Primeru Karakata para Korintu anapuecha 15:1-58
-
Kristu tsítanhantasïndi (1 a 11)
-
Tsíntskua jimbochisï mintsikajka (12 a 19)
-
Enga Kristu tsíntaka, jiájkani uarhiriichaksï tsíntaati (20 a 34)
-
Kuerpu ma enga kʼuiripeteeka, ka kuerpu ma enga espiritueka (35 a 49)
-
Nóteru méni uarhini ka nóteru méni tereni (50 a 57)
-
Méntku ánchikuarhikuni jarhani Tatani (58)
15 Erachiicha,* iásïksïni miátantaaka ambakiti aianhperakuani engaksïni aianguka, ima ambe engajtsï chá jiókuarhika ka engaksïni jarhuatani jaka parajtsï chá uíuinhasï jarhani.
2 Ístu, chájtsï pʼímutanhantani jauaka engajtsï méntkisï jakajkuaka ini ambakiti aianhperakuani engaksïni aianguka. Joperu engajtsï jurajkuska, jiájkantsï chá ísku jatini niáraska jakajkuni.
3 Jimbokaksïni ji imani ambe ueenaska aianguni ambe engani jíjtuni aiangunhaka: eska Kristu uarhiska parachi puáminhaantani juchaari pekaduechani ísï eska na karakata jaka Karakateecharhu;
4 eska jatsinhantaska ka eska tanimu jurhiatikua jimbo tsítanhantaska* ísï eska na karakata jaka Karakateecharhu,
5 ka eska Sefasini* xarhakuspka ka tátsekua 12 apostoliichani.
6 Tátsekua jukari 500 erachiichani xarhakuaspti jiáni engaksï tánguarhintatini japka. Sáno iámindu i erachiichaksï útasï juchantsïni jingoni jarhasti, joperuksï máru uarhistia.
7 Tátsekua Santiaguni xarhakuspti; ka tátsekua iámindu apostoliichani.
8 Ka últimurini jíndeni xarhachesti, ísï jimbo, ji ísïiska komueska charhaku ma enga jiáni andajpenuka enga nótki niárakuni japka para andajpenuni.
9 Ji sánderu sapichueska iámindu apostoliichani jingoni, ka no jamberini jukanchaska parani arhinhani eskani apostoliiska, jimbokani kánikua no sési kámaska Tata Diosïiri kúnguarhikuani.
10 Joperu jimbokarini Tata Diosï kánikua kóndentaska, ji ixú jamberini niáraskia. Ka nóreni ísku jatinisï xáni kóndentati, jimbokani ji sánderuni ánchikuarhiska eskaksï imeecha. Joperuni no jándiajkusïni ísï úka, sánderu sési, Tata Diosïrinisï xáni kóndentati parani ísï úni.
11 Ísï jimbo, né uéjki aianhpini, ji o máteruecha, jucha ini ambesïni jámani jaka aianhpini ka chájtujtsï ini ambesï jakajkuka.
12 Jimajkani, engachi jucha aianhpini jaka eska Kristu tsítanhantaska, ¿andijtsïsï chá máru uandajki eskaksï uarhiriicha no tsíntaaka?
13 Ísï jimbo, engaksï uarhiriicha no tsíntaaka, jiájkanchka Kristujtu no tsítanhantastia.
14 Joperu enga Kristu no tsítanhantaka, jiájkani ísku jatinchisï jámani jaka aianhpini ka chájtujtsï ísku jatinisï mintsikani jaka.
15 Ístu, engaksï uarhiriicha no tsítanhantaaka, jiájkani Tata Diosï no tsítantasti Kristuni ka juchachi chkuanderakua ambe uandaxaka Tata Diosïiri ambe engachi uandani jaka eska tsítantaska Kristuni.
16 Jimboka, engaksï uarhiriicha no tsítanhantaaka, jimajkani Kristujtu no tsítanhantasti.
17 Ístu, enga Kristu no tsítanhantaka, jiájkantsï chá ísku jatinisï mintsikani jaka; ka nótkijtsï puáminhaantaxaka chaari pekaduechani.
18 Jimajkani Kristueri chúxapatiichajtu engaksï uarhikia, méntkuksï nirastia.*
19 Engachi ini irekua jimbojku mintsikani jaka Kristuni, jimajkani juchachi sánderu no sési jarhaska eska máteru kʼuiripuecha.*
20 Joperu Kristu tsítanhantasti, ka iámindu uarhiriicheeri, ima orheta* tsítanhantasti.
21 Ísï eska uarhikua na juka ma achamasï jimbojku, uarhiriichajtuksï ma achamasï jimbojku tsíntaati.
22 Ka ísï eskaksï na iáminduecha uarhini jaka imani ambe jimbo enga Adáni úka, ístuksï iáminduecha tsípikua intsïnhaati imani ambe jimbo enga Kristu úka.
23 Joperu mándani arhiatiksï tsíntani: Kristu orheta* tsítanhantasti, ka tátsekua, enga ima na ixú jauakia, imeechaksï tsítanhantaati engaksï Kristueriika.
