Primeru Karakata para Korintu anapuecha 5:1-13
5 Aiangustijtsïni eska chánksïni jingoni tataka ma jarhaska enga ísku jándikua ambe* niátani jaka, niksï imeecha jamberi engaksï no jakajkutiika* niátajki xáni ikichakueni jásï ambe.* Jimboka inde tataka, taati jémbeeri uarhiitini jingoni irekaxaka.*
2 ¿Ka chá sési pʼikuarherasïni indeni ambe jimbo? ¿Andi nójtsï jatsipirini para no sési pʼikuarherani jarhani parakaksï petantaaka indeni tatakani enga indeni ambe úni jaka ka para nóteru chánksïni jingoni jarhania?
3 Nájkirukani ji no chánksïni jingoni jaka, sési mítetixaka ambe enga úkuarhini jaka chánksïni jingoni,* ka indeni tatakani enga ísï jámani jaka, ji ísï jusgariskia enajkini chánksïni jingoni jaki.
4 Engajtsï chá tánguarhintaaka Jesúsiiri* nombri jimbo, miá je eskarini Jesúsi juramukua íntskuska ka eskani ji sési mítetixaka ambe enga úkuarhini jaka chánksïni jingoni, ísï jimbo
5 Satanásini íntskunta je indeni tatakani paraka no pájtamauaka máteruechani indeeri pekadu jingoni,* paraka Tateeri jurhiatikua jimbo iámu kúnguarhikua seguiriini jauaka májkueni sési eratseni.
6 No sési jarhasti eskajtsï jukari arhikuarhini* jauaka. ¿Andi nójtsï míteski eska sántku xarhipiti* iámu tsïrerini xarhiperasïnga?
7 Ísï jimbo, kéndita je ióntki anapu xarhipitini* parakajtsï chá jindeuaka jimbanhi tsïreri ma, jimbokajtsï chá ísïiska komueska tsïreri enga no jukaka xarhipiti. Kristu jamberi íntspisti imeeri tsípikuani komueska kéjtsïtakua ma, ima jindeesti karichi sapichu enga Paskua jimbo kéjtsïtanhaka.
8 Ísï jimbo, engachi úntaaka kʼuínchikuani, ju je no ióntki anapu xarhipiti* úrani ka ni imani xarhipiti enga arhikuekajka pekadu ka ambe enga no sési jaka. Sánderu sési, imani kurhindajkuchisï jatsika para arhani enga no xarhipiti jukaka, enga arhikuekajka ambakiti ambe ka jurhimbikua ambe.
9 Karakata ma jimbo, jíksïni karachispka eskajtsï nóteru jámapiringia kúrhiani imeechani* engaksï ísku jándikua ambe niátajka.*
10 Engaksïni ísï karachipka nóksïni arhixapka eskajtsï méntku nóteru jámapiringia kúrhiani ini parhakpini anapu kʼuiripuechani engaksï ísku jándikua ambe niátajka,* engaksï tsititspeni jámajka, engaksï euakuarpini jámajka o engaksï diosï úkateechani kómarhiajka. Jimboka enga ísïipiringa, chájtsï nóteru jatsipiringia para ini parhakpinirhu irekani jarhani.
11 Joperuksïni iásï karachixaka eskajtsï nóteru jámaakia kúrhini imani kʼuiripuni* enga uandajka eska erachiiska* ka jini ísku jándikua ambe niátani jarhani,* tsititspeni jámani, diosï úkateechani kómarhiani jarhani, uandakua ambe jauatatspeni jámani,* kauini jámani o euakuarpini jámani. Méntku asï jáma je indeni kʼuiripuni kúrhini ni sikiera para tʼireni.
12 Jimboka, ¿andisïni ji jusgariuani jaua imeechani engaksï no kúnguarhikuarhu anapueka? ¿Andi no chásï jusgariuajki kúnguarhikuarhu anapuechani,
13 ka no Tata Diosïsï jusgariuajki imeechani engaksï no kúnguarhikuarhu anapueka? “Petanta je kúnguarhikuarhu uératini indeni kʼuiripuni enga xáni no sési ambe niátani jaka”.
Notecha
^ Griegu jimbo pornéia. Exe je Glosario, ísku jándikua ambe.
^ O “no judiueka”.
^ O “ísku jándikua ambe”. Griegu jimbo, pornéia. Exe je Glosario, ísku jándikua ambe.
^ Griegu jimbo: “taati jémbeeri uarhiitini kámaxaka”.
^ Griegu jimbo: “juchiiti espiritu chánksïni jingoni jarhasti”.
^ Griegu jimbo: “Tata Jesúsiiri”.
^ Griegu jimbo: “parajtsï kʼamajkuni ambe enga tsitijka kuerpu enga pekadu jukaraka”.
^ O “kʼúratarakua”.
^ O “jatsijpakuarhini”.
^ O “kʼúratarakuani”.
^ O “kʼúratarakua”.
^ O “sési pájperani imeecha jingoni”.
^ Exe je Glosario, ísku jándikua ambe.
^ Exe je Glosario, ísku jándikua ambe.
^ O “nóteru jámaakia sési pájperani imani kʼuiripu jingoni”.
^ O “ermanueska”.
^ Exe je Glosario, ísku jándikua ambe.
^ O “kʼuiripu máeni enga no sési ambe arhiajka máteruechani”.
