Primeru Karakata para Korintu anapuecha 3:1-23
-
Korintu anapuechaksï útasï imani ambe úsïndi ambe enga tsitijka imeecheeri kuerpu (1 a 4)
-
Tata Diosïsï újti eska kʼéaka (5 a 9)
-
Májku kʼérichi ánchikuarhixaka parachi Tata Diosïni jarhuatani (9)
-
-
Kújtsïtani imani ambe jingoni enga no kurhijka (10 a 15)
-
“Chá jindeeska Tata Diosïiri templu” (16 ka 17)
-
Para Tata Diosï ísku ambe máesti na engaksï xáni jánhaskatiika parhakpini anapuecha (18 a 23)
3 Ísï jimbo erachiicha,* jíksïni no úspka ísï uandontskuarhechini eskani na uandontskuarhekuapiringa imani kʼuiripuechani engaksï ísï irekajka eska espiritu santu na arhiajka, sánderu sési, jíksïni ísï uandontskuarhechiska komueska imeechani engaksï újka ambe enga tsitijka imeecheeri kuerpu enga pekadu jukaraka, jimbokajtsï chá ísïiska komueska charhakuecha engaksï apenasi ueenani jaka Kristueri xanharu jimbo jámani.
2 Jíksïni lechi íntskuska ka nóksïni tʼirekua ambe íntskuska, jimbokajtsï chá nótki uinhapiti jarhaspka. Ka iásï jamberi, nótkijtsï uinhapiti jarhaska,
3 jimbokajtsï chá útasï imani ambe úsïnga ambe enga tsitijka chaari kuerpu enga pekadu jukaraka. Engajtsï chá enbidiarperajka ka no sési arhijperani, ¿andi nójtsï imani ambe úni jarhasïni ambe enga tsitijka chaari kuerpu enga pekadu jukaraka ka nójtsï ísï jámani jarhasïni komueska parhakpini anapu kʼuiripuecha?
4 Enga nema uandajka “Ji Pablueri chúxapatiiska”, ka máteru uandani “Ji Apolosiiri chúxapatiiska”, ¿andi nójtsï ísï jámani jarhasïni eska parhakpini anapu kʼuiripuecha?
5 ¿Neeski Apolosi ka neeski Pablu? Jántspiriistiksï engaksï imani ánchikuarhitani úni jaka enga Tata íntsaaka ka engajtsï jimbo chá niáraka Jesúsiiri chúxapatiini.
6 Ísïisti, ji ikaraska ka Apolosi itsï jatsikusti, joperu Tata Diosïsï úti eska kʼépiringa,
7 ísï jimbo, no kʼéri ambeesti ima enga ikarajka nijtu ima enga itsï jatsikujka, sánderu sési, Tata Diosïsï kʼéri ambeeti jimboka úsïnga eska kʼéaka.
8 Ima enga ikarajka ka ima enga itsï jatsikujka, májkuestiksï,* joperu mándani arhinksï ísï intsïnhaati ambe engaksï andakuarheka.
9 Jimbokachi jucha májku kʼéri ánchikuarhixaka parachi Tata Diosïni jarhuatani. Chájtsï jindeeska echeri nani enga Tata Diosï tarheni jaka ka ístu ima kʼumanchikua enga Tata Diosï úni jaka.
10 Ísï eskarini Tata Diosï na xáni kóndentaka, ji ueenaska peerani pítsekuani ísï eska na újka ima enga sési míteka ánchikuarhini, joperu máteru nema kújtsïtaxati indeni pítsekuani jimbo. Ísï jimbo, uétarhisïndi eska táchanisï exekuarhinhaaka na enga kújtsïtani jaka indeni pítsekuani jimbo.
11 Jimboka májku pítsekua jarhaska enga jindeeka tata Jesukristu, ka nóteru nema uaatia peerani máteru pítsekuani.
12 Nema uaati kújtsïtani jimini oru jingoni, plata ka sési járhati tsakapuecha jingoni o ístu uaati chkari ambe jingoni kújtsïtani, uitsakua ambe jingoni ka paja ambe jingoni.
13 Jimboka niáraaka ima jurhiatikua enga xarharaaka ambeeri úkata jarhaski mándani kʼuiripueri ánchikuarhita. Jimboka ima jurhiatikua, chpiri jingoni tsʼéjkunhaati para xarhatani ambeeri úkata jarhaski mándani kʼuiripueri ánchikuarhita.
14 Enga chpiri no kurhiraaka ambe enga kʼuiripu ma kújtsïtaka indeni pítsekuarhu, inde kʼuiripu kóndenhantaati.
15 Enga kʼuiripueri ánchikuarhita ma niáraska kurhini, i kʼuiripu uánikua ambe tsïtaati joperu niáraati pʼímutantskata uérani; ka ísïiuati enajki chpirirhu uéjpinta.
16 ¿Andi nójtsï míteski eskajtsï chá jindeeska Tata Diosïiri templu ka eska Tata Diosïiri espiritu santu chánksïni jingoni jarhaska?
17 Enga nema kʼamajkuaka Tata Diosïiri templuni, Tata Diosïjtu kʼamajkuati imani kʼuiripuni, jimboka Tata Diosïiri templu pímbinhasïiska, ka chájtsï jindeeska ima templu.
18 Eska ini tiempu* jimbo, no nema jámaaka eratseni eska jánhaskatiiska, sánderu sési, eska ísï jámaaka enajki no ma ambe míte paraka niáraka jánhaskatiini.
19 Jimboka para Tata Diosï ísku ambe máeska na engaksï xáni jánhaskatiika parhakpini anapuecha, jimboka karakata jarhaska: “Tata Diosï úsïndi eskaksï jandiajku no sési úkuarhinchaaka ima engaksï uandajka eskaksï jánhaskatiiska”.
20 Ístu karakata jarhasti: “Tata Diosï Jeoba mítesti eska no ma ambe marhuasïnga ambe engaksï eratsejka ima kʼuiripuecha engaksï jánhaskatiika”.
21 Ísï jimbo, eska no nema jámaaka arhikuarhini* imani ambe jimbo engaksï kʼuiripuecha újka jimboka iámindu ambe chaariiska:
22 chaariisti Pablu, Apolosi, Sefasi,* parhakpini, tsípikua, uarhikua, ambe enga iásï úkuarhini jaka ka ístu ambe enga sánderu orhepatini úkuarhiaka. Ísï jimbo, iámindu ambe chaariisti.
23 Ka chájtsï Kristueriiska ka Kristu Tata Diosïiriisti.
Notecha
^ O “ermanuecha”.
^ O “májkueni ambeksï uékasïndi úni”.
^ Exe je Glosario, tiempu.
^ O “jatsijpakuarhini”.
^ Enga ístu arhinheenga Pedru.