24 Ka últimu, ima íntskuntaati Reinu Tata Diosïni, imani enga jindeeka imeeri Tata Diosï ka Taati; ka i ambe jiáni úkuarhiati enga ima na kʼamajkuauakia juramukuechani ka imeechani engaksï uinhapikua jatsika.
25 Jimboka ima jatsiska para juramuni asta jiáni jamberi enga Tata Diosï na imeeri jantsiriicharhu peerakuauakia iámindu imeechani engaksï ikiakujka.
26 Ka últimu, kʼamajkunhaati uarhikua enga jindeeka juchaari ikiatspiti.
27 Jimboka Tata Diosï “imeeri jantsiriicharhu peerakuska iámindu ambe para ima juramuni”. Joperu enga ima uandajka eska iámindu ambe imeeri juramukua jimbo jurajkukuska, no arhikuekaxati eska imajtu, enga iámindu ambe jurajkukuka, imeeri juramukua jimbo jauaka.
28 Joperu tátsekua enga Tata Diosï imeeri Uájpani jurajkukuaka iámindu ambe paraka Uájpa juramuaka, Uájpajtu Tata Diosïiri juramukua jimbo niáraati paraka Tata Diosï juramukuaka, ima enga iámindu ambe jurajkukupka. Ísï jimbo, Tata Diosïterkusï juramuatia ka imeeri juramukua jimbo jauati iámindu ambe.
29 Enga no ísïipiringa, jiájkani, ¿andiksïsï itsï atakuarhini* jaki kʼuiripuecha paraksï uarhini? Engaksï uarhiriicha no tsítanhantaaka, ¿andiksïsï imeechajtu itsï atakuarhini jaki?
30 Jiájkani, ¿andichisï méntku uarhikuarhu uémukuni jarhajki?
31 Erachiicha, ísï eskani ji na xáni sési pʼikuarherajka chánksïni jimbo engajtsï Kristu Jesúsini marhuakuni jaka, enga jindeeka juchaari Tata, jíksïni jurhimbitku arhixaka eskani pauani pauani sáno uarhisïnga.
32 ¿Jiájkani ísku jatini uarhipeski ji animaliichani jingoni engaksï no sési jámajka jini Éfesu, ísï eskaksï na úka máteru kʼuiripuecha?* Ka engaksï uarhiriicha no tsítanhantaaka, jiájkani “ju je iásï tʼireni ka itsïmani jimbokachi pauani no jamberi erandeaka”.*
33 Asï jurajku je eskaksïni nema támisï paaka. Engajtsï chá no ambarhati kʼuiripuechani kúrhiaska, chájtsï nóteru uaakia ambe engajtsï iásï jamberi sési úni jaka.*
34 Kurhangia je ka sési jáma je ka asï jáma je no sési ambe niátani, jimbokaksï jarhaska máru engaksï no míteka Tata Diosïiri ambe. Ka ísïksïni arhixaka parakajtsï kʼuratseaka sáni.
35 Joperu jamberi nema uandaati: “¿Nénaksï tsíntaa uarhiriicha? Jo, ¿na jásï kuerpu jingonksï jungua?”.
36 ¡Xáni engari no sáni jánhaskajka! Paraka semiia ma uaaka tsikini, orheta jatsisti para tereni.
37 Chájtsï no jatsikusïnga planta* ma enga kʼékia, sánderu sési, chájtsï trigueri semiiasï ma jatsikujka o máteru jásï semiia, joperujtsï semiiasï ma jatsikujka.
38 Ka Tata Diosïsï tsikirajti mándani semiiani ísï eska ima na uékaaka. Ka mándani semiia, mámaru jásï tsikisïndi.
39 No iámindu ambe májku jásï kuerpu jukasti: kʼuiripuechaksï ma jásï kuerpu jukasti, animaliichaksï máteru jásï, pájaruechaksï máteru jásï ka kurucheechajtuksï máteru jásï kuerpu jukasti.
40 Imeecha engaksï auandarhu jaka máteru jásï kuerpuksï jukasti ka imeecha engaksï parhakpinirhu jaka máteru jásï kuerpu. Ka imeecheeri kuerpu engaksï auandarhu jaka sésiksï jáxesti ka ístuksï sési jáxesti imeecheeri kuerpu engaksï parhakpinirhu jaka, joperuksï táchanisï sési jáxesti.
41 Jurhiata, ma jásï tʼíntskasïndi, luna ménderueni tʼíntskasïndi ka jóskuechajtuksï ménderueni tʼíntskasïndi; jo, nóksï iámindu jóskuecha májkueni tʼíntskasïndi.
42 Ka májkueni úkuarhiati jiáni engaksï uarhiriicha tsíntaaka. Jimboka jatsinhantasïnga kuerpu ma enga terejka, joperu kuerpu ma tsítanhantasïndi enga no terejka.
