Primeru Karakata para Korintu anapuecha 4:1-21
4 Juchachi jatsipiringa parachi ísï mítekateeni komueska kʼuiripuecha engaksï Kristuni jarhuatani* jaka ka komueska kʼuiripuecha engaksï patsaranhaka* ambe ma enga Tata Diosïiriika.*
2 Ka imeecha engaksï ini ambe patsaranhaka, jatsistiksï para mintsinharhikueni.
3 Jimbokani ji méntkuni no na pʼikuarherasïnga engajtsïni chá o juesiicha arhijka eskani no sési úxaka.* Jimbokani ji jamberini no úsïnga exekuarhini nénasïni jámani jaki.
4 Ka no miáxaka no sési ambe úni,* joperu no ísï jimbo uaaka uandani eskani sési jámaxaka. Tata Diosï Jeobasï uandajti sini ji sési ambe úxaki o nómbe.
5 Ísï jimbo, asï jáma je no sési ambe exekuni máteru nemani ante de ima jurhiatikua enga uaxastakata jakaia, erokuarhi je asta jiáni enga Tata juuaka. Ima, tʼíntskuarhu peeraati ambe enga sïpatikuarku úkuarhijka pápkʼandu ka mítetarpiati ambe engaksï kʼuiripuecha jatsika imeecheeri mintsitarhu. Jimajkani Tata Diosï mándani arhini sési arhiauati ísï eskaksï na jukanchaaka.
6 Erachiicha,* jíksïni karachiska ini ambe paraksïni juchiiti ambe aianguni ka ístu Apolosiiri ambe paraksïni inde ambe jarhuatani. Ísï jimbo, chájtu arini ambe ú je ísï eska jucha: “Indeni ambejku ú je ambe enga karakata jaka”. Ka engajtsï ísï úska, nójtsï kʼéramakuarhiaka ka nójtsï jámaaka nemani sési exeni ka máteruni ísku exeni.
7 ¿Amberi úxaki tʼu engari jimbo sánderu kʼéri pʼikuarherani jaka eska máteruecha? ¿Andi nókini Tata Diosï íntskuski ambe engari jatsika? Ka engakeni ima íntskuka ambe engari xáni jatsika, ¿andiresï xáni arhikuarhijki ka ísïri jámani enajkiri tʼu andakuarhi indeni ambe?
8 ¿Nóterujtsï ambe ma uétarhinchasïnia? ¿Jatsikuarheriiskijtsïa? ¿O chá ueenaskia juramuni ka jucha nótki ambe? Sésiipirindi engajtsï chá ueenapiringia juramuni parani juchajtu ueenania juramuni ísï eska chá.
9 Jimbokani jucha, apostoliicha, ísïiskachi komueska xéjpikua* ambe, parajtsïni parhakpini, ánjeliicha ka kʼuiripuecha méntku exeni jarhani. Péringajtsïni Tata Diosï últimu peeraka juchantsïni parachi últimu uérani komueska ima kʼuiripuecha engaksï uándikunhaaka.
10 Kʼuiripuechajtsïni ísï exesïndi komueska tontuecha jimbokachi Kristuni chúxapasïnga, joperujtsï chá jánhaskatiiska jimbokajtsï Kristuni chúxapasïnga; jucha no uinhapiska, ka chájtsï kʼóru uinhapiska; kʼuiripuechaksïni janhanharhisïndi chánksïni joperujtsïni juchantsïni ísku exesïndi.
11 Ka iásï jamberichi no ma ambe jatsiska para tʼireni nijtu para itsïmani, nóchi kánguarhisïnga uánikua takusï ambe* ka kʼuiripuechajtsïni atasïndi,* nóchi jatsikuarheska nani irekani
12 ka uinhamuchi ánchikuarhisïnga. Engajtsïni kʼuiripuecha no sési arhijka, juchachi sési arhiasïnga; engajtsïni no sési kámajka, juchachi tekaantskua jingoni tekaantasïnga;
13 engajtsïni uandakua ambe jauatachejka, juchachi no no sési mókukuarhisïnga. Iásï jamberi, kʼuiripuechajtsïni ísï exesïndi parhakpinirhu komueska ambe ma engaksï imeecha kʼuanikujka, ambe ma enga nóteru marhuajkia.
14 Nóksïni karachixaka ini ambe paraksïni kʼuratsetani, sánderu sési, karachixakaksïni paraksïni arhistachini jimbokajtsï ísïiska komueska juchiiti uátsïtiicha* engani ji xáni xénchaajka.
15 Ísï jimbo, nájkirukajtsï jatsiaka 10 mili jorhentpiriichani engaksïni jorhendaaka néna chúxapani Kristuni, nójtsï uánikua taatiichani jatsiaska; jimboka engani ji ísï márku jaka Kristu Jesúsini jingoni, ji niáraska jindeeni chaari taati jimbokaksïni jorhendaxaka ambakiti aianhperakuani.
16 Ísï jimbo, jíksïni kurhachexaka eskajtsï májkueni jámaaka eskani ji.
17 Jimboksïnisï axacheni jaka Timoteuni, jimboka inde juchiiti uatsïtiiska* engani ji xáni xénchajka ka inde iámu mintsita jingoni jánguarhintaxati Tatani marhuakuni. Indeksïni miátantani jauati ambe engani ji xáni úni jaka parani Kristu Jesúsini marhuakuni, ísï eskani ji na jámani jaka jorhentpini mándani kúnguarhikuarhu.
18 Jarhastiksï máru engaksï ísï eratsejka enajkiksïni ji no méni niua pʼorhembini, jimboksïsï imeecha kʼéramakuarhijti.
19 Joperu enga Tata Diosï Jeoba ísï uékaaka, jíksïni no ióni jimbo niuaka pʼorhembini jimbokani uékasïnga míteani imeechani engaksï kʼéramakuarhijka, joperu no imani ambe jimbo engaksï uandajka, sánderu sési, uékasïnga míteni sinksï jatsiski Tata Diosïiri uinhapikua o nómbe.
20 Jimboka no uandakua jimbochisï xarhatajka eskachi kurhajchasïnga Tata Diosïiri Reinuni, sánderu sési, xarhatasïngachi eskachi kurhajchasïnga imani ambe jimbo engachi újka.
21 ¿Ambejtsï uékasïni? ¿Eskani pirimu ma jingoni niuaka o eskaksïni uékperakua jingoni arhistachiaka ka iatsitakuarhu?
Notecha
^ O “jántspikuni”.
^ Griegu jimbo: “engaksï iámindu ambe exeni jarhajka kʼumanchikuarhu”.
^ Exe je Glosario, ambe ma enga Tata Diosïiriika.
^ O “engajtsïni chá o juesiicha jusgariini jaka”.
^ O “pímbinhasï konsiensia ma jatsiska”. Exe je Glosario, konsiensia.
^ O “Ermanuecha”.
^ Griegu jimbo: “teatru”.
^ Griegu jimbo: “xáskuchi jámaxaka”.
^ O “no sési kámasïndi”.
^ O “juchiiti sapiicha”.
^ O “juchiiti sapiiska”.
