Primeru Karakata para Korintu anapuecha 8:1-13
8 Ka juchachi sési mítetixaka nénasï jaki indeni tʼirekua jingoni engaksï diosï úkateecha kéjtsïtaminhajka. Kʼuiripu ma enga kánikua míteka kʼéramakuarhisïndi, joperu ima kʼuiripu enga xénchpejka uíuinhasï jarhasïndi.
2 Enga nema uandajka míteni ambe ma, útasï no mítexati iámindu ambe.
3 Joperu enga nema xénchajka Tata Diosïni, Tata Diosïjtu mítesti indeni kʼuiripuni.
4 Iásïksïni arhiaka nénasï jaki indeni tʼirekua jingoni engaksï diosï úkateecha kéjtsïtaminhajka. Juchachi mítetixaka eska diosï úkata ma méntku no ma ambe máeska parhakpinirhu, ka ístuchi mítetixaka eska ma Tata Diosïjkusï jaka.
5 Ka nájkirukaksï auandarhu ka echerirhu uánikua diosï arhikateecha jaka, ka ístuksï uánikua “diosïicha” ka uánikua “juramutiicha” jarhani,
6 para jucha májku Tata Diosïjkusï jati, enga jindeeka Taati, imani jimbosï jati iámindu ambe ka juchachi irekaxaka para ima, ka májkusï Tata jati, enga jindeeka tata Jesukristu, imani jimbosï niárati iámindu ambe jarhani ka juchajtuchi imani jimbosï niáraka jarhani.
7 Joperuksï no iáminduecha mítetixati ini ambe. Ka jimbokaksï jarhaska máru engaksï ióntki diosï úkateechani kómarhiauenga, engaksï arhajka indeni tʼirekuani ísïksï exesïndi enajkiksï diosï úkateechani kómarhiani jaki ka jimbokaksï nótki kurhangusïnga tátsekuaksï no sési pʼikuarherani jarhasïndia.*
8 Nójtsïni tʼirekua ambesï jarhuatajti parachi sánderu andarhierani Tata Diosïni. Nóchi ambe ma tsïtaaka engachi no auaka indeni tʼirekuani ka nójtuchi ambe ma andaaka engachi auaka.
9 Chájtsï úsïnga úni ambe engajtsï chá uéjka, joperu xéparini jáma je parajtsï no ma repentku no sési ambe úrani imani enga nótki kurhangujka.
10 Engakeni nema exepiringa tʼungini, engari mítetini jakaia ini ambe, eskari templurhu tʼirexaka jima engaksï diosï úkateecha jaka, ¿andi ima kʼuiripu enga nótki kurhangujka no ísï pʼikuarheraa* eska imajtu uaaka arhani imani tʼirekuani engaksï diosï úkateecha kéjtsïtaminhajka?
11 Ka jimbokari tʼu mítetixakaia indeni ambe, úxakari eska ima enga nótki kurhangujka nóteru jakajkuakia ka imajtu chiiti erachiisti* ka Kristu ístu uarhisti imani jimbo.
12 Engajtsï chá ísï no sési ambe úkuaska chaari erachiichani ka no sésijtsï pʼikuastaani,* chájtsï Kristuni japarinisï no sési ambe úni jarhajka.
13 Enga tʼirekua ambe újka eska juchiiti erachi no sési ambe uaaka,* jimajkani nóteruchkani méni auakia kʼuiripeta ambe parani no no sési ambe úrani juchiiti erachini.
Notecha
^ Griegu jimbo: “imeecheeri konsiensia ikichakua úkuarhisïndi”. Exe je Glosario, konsiensia.
^ Griegu jimbo: “¿andi ima kʼuiripueri konsiensia enga nótki kurhangujka no ísï pʼikuastaa”. Exe je Glosario, konsiensia.
^ O “ermanuesti”.
^ Griegu jimbo: “no sésijtsï úkuani imeecheeri konsiensiani”. Exe je Glosario, konsiensia.
^ O “juchiiti erachi téksarhutaaka”.