43 Kuerpu ma jatsinhantasïndi enga no sési exenhajka, joperu enga tsítanhantajkia kʼéri ambe exenhasïndi. Kuerpu ma jatsinhantasïndi enga no uinhapika, joperu uíuinhasï tsítanhantasïndi.
44 Kuerpu ma jatsinhantasïndi enga kʼuiripeteeriika ka tsítanhantasïndi kuerpu ma enga espiritueka. Enga jaka kuerpu ma enga kʼuiripeteeriika, jiájkani ístu jarhasti kuerpu ma enga espiritueka.
45 Ísï karakata jarhasti: “Adáni, ima tataka enga orheta kueraanhapka, niáraspti tsípikua jatsini”.* Ka ima Adáni enga últimu juka, espiritu ma úkuarhisti enga tsípikua íntspijka.
46 Joperu no orheta jindeesïndi kuerpu ma enga espiritueka, sánderu sési, orheta kuerpusï ma jarhajti enga kʼuiripeteeriika ka tátsekuasï niárajti jarhani kuerpu ma enga espiritueka.
47 Ima tataka enga orheta kueraanhaka, parhakpinirhu anapuesti ka tʼupuri jingoni únhaspti; joperu máteru, auandarhu anapuesti.
48 Parhakpini anapu kʼuiripuechaksï ísïisti komueska ima enga Tata Diosï tʼupuri jingoni úpka; ka imeecha engaksï auandarhu anapueka, ísïistiksï komueska ima enga auandarhu uératini juka.
49 Ka ísï eskachi jucha na májkueniika komueska ima enga Tata Diosï tʼupuri jingoni úpka, ístuchi májkueniuaka komueska ima achamasï enga auandarhu nika.
50 Joperu erachiicha, jíksïni arini ambe arhisïnga: kuerpu ma enga kʼuiripeteeriika ka iurhiriiri, no úsïndi inchani Tata Diosïiri Reinurhu, ka ístu, kuerpu ma enga terejka, no úsïndi pʼirani kuerpu ma enga no terejka.
51 ¡Exe je! Jíksïni aianguaka ambe ma, ambe ma enga Tata Diosïiriika:* nóchi iáminduecha kʼuíaka uarhikuarhu, joperuchi kʼóru iáminduecha ménderueni jáxentaaka,
52 mátirku ísï úkuarhiati, méntku xáni kókuani eska ma na xáni sóntku éskantajka, jiáni ísï úkuarhiati enga últimu trompeta kúskani jauaka. Jimboka jiáni enga trompeta kúskaaka, uarhiriichaksï tsítanhantaati kuerpu ma jingoni enga no terejka ka juchachi ménderueni jáxentaaka.
53 Jimboka i kuerpu enga terejka, jatsisti para ménderueni jáxentani para nóteru méni terenia, ka i kuerpu enga iásï uarhijka, jatsisti para ménderueni jáxentani para nóteru méni úni uarhini.
54 Joperu jiáni enga i kuerpu enga terejka ménderueni jáxentaaka para nóteru terenia ka jiáni enga i kuerpu enga uarhijka ménderueni jáxentaaka para nóteru úni uarhinia, jiánisï ísï úkuarhiati eska na karakata jaka: “Uarhikua méntku kʼamajkunhasti”.*
55 “Uarhikua, tʼuri no úska andani jimboka chiiti uinhapikua ixú jamberku niáraskia ka nóteruri uaakia no sési úkuani kʼuiripuechani”.
56 Pekadusï jindeeti uinhapikua enga uándikuajka kʼuiripuechani ka Leisï uinhapikua íntskujti pekaduni.
57 Joperuchi jucha diosmaiamukua arhisïnga Tata Diosïni, jimboka juchaari Tata Jesukristuni jimbo, imajtsïni uinhapikua íntskusïndi parachi jucha úni andani uarhikuani.
58 Ísï jimbo juchiiti erachiicha engaksïni ji xáni xénchajka, uíuinhasï ja je, sési anhaxurhitini ja je, ka méntku ánchikuarhikuni ja je Tatani, asï mirikurhi je eskajtsï chá no ísku jatinisï ánchikuarhikuni jaka Tatani.
Notecha
^ O “Ermanuecha”.
^ Griegu jimbo: “jauatanhantaska”, ixú ka iámu kapitulu jimbo.
^ Enga ístu arhinheenga Pedru.
^ O “uarhistia”.
^ O “juchachi sánderu lástima íntspisïnga”.
^ Griegu jimbo: “jindeesti frutu enga orheta pʼikunhantajka”.
^ Griegu jimbo: “jindeesti frutu enga orheta pʼikunhantajka”.
^ Exe je Glosario, itsï atakuarhini; itsï atani.
^ O jamberi, “ísï eskaksï na eratsejka kʼuiripuecha”.
^ O “tʼuini uarhiakia”.
^ O “chájtsï nóteru sési jámaakia”.
^ Griegu jimbo: “kuerpu”.
^ O “alma máeni”.
^ Exe je Glosario, ambe ma enga Tata Diosïiriika.
^ Griegu jimbo: “anhantasti”.
