Primeru Karakata para Korintu anapuecha 16:1-24
16 Ka engajtsï tánaaka sentabu para pímbinharhatiicha, chájtu ísï ú je eskani na arhistakuaka imani kúnguarhikuechani engaksï Galasia jaka.
2 Primeru jurhiatikua mándani semana, uaakajtsï arhutani na engajtsï xáni uaaka, parakajtsï no jiáni jámani jauaka tánani engani ji chánksïni jingoni jauakia.
3 Ka engani na jini jauakia, axauaka Jerusaléni máru achamasïichani paraksï páni ambe engajtsï chá intsïmpiaka, ísï jimbo, karachijtsïni je parajtsïni aianguni neechantsï erakuaski.
4 Joperu enga kʼuaniaka eskani jíjtuni niuaka, imajtuksï niuati jíndeni jingoni.
5 Jíksïni niuaka exeni joperu engani na Masedoniaisï nitamaakia, jimbokani Masedoniaisï niuaka,
6 nándikani uaaka sáni ióni pakarani chánksïni jingoni, jamberini jiáni jamberi pakaraaka enga iauani* jauaka, parajtsïni chá nirani sáni pámbeni nani engani tátsekua niuaka.
7 Jíksïni no uékasïnga arisku sáni exeni, jimboka enga Tata Diosï Jeoba ísï uékaska, uékasïnga sáni ióni pakarani chánksïni jingoni.
8 Jimbokani Éfesu pakaraaka asta Pentekostesiiri Kʼuínchikua jimbo,
9 jimbokajtsïni kʼéri puerta ma mítacheska parani sánderu uánikua ambe úni, joperu uánikua kʼuiripuechaksï jarhasti engajtsïni ikiachejka.
10 Ka engaksïni Timoteu niuaka sáni exeni, jarhuata je para ima no uandanhiani jarhani, jimboka imajtu Tata Diosï Jeobaeri ánchikuarhitani úxaka, májkueni eskani ji.
11 Ísï jimbo, asï jáma je ísku exeni.* Ní je sáni pámbetani xanharu jimbo paraka ima sési janoaka jíndeni jingoni, jimbokani ji ixú erokaxaka máteru erachiichani* jingoni.
12 Ka ji someni arhiska juchaari erachi Apolosini eskaksïni nipiringa sáni exeni máteru erachiicha jingoni. Ima uandasti eska iáiasï no uaaka nirani, joperuksïninha niuati exeni enga na uaakia.
13 Jingontku jáma je, méntkisï mintsika je, asï jáma je chéni* ka uinhapikuarhinta je.
14 Uékperakua jimbo ú je iámindu ambe.
15 Erachiicha, iásïksïni uékasïnga kurhacheni ambe ma. Chájtsï sési míteska eskaksï Estéfanasiiri kʼumanchikuarhu anapuecha ueenaska jakajkuni jini Akaia ka eskaksï méntku jarhuataaxaka* pímbinharhatiichani.
16 Chájtujtsï jatsiska para janhanharhiani indeeni járhati kʼuiripuechani, ka iámindu imeechani engaksï jarhuajpejka ka engaksï uinhamu ánchikuarhijka.
17 Ji kánikua sési pʼikuarherasïnga jimbokaksï ixú jarhaska jíndeni jingoni Estéfanasi, Fortunatu ka Akaiku ka indejtsïni jarhuataxati iáiasï engajtsï chá no ixú jaka.
18 Indeechajtsïni kánikua uinhaperantasti jíndeni ka chánksïntuksïni uinhaperantasti. Ísï jimbo, kánikua uékaa je indeeni járhati kʼuiripuechani.
19 Asia anapu kúnguarhikuechaksïni uandajperata ma axachexati. Ákila ka Priska ka kúnguarhikua enga imeecheeri kʼumanchikuarhu tánguarhijka, ístuksïni uékperakua jingoni uandajperata ma axachexati, jimbokaksï imajtu Tateeri chúxapatiiska.
20 Iámindu erachiichaksïni uandajperata ma axachexati. Engajtsï chá uandajperaaka, mintsita jingoni putinharhikpera je.
21 Ji Pablu, jíksïni karachixaka ini uandajperatani engaksïni axacheni jaka.
22 No ambakiti kʼuiripu máeuati ima enga no xénchaska Tatani. ¡Oh, juchaari Tata, ju sáni!
23 Eskaksïni Jesúsi* kánikua kóndentaaka.
24 Asï mirikurhi je eskaksïni ji kánikua xénchasïnga chánksïni engajtsï Kristu Jesúsiiri chúxapatiika.
Notecha
^ O “iéstani”.
^ O “menusi úni”.
^ O “ermanuechani”.
^ O “ísï jáma je eskaksï achamasïicha na jámajka”.
^ O “marhuakuaxaka”.
^ Griegu jimbo: “Tata Jesúsi”.
