Primeru Karakata Pedrueri 1:1-25
1 Ji Pedru, tata Jesukristueri apostoliiska, ka karachixakaksïni chánksïni engajtsï ma tiempujku irekani jaka ini parhakpini jimbo, ka engajtsï iámu etsakuarhitini jaka Pontu, Galasia, Kapadosia, Asia ka Bitiniaisï, Tata Diosïksïni chánksïni erakusti.
2 Auandarhu anapu Taati, imaksïni erakusti chánksïni ísï eska ima na eratsekata jatsipkia, ka espiritu santuksïni íntskusti parajtsï chá pímbinhasïintani ka ísï ústi parajtsï chá kurhajchani ka paraksïni pímbinhajkuntani tata Jesukristueri iurhirini jingoni:
Ji kómarhixaka Tata Diosïni paraksïni ima sánderu kánikua kóndentani* ka paraksïni jarhuatani pínandikua jatsini.
3 Eska kʼéri ambe arhinhaaka juchaari Tata Jesukristueri Tata Diosï enga jindeeka imeeri Taati jémba. Ka jimbokajtsïni ima kánikua pʼamojkuska, ústi eskachi jucha ménderu andajpenupiringa parachi imani ambe erokuarhini jarhani enga ióni jamberi jauaka, ka erokuarhixakachi indeni ambe jimboka tata Jesukristu tsíntaska.
4 Ima ústi eskachi ménderu andajpenupiringa parachi intsïnhani imani ambe engajtsïni ima aiachika, inde ambe no méni tereati, pímbinhasïisti ka para méntkisï jauati. Ka inde ambe míndakata jarhastia para chá jini auandarhu.
5 Jimbokajtsï mintsikasïnga, Tata Diosïksïni kuájchakusïndi imeeri uinhapikua jingoni parajtsï úni pʼirani indeni pʼímutantskuani enga últimu jurhiatikuecha* jimbo mítekuarhiaka.
6 Ísï jimbojtsïsï chá kánikua tsípini jaka nájkirukajtsï jatsiaka para ma tiempu kánikua uandanhiani, jimbokajtsï mámaru ambe nitamakuarhini jauaka,
7 engajtsï chá ini ambe nitamakuarhiaka, xarhataakajtsï eskajtsï kánikua mintsikasïnga, ka ísï mintsikani uaati eskajtsï chá sési exenhaaka, eskajtsï kʼéri ambe arhinhaaka ka eskajtsï janhanharhinhaaka ima jurhiatikua enga tata Jesukristu xarhantaaka. Ísï mintsikani, sánderu ambakiti ambeesti eska oru enga niárajka xántkueni nájkiruka chpiri jingoni ambarhenhajka.
8 Nájkirukajtsï chá no méni exeka tata Jesukristuni, xénchasïngajtsï. Nájkirukajtsï iáiasï no exeni jaka chájtsï mintsikasïnga, ka kánikuajtsï tsípixaka, no nema úsïndi uandantani na engajtsï pʼikuarherani jaka xáni tsípini
9 jimbokajtsï pʼímutanhantaskia, indeni ambe jimbojtsïsï chá xáni mintsikajka.
10 Ima Tata Diosïiri uandakua páriicha* engaksï uandantapkia eskajtsï chá ísï kánikua kóndenhantapiringa, jámasptiksï kurhanguarhini ka jánguarhintasptiksï míteni néneepirini inde pʼímutantskua.
11 Imaksï seguiriispti jánguarhintani míteni káni ka na jatini úkuarhipirini ambe enga espiritu santu arhiapka Kristueri ambe. Ka inde espiritu santu engaksï imeecha jatsipka, tʼuini uandarixaptia na enga no sési nitamakuarhipiringa Kristu ka na enga tátsekua kʼéri ambe únhapiringa.
12 Ka imeechaksïsï aiangunhati eskaksï no imeechani jimbosï jámani japka jántspini, sánderu sési, chánksïnisï jántspicheni japti, ka eska ambe engaksï uandantani jámeenga jindeeska ambe engaksïni chánksïni aianguka imeecha engaksï ambakiti aianhperakuani jámeenga uandantani espiritu santu jimbo enga auandarhu uératini jurhajka. Ka ánjeliichaksï jamberi uékaxatiia ini ambe míteni.
