Primeru Karakata para Korintu anapuecha 7:1-40
7 Ísï jimbo, indeni ambe jimbo engajtsïni chá karachika, sánderu sésiisti eska acheeti ma no jámaaka pʼárhini* uarhiitini ma.
2 Joperu jimboka iápurisï uinintaska ísku jándikua ambe,* eska mándani acheeti kánguarhiaka témbani ka eska mándani uarhiiti kánguarhiaka uámbani.
3 Ka uétarhisïndi eska acheeti kumplirikuaka* imeeri témbani ka eska uarhiitijtu kumplirikuaka imeeri uámbani.
4 Nóteru uarhiitiiriistia imeeri kuerpu, sánderu sési, uámbeeriistia. Ka ístu nóteru acheetiiriistia imeeri kuerpu, sánderu sési, témbeeriistia.
5 Ka chá engajtsï temungurhiriika, asï jáma je arhini chaari uarhiitini o acheetini eskajtsï no márku apondiaka. Joperu engajtsï tsimarhani ísï pakatperaaka eskajtsï ma tiempu no márku apondiaka, uaakajtsï ísï úni parajtsï Tata Diosïni kómarhini ka tátsekuajtsï ménderu jatsiska para márku apondini. Ka ísïksïni Satanási no uaati tsʼéjkuni indeni jimbo engajtsï no újka pʼíngukuarhini.
6 Jíksïni sésikua íntskuxaka parajtsï ísï úni, joperuksïni no juramuchixaka parajtsï meru ísï úni.
7 Joperuni ji uékapiringa eskaksï iámindu tatakeecha ísïipiringa eskani ji. Joperu Tata Diosï mándani arhini kóndeantasïndi: máru paraksï ma ambe úni ka máteruechani paraksï máteru ambe úni.
8 Imeechani engaksï no uambuchatini jaka o tembuchatini ka ístu uarhiitiichani engaksï tsïndiika, arhiasïnga eskaksï sánderu sési jauaka engaksï ísï pakaraaka eskani ji.
9 Joperu engaksï no uaaka pʼíngukuarhini, eskaksï uambuchaaka o eskaksï tembuchaaka, jimboka sánderu sésiiska uambuchani o tembuchani ka eska ísku ambe ma únchani jarhani.*
10 Ísï jimbo, temungurhiriichani ísï juramukuaxaka, joperu no ji, Tatasï ísï juramukuani jati, eska uarhiiti no jámaaka jurajkuni uámbani.
11 Joperu enga uarhiiti jurajkuska uámbani eska no jámaaka uambuchantani, ka enga no uaaka jandiajku jarhani eska kúrhintaaka ménderu uámbani. Ka acheetijtu no jatsisti para jurajkuni témbani.
12 Ka máteruechani ísï arhiasïnga, jísïni ísï arhiani jaka, no Tata, eska enga erachi* ma tembuchatini jauaka no jakajkutini ma jingoni, ka uarhiiti uékani imani jingoni jarhani, eska erachi no jámaaka jurajkuni.
13 Ka enga uarhiiti ma uambuchatini jauaka nemani jingoni enga no jakajkutiika, ka enga ima uékaaka imani jingoni irekani, eska uarhiiti no jámaaka jurajkuni uámbani.
14 Jimboka acheeti ma enga no jakajkutiika, kóndenhantasïndi* imeeri uarhiiti jimbo ka uarhiiti ma enga no jakajkutiika, kóndenhantasïndi* erachini jimbo. Ka enga no ísïipiringa, imeeri uájpeechaksï no kóndenhantapirindi,* joperu iásïksï kóndenhantastia.*
15 Joperu enga no jakajkuti uékaaka jurajkuni, eska jurajkuaka. Ka enga jurajkuska, erachi o pirenchi no jatsisti para uámba o témbani jingoni pakarani. Sánderu sési, Tata Diosïksïni jarhuataxati parajtsï pínandikua jatsini.
