Primeru Karakata Pedrueri 2:1-25
-
Jatsiskachi para tsitini Tata Diosïiri uandakuani (1 a 3)
-
Tsakapuecha engaksï tsípiti jaka para kʼumanchikua ma úni espiritu santu jimbo (4 a 10)
-
Ísï irekani parhakpinirhu enajkichi no ixú anapuepirini (11 ka 12)
-
Neechanchisï jatsi para janhanharhiani (13 a 25)
-
Kristujtsïni exerasti na engachi jatsika para jámani (21)
-
2 Ísï jimbo, ásteru jáma je no sési ambe niátani,* támisï jánhastpini, asï jáma je ísku apariini, enbidiarpini ka nijtu uandakua ambe jauatatspeni.
2 Ísï eskaksï charhakuecha na anhenchajka amambeeri lechi, chájtujtsï jatsiska para májkueni tsitini Tata Diosïiri uandakuani; indeni jimbojtsï kʼuiripeaka ka niáraakajtsï pʼímutanhantani,
3 joperu engajtsï na exeakia* na enga xáni sési kámpijka Tata.
4 Kʼuiripuechaksï no jaiapanhentasti imani tsakapuni enga tsípiti jaka, joperu Tata Diosï imanisï erakuti ka kánikua ambakiti ambeesti para ima. Engajtsï jamberi andarhierani jauaka imani,
5 chá engajtsï ísïika komueska tsakapuecha engaksï tsípiti jaka, chájtsï kʼumanchikua máeska enga espiritu santu jimbo únhaka, parakajtsï pímbinhasï saserdotiiuaka ka parajtsï kéjtsïtakua ambe úkuni, ísï eska Tata Diosïiri espiritu na uandajka ka ísï eska Tata Diosï na jaiapanhentajka tata Jesukristuni jimbo.
6 Jimboka Karakateecharhu ísï uandasïnga: “¡Exe je! Sioni peeraxaka imani tsakapuni engani ji erakuka, sési jásï ka ambakiti tsakapu pítsekueri,* ima enga mintsikaaka indeni tsakapuni, no méni no sési pʼikuastanhaati”.*
7 Ísï jimbo, ima ambakiti ambeesti para chá, jimbokajtsï chá jakajkusïnga. Joperu para imeecha engaksï no jakajkujka, “ima tsakapu engaksï kʼumanchikua úriicha no jiókuarhika, ima jindeesti sánderu ambakiti tsakapu”,*
8 ka “tsakapu ma enga téksarhutaraajka kʼuiripuechani ka enga kuáskuajka”.* Imeechaksï téksarhutasti jimbokaksï no úsïnga ambe enga Tata Diosïiri uandakua arhijka. Ka ini ambe jimboksïsï erakunhati.
9 Joperujtsï chá “imani kʼumanchikuarhu anapueska enga erakunhaka, jindeeskajtsï saserdotiicha ka reiicha, pímbinhasï ireta ma, ireta ma enga kánikua ambakitiika, parakajtsï iápurisï jámaaka uandantani ambakiti ambe”* imeeri ambe engaksïni ióarhika parajtsï ambakiti tʼíntskuarhu niárani ka parajtsï nóteru pápkʼandu jarhania.
10 Jimbokajtsï ióntki, chájtsï no jindeespka ireta ma, joperujtsï iásï Tata Diosïiri ireteeskia; chájtsï ióntki no pʼamojkunhaspka, joperujtsï iásï pʼamojkunhaskia.
11 Juchiiti erachiicha* engaksïni ji xáni xénchajka, jimbokajtsï chá no ixú anapueska ka jimbokajtsï ma tiempujkusï irekaaka ini parhakpini jimbo, jíksïni kómarhixaka eskajtsï seguiriini jauaka pʼíngukuarhini parajtsï no úni ambe enga chaari kuerpu xáni tsitijka, inde ambe engajtsï chá xáni jánguarhintani jaka parajtsï nóteru tsitinia.
12 Jánguarhinta je sési jámani kʼuiripuechani japarini paraka jiáni enga uandanhani jauaka eskajtsï chá no sési ambe úxaka, imeechaksï exeaka eskajtsï chá ambakiti ambe úsïnga, ka ísï jimbo kʼéri ambeksï arhini Tata Diosïni jiáni enga ima juuaka exeni ambe enga xáni úkuarhini jaka.
13 Tatani jimbo, janhanharhi je iámindu ambe* engaksï kʼuiripuecha uaxastakia, komueska reini, jimboka kʼéri ambeeska,
14 o juramutiichani, jimboka inde axaaska para kastigariuani imeechani engaksï no sési ambe niátajka ka paraksï kʼéri ambe arhiani imeechani engaksï sési jámajka.