13 Ísï jimbo, listu jatsi je chaari eratsekuani parajtsï uinhamu ánchikuarhini, seguiriini ja je jánguarhintani méntkisï sési eratseni, erokuarhi je ka kánikua mintsika je eskaksïni Tata Diosï kánikua kóndentaaka jiáni enga tata Jesukristu xarhantaaka.
14 Ísï eskaksï sapiicha engaksï kurhandirajka, ásteru jurajkutakuarhi jeia parajtsï imani ambe úni ambe engajtsï ióntki pʼindepka úni jiáni engajtsï no mítepka imani;
15 sánderu sési, chájtu májkueni pímbinhasïi je ambe uéjkijtsï úni, ísï eska na pímbinhasïika ima engaksïni ióarhika,
16 jimboka ísï karakata jarhaska: “Chájtsï jatsiska para pímbinhasïini jimbokani ji pímbinhasïiska”.
17 Ka engajtsï chá andarhieraska Taatini, imani enga iáminduechani májkueni jusgariuajka imeecheeri úkuecha jimbo, méntkisï chénharhi je* engajtsï jamberi ini parhakpinirhu irekani jauaka.
18 Chájtsï indeni irekuani páxapka enga méntku no marhuajka, ísï eskaksïni chaari ióntki anapu parientiicha na jorhendaka,* joperujtsï mítetixaka eskajtsï pʼímutanhantaska,* ka nójtsï indeni ambe jingoni pʼímutanhantaska enga terejka, plata ambe jingoni o oru ambe jingoni.
19 Sánderu sési, chájtsï ambakiti iurhiri jingonisï pʼímutanhantaka, komueska karichi sapichueri ma enga iámindu ambe jimbo sési jaka ka enga pímbinhasï jaka, jo Kristueri iurhiri jingoni.
20 Ísïisti, ima tʼuini erakunhasptia ante de ueenani jarhani i parhakpini, joperu chánksïni jimbo, ima jiáni xarhantasti engaksï na kʼamakurhini japkia i jurhiatikuecha.
21 Imani jimbo, chájtsï jakajkusïnga Tata Diosïni, imani enga tsítantaka ka enga kʼéri ambe úka parakajtsï chá úpiringa jakajkuni ka mintsikani Tata Diosïni.
22 Chájtsï niáraskia ísï xénchperani enajkijtsï iáminduecha ermanutiipirini ka chájtsï no ísku apariiska, indeni jimbo engajtsï chá pímbinhajkunhantakia, jimbokajtsï úsïnga ambe enga jurhimbikua ambeeka, ísï jimbo, mintsita jingoni xénchpera je iáminduecha.
23 Jimbokajtsï chá intsïnhaska sésikua parajtsï ménderu andajpenuni, joperu no indeni semiia* jimbo enga terejka, sánderu sési indeni semiia jimbo enga no méni terejka enga jindeeka Tata Diosïiri uandakua, inde Tata Diosïiri enga tsípiti jaka ka enga méntkisï jauaka.
24 Jimbokaksï “iámindu kʼuiripuecha ísïiska eska uitsakua ambe ka na engaksï sési jáxeka ísïisti komueska tsïtsïki enga juátarhisï jukajka; uitsakua ambe kʼarhisïndi ka tsïtsïki jupinasïndi,
25 joperu Tata Diosï Jeobaeri uandakua para méntkisï jauati”. Ka inde “uandakua” jindeesti ambakiti aianhperakua engajtsï chá aiangunhakia.
Notecha
^ Exe je Glosario, Tata Diosï kánikua kóntpintasïndi.
^ O “enga últimu tiempu”.
^ O “profeteecha”.
^ O “janhanharhi je”.
^ O “na jurajkuchika pʼindekua”.
^ Griegu jimbo: “euajpinhantaska”.
^ Indeni semiianisï arhikuekajti enga újka frutu jukani.