16 Uarhiiti, ¿andi nénari míteski tʼu sindi uaa pʼímutantani chiiti acheetini o nómbe? O acheeti, ¿andi nénari míteski tʼu sindi uaa pʼímutantani chiiti uarhiitini o nómbe?
17 Joperu eska mándani arhini ísï jauaka eska Tata Diosï Jeoba na sésikua íntskuka, ísï eska na japka enga Tata Diosï erakupka. Íni ambesïni arhistakuani jaka iámindu kúnguarhikuechani.
18 Enga acheeti ma jiáni erakunhaka enga pasïri pʼikujtsïkupkia tsʼiuerakuani,* jiájkani eska ísï pakaraaka. Joperu enga acheeti ma jiáni erakunhaka enga nótki pasïri pʼikujtsïkuni japka tsʼiuerakuani, eska no jámaaka pasïri pʼikujtsïkuni tsʼiuerakuani.
19 No uétarhisïndi pasïri pʼikujtsïkuni tsʼiuerakuani nijtu no pʼikujtsïkuni. Ambe enga kʼóru uétarhijka, jindeesti úni ambe enga Tata Diosï juramujka.
20 Eska mándani arhini ísï pakaraaka eska na japka jiáni enga erakunhapka.
21 Engari jántspiriipka jiáni engari erakunhapka, asï uandanhia indeni ambe jimbo. Joperu engari arhinhani jauaka parari nóteru jántspiriinia, tʼu jiókuarhi.
22 Jimboka ima kʼuiripu enga jántspiriipka jiáni enga erakunhapka para Tateeri chúxapatiini, iásï nóteru jántspiriistia ka Tateeriistia. Ka májkueni, ima kʼuiripu enga no jántspiriipka jiáni enga erakunhapka, iásï Kristueri jántspiriistia.
23 Tata Diosï kánikua maiampisti chánksïni jimbo;* ísï jimbo, ásteru jámia je kʼuiripuechani jántspikuani.
24 Erachiicha, eska mándani arhini ísï pakaraaka Tata Diosïni japarini eska na japka jiáni enga erakunhapka.
25 Ka Tata no ma amberini arhixati eskani juramukuauaka tumbiichani o uátsïichani,* joperuni ji uékasïnga arhiani na engani exejka ji, jimbokarini Tata pʼamojkuska parani mintsinharhikueni.
26 Ísï jimbo, jimboka iásï uandanhiata ambe jarhaska, ji exesïnga eska sánderu sésiiska eska acheeti ma ísï pakaraaka eska na jaka.
27 Engari tembuchatiika, asï jáma jurajkuni chiiti uarhiitini. Ka engari no tembuchatini jaka, asï jáma tembuchani.
28 Joperu engari tembuchaaka, nóri no sési úni jauaka. Ka enga tumbi ma o uátsï ma* niáraska tembuchani o uambuchani, no no sési úni jauati. Joperuksï uandanhiata ambe jatsiati imeecha engaksï ísï uaaka. Ka ji no uékasïnga eskajtsï chá indeni ambe nitamakuarhiaka.
29 Erachiicha, ístuksïni arhisïnga eska sánderkusï kueratajkia. Ísï jimbo, iásï uératini imeecha engaksï tembuchatiikia, eskaksï ísïiuaka komueska imeecha engaksï no tembuchatini jaka,
30 ka imeecha engaksï uerajka, eskaksï ísïiuaka komueska imeecha engaksï no uerajka; imeecha engaksï tsípijka, eskaksï ísïiuaka komueska imeecha engaksï no tsípijka; imeecha engaksï piájka ambe ma, eskaksï ísïiuaka komueska imeecha engaksï no jatsikuarheka indeni ambe,
31 ka imeecha engaksï marhuatani jaka parhakpinini, eskaksï ísïiuaka komueska imeecha engaksï no kánikua marhuatajka. Jimboka iámu ambe mójtakurhixaka ini parhakpinirhu.
32 Joperu ji no uékasïnga eskajtsï chá uandanhiata ambe jatsiaka. Tataka ma enga no tembuchatini jaka, Tateeri ambe jimbojku uandanhiasïndi para exeni ambe uaa úni para Tata jaiapanhentani.
