Primeru Karakata para Korintu anapuecha 6:1-20
6 Engajtsï chá jatsika arhirperata ambe máteru nema jingoni, ¿andijtsïsï tekaajki imani juesiichani nirani aianguani engaksï no jakajkutiika ka nójtsï erachiichani* jingoni nirani engaksï pímbinhasïika?
2 ¿Andi nójtsï míteski eskaksï pímbinharhatiicha jusgariuauaka parhakpini anapuechani? Ka engajtsï chá jusgariuauaka parhakpini anapuechani, jiájkani, ¿nójtsï uaa sési peentani indeni ambe enga no xáni kʼéri ambeeka?
3 ¿Andi nójtsï míteski eskachi jucha ánjeliichani jusgariuauaka? Jiájkani, ¿nóchi uaa jusgarini ini parhakpini anapu ambe?
4 Ísï jimbo, enga uétarhini jauaka eskajtsï chá sési peentaaka ambe ma ini parhakpinirhu, ¿andijtsïsï arhiajki paraksï juesiini imani kʼuiripuechani engaksï no ma ambe máeka kúnguarhikuarhu?
5 Jíksïni ísï arhixaka parakajtsï chá kʼuratseaka sáni. ¿Andi no ma achamasï jarhaski chánksïni jingoni enga jánhaskatiika paraksïni jarhuatani sési peentani ambe ma engaksï erachiicha arhirperata ambe jatsiaka?
6 Engajtsï chá arhirperata ambe jatsijka máteru erachini jingoni, chájtsï masi úsïnga juesiichani jingoni nirani engaksï no jakajkutiika.
7 Kʼuratsekua ambeestia engajtsï chá ísï pʼitajkuarhika máteru erachini jusgadurhu. ¿Andi nójtsï uaa tekaantani sáni engaksïni no sési ambe úchini jauaka? ¿Andi no sánderu sési jaua eskaksïni euakuarhiaka ambe ma?
8 Joperu chájtsï erachiichanisï no sési ambe úkuani jaka ka imeechantsïsï euakuarhiani jaka ambe ma.
9 ¿O andi nójtsï míteski eskaksï no pʼiuaka Tata Diosïiri Reinuni imeecha engaksï no sési ambe niátajka?* Asï tontu úkuarhi je.* Ima kʼuiripuecha engaksï ísku jándikua ambe* niátajka, engaksï diosï úkateechani kómarhiajka, temungurhiriicha engaksï enganiarperajka,* tatakeecha engaksï jurajkutakuarhejka paraksï máteru tatakeecha ísku jándikua ambe niátani imeechani jingoni, ka ístu tatakeecha engaksï ísku jándikua ambe niátajka máteru tatakeechani jingoni,*
10 imeecha engaksï sïpani jámajka, engaksï tsititspeni jámajka, engaksï kauini jámajka, imeecha engaksï uandakua ambe jauatatspejka* ka imeecha engaksï euakuarpijka ambe ma, nóksï pʼiuati Tata Diosïiri Reinuni.
11 Ka chájtsï máru ióntki indeni ambe niátasïreenga. Joperu iásï Tata Diosïksïni juparhintastia ka pímbinhajkuntastiksïni Tata Jesukristueri nombri jimbo ka imeeri espiritu santu jingoni ka iásïksïni ísï exesïndia komueska kʼuiripuecha engaksï sési jámajka.
12 Ji sésikua jatsiska parani iámindu ambe úni, joperu no iámindu ambe jarhuajpesïndi. Ji sésikua jatsiska parani iámindu ambe úni, joperuni no jurajkutakuarheaka eskarini inde ambe andaaka.*
13 Tʼirekua jindeesti para sïturhirhu niárani ka sïturhi jindeesti para tʼirekua jima niárani, joperu Tata Diosï kʼamajkuati tʼirekuani ka ístu sïturhini. Ka kuerpu no jindeesti para ísku jándikua ambe* niátani, sánderu sési, jindeesti para Tatani jántspikuni, ka Tata íntskuati kuerpuni ambe enga xáni uétarhinchaaka.
14 Joperu Tata Diosï tsítantasti* Tatani ka juchantsïntujtsïni tsítantaati imeeri uinhapikua jingoni.
15 ¿Andi nójtsï míteski eska chaari kuerpu márku úkuarhintatixaka Kristueri kuerpu jingoni ka ísïjtsï májku kuerpueni? ¿Ojtsï chá exesïni eskaksïni ji jarharitaxaka Kristueri kuerpueri parajtsï márku úkuarhintani uarhiiti ísku jándi ma jingoni? ¡Méntku nómbe!
16 ¿Andi nójtsï míteski eska enga nema kúrhiska uarhiiti ísku jándini ma niárasïnga májku kuerpueni imani jingoni? Jimboka ima uandasïnga: “Tsimarhanksï májku kuerpueuati”.
17 Joperu enga kʼuiripu ma niáraska májku úkuarhini Tata jingoni, májkueni eratsesïndi eska ima.*
18 ¡Sóntku kéndikukuarhi je parajtsï no ísku jándikua ambe* niátani! Ambe uéjki no sési úni* kʼuiripu ma, no no sési úkusïndi imeeri kuerpuni, joperu enga nema ísku jándikua ambe niátajka, imeeri kuerpunisï no sési úkujti.
19 ¿Andi nójtsï míteski eska chaari kuerpu jindeeska templu nani enga espiritu santu jarhajka, inde espiritu santu engajtsï jatsika ka engaksïni Tata Diosï íntskuka? Ístu, chaari kuerpu nóteru chaariistia,
20 jimboka Tata Diosï kánikua maiampiska chánksïni jimbo.* Ísï jimbo, úra je chaari kuerpuni parajtsï Tata Diosïni kʼéri ambe arhini.
Notecha
^ O “ermanuechani”.
^ Imeechanisï arhikuekaani jati engaksï no sési niátajka Tata Diosïni japarini.
^ O “Asï jurajku je eskaksïni nema támisï jánhastaaka”.
^ Exe je Glosario, ísku jándikua ambe.
^ Indenisï arhikuekani jati enga acheeti o uarhiiti ma enga tembuchatini o uambuchatini jakaia niárajka ísku jándikua ambe niátani máteru nemani jingoni.
^ O “tatakeecha engaksï relasioni seksuali jatsijka máteru tatakeecha jingoni”. Griegu jimbo: “tatakeecha engaksï máteru tatakeecha jingoni apondijka”.
^ O “engaksï no sési ambe arhiajka máteruechani”.
^ O “juramuchiaka”.
^ Griegu jimbo pornéia. Exe je Glosario, ísku jándikua ambe.
^ Griegu jimbo: “jauatantasti”.
^ O “ístu májku úkuarhisïndi imeeri espiritu jingoni”.
^ Griegu jimbo pornéia. Exe je Glosario, ísku jándikua ambe.
^ O “Náki uéjki pekadu úni”.
^ O “paraksïni piántani”.
