engaksï mámaru jásï idioma jimbo uandajka ka engaksï uérakua anapueka parani uandajpaani ini iretarhu anapuechani, joperu nájkirukani ísï uaaka, indejtsïni no kurhajchaati’, ísï uandasïndi Tata Diosï Jeoba”.
22 Ísï jimbo, enga kʼuiripu ma mámaru jásï idioma jimbo uandajka, jindeesti para no jakajkutiichani jakajkutaraani ka no imeechani engaksï jakajkutiikia. Joperu ambe engaksï Tata Diosïiri uandakua páriicha uandantajka, jindeesti para jakajkutiichani jorhendaani ka no imeechani engaksï no jakajkutiika.
23 Ísï jimbo, engaksï iámindu kúnguarhikuarhu anapuecha tánguarhintatini jauaka ka iáminduechaksï mámaru jásï idioma jimbo uandani jarhani, ka jimajkisï niárani kʼuiripu ma o no jakajkuti ma, ¿andi indeksï no uandaa eskajtsï chá loku jarhaska?
24 Joperu engajtsï iáminduecha uandantani jauaka ambe enga Tata Diosï uandajka, ka jimajkisï niárani no jakajkuti ma o kʼuiripu ma, ima pʼíkukuarhintaati ka míteati eska no sési ambe úxaka ka ísï pʼikuarheraati enajkiksï iáminduecha mítia ambe enga úni jaka.
25 Ka jimboka mítekuarhiaka ambe enga jískakata jatsika imeeri mintsitarhu, ima kʼuiripu tinguikuatseati ka kómarhiati Tata Diosïni ka uandaati: “Sési jimbo Tata Diosï chánksïni jingoni jarhasti”.
26 Jimajkani erachiicha, ¿nénachi jámaa? Engajtsï chá tánguarhintajka, ma pirekusïndi Tata Diosïni, máteru jorhentpisïndi, máteru uandantasïndi ambe enga Tata Diosï exeraka, máteru mámaru jásï idioma jimbo uandasïndi, ka máteru, máteru idioma jimbo peentasïndi ambe enga uandanhajka. Ú je iámindu ambe parajtsï iáminduecha jarhuajperani.
27 Ka engaksï jaka máru engaksï máteru idioma jimbo uandajka, eskaksï tsimani o tanimu kʼuiripujku uandaaka joperu eskaksï mándani arhini uandaaka, ka máteru nema jatsisti para uandantani ambeksïsï arhikuekani jaki.*
28 Joperu enga no jauaka nema enga uandantaaka ambeksïsï arhikuekani jaki,* jatsistiksï para pínasku pakarani kúnguarhikuarhu ka sïpatikuarkuksï uandontskuarheni Tata Diosïni jingoni.
29 Eskaksï tsimani o tanimu Tata Diosïiri uandakua páriichajku uandaaka ka máteruechaksï jatsisti para kurhanguntani ambeksïsï arhikuekani jaki.
30 Joperu enga máteru nema jima jauaka uaxakatini ka Tata Diosï exerani ambe ma, ima enga uandani jauaka jatsisti para erokuarhini sáni ka jurajkuni eska iásï inde uandaakia.
31 Ísïisti, iáminduechajtsï uaaka uandantani ambe enga Tata Diosï uandajka, joperu mándani arhini parakajtsï uaaka iáminduecha jorhenguarhini ka uinhaperperantani.
32 Ka Tata Diosïiri uandakua páriichaksï jatsisti para míteni nénaksï úraa indeni intsïmperatani enga espiritu santu íntsaaka, enga jindeeka uandantani ambe enga Tata Diosï uandajka.
33 Jimboka Tata Diosï no tsitisïnga eska ambe ma ísku no nani máru úkuarhiaka. Sánderu sési, tsitisïndi eska pínandikua jauaka.
Ísï eska na úkuarhini jaka iámindu kúnguarhikuecharhu nani engaksï pímbinharhatiicha jaka,
34 nanakeechaksï jatsisti para pínasku jarhani kúnguarhikuarhu, jimbokaksï no sésikua jatsiska para uandani. Sánderu sési, jatsistiksï para janhanharhiani tatakeechani ísï eska na karakata jaka Leirhu.
35 Ka engaksï uéjka míteni ambe ma, jatsistiksï para uámbeechani kurhamarhiani chenjembo, jimboka kʼuratsekua ambeeska eska uarhiiti ma uandani jauaka kúnguarhikuarhu.
36 ¿Andi chánksïni jimbosï jaki Tata Diosïiri uandakua? ¿Andi chájkusï aiangunha ambesï arhijki Tata Diosïiri uandakua?
37 Enga nema uandajka eska Tata Diosïiri uandakua páriiska o eska jatsiska espiritu santueri intsïmperata ma, jatsisti para kurhanguni eska ambe engaksïni ji karachini jaka, jindeeska jimboka Tatasï ísï juramuni jaka.
38 Joperu enga nema ísku exeaka ini ambe, Tata Diosïjtu ísku exeati indeni kʼuiripuni.
39 Ísï jimbo juchiiti erachiicha, seguirii je jánguarhintani uandantani ambe enga Tata Diosï uandajka ka asï jáma je arhini nemani eska no jámaaka máteru idioma jimbo uandani.
40 Joperu sési ú je iámindu ambe ka ísï eska na jindeeka.
Notecha
^ Exe je Glosario, ambe ma enga Tata Diosïiriika.
^ O “profeta”.
^ O “úpiringa tradusiriintani”.
^ O “ermanuecha”.
^ O “para úni tradusiriintani”.
^ O “para tradusiriintani”.
^ O “enga tradusiriintaaka”.