33 Joperu tataka ma enga tembuchatini jakaia, parhakpini anapu ambe jimbo uandanhiasïndi jimboka uandanhiani jarhasïnga ambe uaa úni para témba jaiapanhentani,
34 ka mámaru ambe eratseni jarhasïndi. Ístu, nanaka enga no uambuchatini jaka ka ístu uátsï ma,* Tateeri ambe jimbojku uandanhiasïndi para imeeri kuerpu pímbinhasï jarhani ka ístu pímbinhasï jarhani ambe enga eratsejka. Joperu nanaka enga uambuchatini jakaia, parhakpini anapu ambe jimbo uandanhiasïndi jimboka uandanhiani jarhasïnga ambe uaa úni para uámba jaiapanhentani.
35 Jíksïni chaari sési jimbosï ísï arhini jaka. Nóksïni ísï arhixaka paraksïni pʼínguni,* sánderu sési, paraksïni jarhuatani ka chá imani ambe úni enga sési jaka ka parajtsï méntku marhuakuni jarhani Tatani ka nóksïni ambe ma ójkutani.
36 Joperu enga nema eratseaka eska no sési úxaka enga no tembuchani jaka, ka enga no jukari sapichueuaka, i ambesï jatsiti para úni: uee ambe enga ima uéjka, no no sési ambe uaati. Eskaksï tembuchaaka.
37 Joperu enga nema mintsita jingoni uandakia eska uaaka ísï jarhani ka no tembuchani, ka eska uaaka pʼíngukuarhini, ka enga mintsita jingoni uandakia eska uaaka jandiajku pakarani, sési uaati.
38 Ísï jimbo, ima enga tembuchajka, sési úsïndi, joperu sánderu sési uaati ima enga no tembuchaaka.
39 Enga acheeti tsípiti jauaka, témba jatsisti para imani jingoni jarhani. Joperu enga uámba uarhiska, ima uaati né uéjki jingoni uambuchantani, joperu kʼóru jatsisti para Tateeri chúxapati ma jingontku uambuchantani.
40 Joperuni ji ísï exesïnga eska sánderu tsípikua jingoni irekaaka enga no uambuchantaaka. Ka ji sési mítetixaka eskani jíjtuni jatsiska Tata Diosïiri espiritu.
Notecha
^ Indenisï arhikuekani jati eska no jámaaka pʼárhini para relasioni seksuali jatsini.
^ Uandakua enga griegu jimbo jindeeka pornéia, uánikua ambe arhikuekasïndi. Exe je Glosario, ísku jándikua ambe.
^ Indenisï arhikuekani jati eska jatsiska para kumplirini relasioni seksuali ambe jingoni.
^ Griegu jimbo: “ka eska tataka ma o nanaka ma jingoni uékani jarhani apondini”.
^ O “ermanu”.
^ Griegu jimbo: “pímbinhajkunhantasïndi”.
^ Griegu jimbo: “pímbinhajkunhantasïndi”.
^ Griegu jimbo: “no pímbinhasïipirindi”. Exe je Glosario, ikichakueni jásï ambe; no pímbinhasï jarhani.
^ Griegu jimbo: “pímbinhasïistia”. Exe je Glosario, ikichakueni jásï ambe; no pímbinhasï jarhani.
^ O “enga na sirkunsidarikuarhipkia”.
^ O “paraksïni piántani”.
^ O “imeechani engaksï no tembuchatini jaka o engaksï no uambuchatini jaka”. Indenisï arhikuekani jati kʼuiripuechani engaksï no méni relasioni seksuali jatsini jaka.
^ O “imeecha engaksï no tembuchatini jaka o engaksï no uambuchatini jaka”. Indenisï arhikuekani jati kʼuiripuechani engaksï no méni relasioni seksuali jatsini jaka.
^ Ixú imani nanakeechani arhikuekaaxati engaksï no méni relasioni seksuali jatsini jaka.
^ Griegu jimbo: “jótatini jatsini”.
