Primeru Karakata para Korintu anapuecha 2:1-16
2 Ísï jimbo erachiicha,* engaksïni nípka pʼorhembini paraksïni indeni ambe aianguni enga Tata Diosïiriika,* no kʼérati uandakuecha jingonksïni aianguska o ísïksïni aianguni eskaksï na uandajka imeecha engaksï kánikua jánhaskatiika.
2 Jimboka jiáni engaksïni nípka pʼorhembini, uandaspka eskaksïni tata Jesukristueri ambejku aiangupiringa ka na enga ima chkarirhu ma cháparhatanhaka.
3 Jiáni engaksïni nípka pʼorhembini, ísï pʼikuarheraxapka enajkini no úpirini uandani, chéxapka ka kánikua manaraxapka.*
4 Ka jiáni engaksïni aianguni japka ka engaksïni jorhendani japka, ji méntkuni no jámaska sési jándirantani uandani ísï eskaksï na uandajka imeecha engaksï kánikua jánhaskatiika, sánderu sési, ambe engani ji uandaka xarhatasti na enga xáni uinhapika espiritu santu,
5 parakajtsï no jámapiringa imani kʼuiripuechani mintsikaani engaksï uandajka jánhaskani, sánderu sési, parakajtsï mintsikapiringa na enga xáni uinhapitiika Tata Diosï.
6 Jucha engachi sánderu mintsikajka Tata Diosïni, uandantasïngachi na enga xáni jánhaskatiika ima ka no na engaksï xáni jánhaskatiika iásï anapu kʼuiripuecha* ka nijtu na engaksï xáni jánhaskatiika iásï anapu juramutiicha engaksï sánderu orhepani nóteru jauakia.
7 Joperu jucha uandantasïnga ambe ma enga Tata Diosïiriika,* jo, na enga xáni jánhaskatiika Tata Diosï ka i ambe jískakata jarhasti. Tata Diosï tʼuini jánhaskasptia ini ambe ante de jarhani i xáni no sési jásï parhakpini* parachi jucha kʼéri ambe exenhani.
8 Iásï anapu* juramutiichaksï no niárasti míteni na enga xáni jánhaskatiika Tata Diosï; engaksï mítepiringa, nóksï uándikupirindi* Jesúsini, juchaari Tata enga xáni kʼéri ambeeka.
9 Joperu ísïisti eska na karakata jaka: “No ma kʼuiripu exexati ka nijtu kurhaajki, ka no ma kʼuiripu úsïndi eranhaskani imeeri mintsitarhu ambe enga Tata Diosï íntsauaka imeechani engaksï xénchajka”.
10 Jimbokajtsïni Tata Diosï juchantsïnisï aianguti imeeri espiritu santu jimbo, jimboka espiritu santusï sési kurhangujti* iámindu ambe, asta indeni ambe enga Tata Diosïiriika ka enga jískakata jaka.
11 ¿Uaa nema míteni ambe enga eratseni jaka kʼuiripu ma? Nómbe. Imeeri mintsitajkusï míteti ambe enga eratseni jaka ima kʼuiripu. Ka májkueniisti, no nema úsïndi míteni ambe enga Tata Diosï eratseni jaka, imeeri espiritujkusï míteti.
12 Juchachi no parhakpini anapu espiritunisï intsïnhaka, sánderu sési, juchachi Tata Diosïiri espiritunisï intsïnhaka parakachi míteaka ambe engajtsïni Tata Diosï xáni íntskuka jimbokajtsïni xénchasïnga.
13 Juchajtuchi iiri ambe uandasïnga joperu no ísï eskaksï na uandajka kʼuiripuecha engaksï jánhaskatiika, sánderu sési, ísïchi uandasïnga eskajtsïni Tata Diosïiri espiritu santu na jorhendaka ka ísïchi uandasïnga eskajtsïni espiritu santu na arhijka parachi Tata Diosïiri ambe uandantani.
14 Joperu ima kʼuiripu enga újka ambe enga tsitijka imeeri kuerpu, no kurhangusïndi* Tata Diosïiri espiritueri ambe, jimboka para ima ísku ambe máeska, ka no úsïndi míteni indeni ambe jimboka espiritu santusï jatsika para jarhuatani para ima úni kurhanguni.
15 Joperu kʼuiripu ma enga ísï irekajka eska espiritu santu na arhijka, jánguarhintasïndi sési kurhanguni iámindu ambe, joperu no nema úsïndi sési míteni imani kʼuiripuni.
16 Jimboka, “¿né niáraskia míteni ambe enga eratsejka Tata Diosï Jeoba paraka uaaka arhistakuni?”. Joperuchi jucha kʼóru májkueni eratsesïnga eska Kristu.
Notecha
^ O “ermanuecha”.
^ Exe je Glosario, ambe ma enga Tata Diosïiriika.
^ O “tsirintsirirhikuarhixapka”.
^ O “i tiempu anapuecha”. Exe je Glosario, tiempu.
^ Exe je Glosario, ambe ma enga Tata Diosïiriika.
^ O “i tiempu”. Exe je Glosario, tiempu.
^ O “I tiempu anapu”. Exe je Glosario, tiempu.
^ O “nóksï cháparhatapirindi chkarirhu”.
^ O “sési eraeratajti”.
^ O “no jiókuarhisïndi”.