15 Jimboka ambe enga Tata Diosï uéjka jindeesti eskajtsï chá sési jámaaka parakajtsï pínasku jatsiauaka* imeechani engaksï no jánhaskajka ka engaksï ísku jatini uandajka ambe ma.
16 Ísï ireka je komueska kʼuiripuecha engaksï no jántspiriika, joperu asï jáma je uandani* eskajtsï uaaka no sési ambe niátani jimbokajtsï no jántspiriiska, sánderu sési, Tata Diosïni jántspiku je.
17 Janhanharhia je iámindu jásï kʼuiripuechani, xénchaa je iámindu erachiichani, chénharhi je* Tata Diosïni, janhanharhi je reini.
18 Eskaksï imeecha engaksï jántspini jámajka, méntkisï kurhajchauaka patroni jémbeechani ka eskaksï janhanharhiauaka ísï eskaksï na jukanchaka, joperu no imeechantku engaksï sési jámajka ka engaksï kurhangutspijka, sino ístu imeechani engaksï no ma ambe jaiapanhentani jarhajka.
19 Jimboka Tata Diosï kánikua jaiapanhentasïnga enga nema tekaantajka jiáni enga uandanhiata ambe jatsijka* ka enga no sési nitamakuarhijka, nájkiruka no ma ambe no sési úka jimboka uékasïnga sési jarhani* Tata Diosïni japarini.
20 Engaksïni ataaka jimbokajtsï no sési ambe niátaska, ¿ambejtsï andaa engajtsï tekaantaaka? Joperu Tata Diosï kánikua jaiapanhentasïndi engajtsï chá tekaantajka jiáni engajtsï no sési nitamakuarhini jarhajka jimbokajtsï sési jámasïnga.
21 Ka chájtsï jimbosï ióarhinhaka, jimboka Kristu jamberi no sési nitamakuarhiska chánksïni jimbo, ka ísïksïni exerasti na engajtsï jatsika para jámani, parakajtsï chájtu jánguarhintapiringa májkueni jámani eska ima.*
22 Ima no méni no sési ambe niátasti ka no méni chkuanderasti.*
23 Engaksï no sési arhini japka, ima no pʼiáraspti no sési arhiani. Enga kómu nitamakuarhini japka, no chéraaspti arhipariani eska imajtu no sési ambe úkuapiringa. Sánderu sési, iámindu ambe imani jurajkukuspti enga sési jusgarpijka.
24 Imeeri kuerpurhu paasti juchaari pekaduechani jiáni enga chkarirhu* cháparhatanhapka, parakachi uarhipiringa pekaduechani jimbo* ka parakachi irekapiringa parachi iásï sési jámania. Ka “indeni jimbo enga ima ísï atanhaka, chájtsï ambakeranhantaskia”.
25 Jimbokajtsï chá ísï jarhaspka komueska karichiicha engaksï tsïnchetini jámani jarhajka, joperujtsï iásï andarhientaskia karichi erangutini, imani enga kuáni jaka chaari tsípikuani.*
Notecha
^ O “jurajkia je no sési jásï ambe”.
^ O “míteakia”.
^ O “eskinarhu anapu tsakapu”.
^ O “no kʼuratsetanhaati”.
^ O “eskinarhu anapu tsakapu”. Indeni tsakapunisï arhikuekani jati enga kʼumanchikuarhu karhakua jukeenga para eskinani ma jójtsïtani para sánderu uíuinhasï jarhani.
^ O “enga ikiataajka”.
^ Griegu jimbo: “uandantani sési jásï ambe”. Indenisï arhikuekani jati na enga jásïika ka ambe enga xáni újka enga jimbo jatsika para kʼéri ambe arhinhani.
^ O “ermanuecha”.
^ O “janhanharhi je juramukuani”.
^ Griegu jimbo: “jupimukuani”, “sutumukua jatsimukuani”, “bosali jatsimukuani”.
^ O “indeni ambe arhiparhatani parajtsï uandani”.
^ O “janhanharhi je”.
^ O “enga kómu nitamakuarhini jarhajka”, “enga no sési pʼikuarherani jarhajka”.
^ O “ambakiti konsiensia ma jatsini”. Exe je Glosario, konsiensia.
^ O “jima atastani nani enga ima atastaka”.
^ O “ka nijtu uandani ambe ma para támisï jánhastpini”.
^ O “anhatapurhu”.
^ O “parachi nóteru jántspiriini pekadueri”.
^ O “chaari almani”.
