Primeru Karakata Pedrueri 3:1-22
3 Chájtu májkueni ú je uarhiitiicha, méntkisï kurhajchaa je* chaari acheetiichani, parakaksï imeecha engaksï no újka ambe enga Tata Diosïiri uandakua arhijka, niáraaka jakajkuni nájkirukajtsï chá no ma ambe arhiauaka, jimbokajtsï sési jámasïnga,
2 jimbokaksï imeecha exeaka na engajtsï sési jámajka* ka eskajtsï kánikua janhanharpisïnga.
3 Ka parajtsï chá sési xarharani, no uétarhisïndi eskajtsï sánderu jánguarhintani jauaka tepeni jauirini,* orueri ambe jukani ka nijtu imani takusï jukani enga kánikua jukaparhaka,
4 sánderu sési, parajtsï chá sési xarharani uétarhisïndi eskaksïni máteruecha exeaka na engajtsï jásï kʼuiripueka chaari mintsitarhu, ísï jimbo, jánguarhinta je pínandikua jatsini ka iatsitakuarhu jámani,* jimboka indeni ambe jimbojtsïsï sési xarharaaka ka Tata Diosï kánikua sési exesïndi indeni ambe ka inde ambesï no méni kʼamakurhijti.
5 Jimbokaksï ísï sési xarharasïreenga ióntki anapu uarhiitiicha engaksï pímbinhasïipka ka engaksï mintsikeenga Tata Diosïni, imeechaksï méntkisï kurhajchaasïreendi* uámbeechani,
6 ísï eska Sara na kurhajcheenga Abraánini ka arhisïreendi tata. Chájtsï imeeri uájpeeuaka* engajtsï seguiriini jauaka sési ambe úni ka nójtsï jurajkutakuarheni eskaksïni chétapu andaaka.
7 Ka chájtu acheetiicha, seguirii je chaari uarhiitiicha jingoni irekani ka sési kurhangukuani.* Nanakechaksï no xáni uinhapisti, ísïistiksï komueska jatakua ma enga sánderu sóntku kakakuarhijka, ísï jimbo, janhanharhia je jimboka Tata Diosï indeechantu kóndeantaska ka tsípikua íntsaasti ísï eskaksïni chánksïni na íntskuka, ka engajtsï chá no ísï úska, Tata Diosïksïni no kurhajchaati engajtsï kómarhini jauaka.
8 Ka parani kʼamarania, májkueni eratsi je* iáminduecha ka kurhangukua je máteruechani, ísï xénchpera je enajkijtsï iáminduecha ermanutiipirini, pʼamojpera je ka kaxumbikua jingoni jáma je.
9 Engaksïni kʼuiripuecha no sési ambe úchiaka chá asï jáma je májkueni kaani, ka engaksïni no sési ambe arhiaka chájtu asï jáma je no sési arhiani. Sánderu sési, sési arhia je, jimbokajtsï chá indeni ambe jimbosï ióarhinhaka, parajtsï kóntperata ma pʼirani.
10 Jimboka “ima enga uéjka tsípikuarhini ka sési nitamakuarhini mándani jurhiatikua, jatsisti para pʼímukukuarhini* ka no jámani no sési ambe uandani, nijtu chkuanderani.
11 Eska no jámaaka no sési ambe niátani ka eska imani ambe uaaka enga sési jaka; eska jánguarhintaaka iáminduecha jingoni sési pájperani* ka eska seguiriini jauaka jánguarhintani ísï úni.
12 Jimboka Tata Diosï Jeoba exeani jarhasïnga imeechani engaksï sési jámajka ka kurhaasïndi engaksï kómarhijka, joperu Tata Diosï Jeoba támisï eraasïndi* para no exeani imeechani engaksï no sési ambe niátajka”.
13 Ka ¿néksïni no sési ambe úchia enga chá tsípikua jingoni jánguarhintani jauaka sési ambe úni?
14 Joperu nájkirukajtsï no sési nitamakuarhini jauaka jimbokajtsï sési jámasïnga, chájtsï kánikua tsípiaka. Joperu asï jáma je chérhini indeni ambe engaksï imeecha chérhijka* ka asï jáma je uandanhiani.
