Primeru Karakata para Korintu anapuecha 9:1-27
-
Pablu exeraasïndi nénasï jatsi para jámani apostoli ma (1 a 27)
9 ¿Andi ji no uaa úni ambe engani uékaaka? Ka ¿andi ji no apostoliiski? Ka ¿andi no jísïni exe Jesúsini, juchaari Tatani? Ka ¿andi chájtsï no ixú jarhaskia jimbokani ji xáni ánchikuarhikuska Tatani?
2 Nájkirukaksï máteruecha no jakajkujka eskani apostoliiska, ji sési mítetixaka eskajtsï chá kʼóru jakajkusïnga eskani ji apostoliiska. Jimbokajtsï chá xarhatasïnga eskani ji Tateeri apostoliiska.
3 Arini ambesïni arhiajka imeechani engajtsïni arhinchajka.
4 ¿Andi nóchi sésikua* jatsiski parajtsïni tʼirerani ka parajtsïni itsï íntskuni?
5 Ka ístuchi sésikua jatsiska parachi tembuchani pirenchi ma jingoni* ka juchantsïni jingoni pájtani, ísï eskaksï na újka máteru apostoliicha, ísï eskaksï na újka Tateeri ermanu jémbeecha ka Sefasi,* ¿no ísïiski?
6 ¿O Bernabé ka jíjkusïni jatsi parachi seguiriini jarhani ánchikuarhini parachi kéndakuarhini jarhani?
7 ¿Jaki sondadu ma enga iámindu ambe jandiajku kéndakuarhijka? ¿O jaki nema enga ubasï jatsikuka ka jini no akuntani ubasï? ¿O jaki nema enga karichiichani jámajka eranguani ka jini no arhani sáni lechi?
8 Ambe engaksïni ji arhini jaka, no kʼuiripuechajkuksïsï ísï eratsejti jimboka Moisésiiri Leijtu ísï uandasïnga.
9 Jimboka Moisésiiri Leirhu ísï karakata jarhaska: “Asï jáma kʼarajpe* jatsimukuni toruni enga tʼauatani jarhajka triguni”. ¿Andi Tata Diosï ueecha jimbosï xáni uandanhiajki?
10 ¿O juchantsïni jimbosï uandanhiajki? Ísïisti, juchantsïni jimbosï kararkuarhiti indeni ambe, jimboka ima enga tarhejka ka ístu ima enga tʼauatajka triguni, jatsistiksï para ánchikuarhini ka mintsikani eskaksï intsïnhaaka sáni engaksï na pʼikuntaakia.
11 Ka engachi jucha chaari mintsitarhu ikaraka Tata Diosïiri ambe, ¿andi no sési jarhaski eskajtsïni chá íntskuaka ambe engajtsï jatsikuarheka?
12 Ka engaksï máteru kʼuiripuecha sésikua jatsika parajtsï chá íntsaani ambe ma, ¿andi jucha no sánderu sésikua jatsiski parajtsïni chá íntskuni ambe ma? Joperu nájkirukachi sésikua* jatsika, tekaantaxakachi iámindu ambe jimbokachi no uékasïnga pʼínguni Kristueri ambakiti aianhperakuani.
13 ¿Andi nójtsï míteski eskaksï imeecha engaksï templurhu jántspijka úsïngaksï arhani ambe enga templurhu jaka, ka eskaksï imeecha engaksï altarirhu ánchikuarhijka intsïnhasïngaksï ambe enga altarirhu kéjtsïtanhajka?
14 Ka májkueni, Tata uandasti eskaksï imeecha engaksï uandantani jámajka ambakiti aianhperakuani, eskaksï jatsiska para tʼireranhani ambakiti aianhperakuani jimbo.
15 Ka nájkiruka ísïika, jíksïni no ambe ma kurhacheska. Ka nóksïni ísï karachixaka parajtsïni jarhuatani, jimboka sánderu sési japirindi eskani uarhipiringa ante de... ¡No nemarini uaati euani ini ambe engani jimbo xáni sési pʼikuarherajka!
16 Ka no jatsiska parani arhikuarhini jarhani* jimbokani uandantani jámasïnga ambakiti aianhperakuani, jimbokani jatsiska parani ísï úni. ¡Lástima ji engani no uandantapiringa ambakiti aianhperakuani!
17 Ka engani mintsita jingoni uaaka ini ánchikuarhitani, kóntperata ma jatsiaka; joperu nájkirukani no uékani jauaka ísï úni, jatsiska parani ísï úni, jimbokani jísïni intsïnhaka ini ánchikuarhitani.
18 Jimajkani, ¿nákiiski inde kóntperata engani intsïnhaaka? Uandantani ambakiti aianhperakuani no ma sentabu jimbo. Engani ísï úska, no jámani jauaka kurhajkuarhini ambe ma, nájkirukani sésikua* jatsika parani intsïnhani ambakiti aianhperakuani jimbo.
19 Ji no nemani jántspikusïnga, joperuni iáminduecheeri jántspiri úkuarhiska parani mintsitarhu niárakuani sánderu uánikua kʼuiripuechani.
20 Ji ísï jámaska eskaksï judiuecha na jámajka no na mintsitarhu niárakuani judiuechani. Imeechani jingoni engaksï újka ambe enga lei arhijka, jíjtuni ísï jámaska enajkini újki ambe enga lei arhijka no na mintsitarhu niárakuani imeechani engaksï újka ambe enga lei arhijka nájkirukani ji no újka ambe enga lei arhijka.
21 Imeechani jingoni engaksï no újka ambe enga lei arhijka, jíjtuni ísï jámaska enajkini no újki ambe enga lei arhijka no na mintsitarhu niárakuani imeechani engaksï no újka ambe enga lei arhijka, joperuni ji úxaka ambe enga Tata Diosï juramujka ka ístuni úxaka ambe enga Kristu juramujka.
22 Imeechani jingoni engaksï no xáni uinhapiti jaka, jíjtuni ísï jámaska enajkini no xáni uinhapiti japirini no na mintsitarhu niárakuani imeechani engaksï no xáni uinhapiti jaka. Ji kánikua jánguarhintaska parani iámindu kʼuiripuechani terukukuani, ka ísï úparini, pʼímutantaani máru.
23 Joperu ambakiti aianhperakuani jimbosïni ísï jámajka, jimbokani uékasïnga máteruechantuni aianguani.
24 Karrera ma jimbo uánikua kʼuiripuechaksï andaperani jarhasïndi, joperu ma kʼuiripujkusï andajti ¿no ísïiski? Jiájkani chájtu jánguarhinta je uiriini parajtsï andani.
25 Ísï jimbo, imeecha engaksï andakuekajka chʼanakua ma jimbo,* kánikuaksï pʼíngukuarhisïndi. Ka imeechaksï jánguarhintasïndi paraksï korona ma intsïnhani enga patsïjka, joperuchi jucha jánguarhintasïnga parachi korona ma intsïnhani enga no patsïjka.
26 Ísï jimbo, no ísï uiriixaka enajkini no míte nani niáraa ka nijtuni ísï uarhipeni jaki enajkini tarhiatani kʼuanirakuni jaki.
27 Sánderu sési, atasïnga* juchiiti kuerpuni ka úsïnga eska juchiiti jántspiriuaka, parareni no ma repentku Tata Diosï no jaiapanhentani jíndeni, jíndeni engani máteruechani jorhendaajka.
Notecha
^ Griegu jimbo: “juramukua”.
^ O “nanaka ma jingoni enga jakajkutiika”.
^ Enga ístu arhinheenga Pedru.
^ O “sutumukua”, “bosali”.
^ Griegu jimbo: “juramukua”.
^ O “jatsijpakuarhini jarhani”.
^ Griegu jimbo: “juramukua”.
^ O “imeecha engaksï xáni uiriijka”.
^ O “kastigariisïnga”, “no sési kámasïnga”.