15 Sánderu sési, mintsita jingoni jiókuarhi je eska Kristu jindeeska Tata ka eska pímbinhajkunhantaska, méntkisï jingontku ja je parajtsï úni mókukuantani imeechani engaksïni kurhamarhiaka indeeri ambe engajtsï mintsikajka,* joperu iatsitakuarhu ka kánikua janhanharhikua jingoni aiangua je.
16 Méntkisï sési jáma je Tata Diosïni japarini* parakaksï kʼuratsetanhaaka imeecha engaksï no sési ambe uandajka chaari ambe, ambe uéjkiksï uandani, jimbokajtsï chá méntkisï sési jámasïnga jimbokajtsï Kristueri chúxapatiiska.
17 Ka enga Tata Diosï jurajkuska eska ísï úkuarhiaka, sánderu sésiisti eskajtsï no sési nitamakuarhiaka jimbokajtsï sési ambe úsïnga ka no jimbokajtsï no sési ambe niátasïnga.
18 Jimboka Kristu ma ueltajkusï uarhika ka para méntkisï juchaari pekaduecha jimbo, ambakiti kʼuiripu ma uarhisti no sési úriichani jimbo,* para úni eskajtsï chá úpiringa Tata Diosïni andarhierani. Kʼuiripu máespti enga uándikunhapka, joperu enga Tata Diosï tsítantapka, espiritu máesptia.
19 Ka enga espiritu máepkia, niraspti aianguani eskaksï kastigarinhaaka ima espirituecha engaksï ónhakata jaka,
20 imeecha engaksï Noéri jurhiatikuecha jimbo no kurhandirapka. Imani jurhiatikuecha jimbo, Tata Diosï erokuarhixapti ka tekaantaxapti* enga jamberi arka únhapiringa, inde arka enga itsïirhisï paapka namunitu kʼuiripuechani paraksï pʼímutanhantani ka ochu kʼuiripuesptiksï.*
21 Inde ambe arini ambe jingoni terukuntasïndi, ambe engaksïni iásï chánksïntu pʼímutantani jakaia, enga jindeeka itsï atakuarhini* tata Jesukristueri tsíntskua jimbo, itsï atakuarhini no jindeesti para kénditani ambe enga kuerpu jáxeka, sánderu sési, jindeesti para kurhakuni Tata Diosïni eskachi sési jauaka imani japarini.*
22 Tata Jesukristu, Tata Diosïiri jurhijkandani jimbo jarhasti jimboka auandarhu karhanchentaska, ka Tata Diosï kʼéri ambe ústi parakaksï imani kurhajchaaka ánjeliicha, juramutiicha ka imeecha engaksï uinhapikua jatsika.
Notecha
^ O “janhanharhia je”.
^ O “na engajtsï pímbinhasï jámajka”.
^ O “jukari újtsïntani”.
^ O “iatsitakuarhu eratseni”, “iatsitakuarhu uandani”.
^ O “janhanharhiasïreendi”.
^ O “imeeri nanakeecheuaka”.
^ O “ka pʼamojkuani”.
^ O “májku eratsekua káma je”.
^ O “pʼínguni katambani”.
^ O “pínandikua jatsini”.
^ O “pʼirhikuarhisïndi”.
^ O jamberi “indeni ambe engaksï imeecha uandajka paraksïni chérani”.
^ O “engajtsï erokuarhini jaka”.
^ O “Méntkisï ambakiti konsiensia ma jatsi je”. Exe je Glosario, konsiensia.
^ O “uarhisti kʼuiripu ma enga sési jámajka imeechani jimbo engaksï no sési jámajka”. Exe je Glosario, sési jámani.
^ Griegu jimbo: “Tata Diosï tekaantskua jingoni erokuarhixapti”.
^ O “ka ochu almeechajkuesptiksï”.
^ Exe je Glosario, itsï atakuarhini; itsï atani.
^ O “eskachi ambakiti konsiensia ma jatsiaka”. Exe je Glosario, konsiensia.
