Primeru Karakata Pedrueri 5:1-14
5 Jíjtuni orhejtsïkutiiska, ka exeska na enga no sési nitamakuarhika Kristu, ka jíjtuni pʼiuaka indeni xáni kʼéri ambe enga niáraaka mítekuarhini, jimbosïni ini ambe kurhakuani jaka* imani orhejtsïkutiichani engaksï chánksïni jingoni jaka:
2 chá engajtsï marhuani jaka komueska orhejtsïkutiicha,* ísï eska karichi eranguti ma, exeani ja je Tata Diosïiri karichiichani engaksïni ima jurajkuchiaka; joperu asï jáma je afuersa ísï úni, sánderu sési, tsípikua jingoni ísï ú je Tata Diosïni japarini; ka nijtu para andakuekani, sánderu sési, jánguarhinta je mintsita jingoni ísï úni;
3 ka ístu, asï ísï jáma je enajkijtsï chá juramukuapirini imeechani engaksï Tata Diosïiri erensieka; sánderu sési, chá ueena je sési jámani parakaksï karichiicha májkueni jámaaka.
4 Ka enga na xarhantaakia sánderu kʼéri karichi eranguti, chájtsï intsïnhaaka imani koronani enga xáni kʼéri ambeeka ka enga no patsïjka.
5 Ka ístu chá tatakeecha engajtsï sánderu sapichueka, kurhajchaa je achamasïichani engaksï sánderu jatiriikia. Joperu, iáminduechajtsï jatsiska para kaxumbikua jingoni kámberani,* jimboka Tata Diosï no jaiapanheantasïnga imeechani engaksï kʼéramakuarhijka, joperu kóndeantasïndi imeechani engaksï kaxumbitiijka.
6 Ísï jimbo, kaxumbikua jingoni kurhajcha je Tata Diosïni ka imeeri jájkirhu niára je enga xáni uinhapitiika, paraka ima uaaka eskajtsï kʼéri ambe exenhaaka jiáni enga tiempueuaka,
7 ka imani jurajkuku je* ambe engaksïni xáni uandanhiatajka,* jimboka ima uandanhiasïnga chánksïni jimbo.
8 ¡Jánguarhinta je méntkisï sési eratsentani ambe ma ka jingontku ja je! Jimboka Noambakiti, ima engaksïni xáni ikiachejka, jimintkisïksïni jánchexati komueska leoni ma enga méntku mintsirani* jaka ka enga jini ka jini jámani jaka para nemani ántani.*
9 Joperu kánikua mintsikaparini, uinhamu anhaxurhiku je Noambakitini, jimbokajtsï míteska eskaksï iámindu erachiicha* iámu parhakpinirhu májkueni kómu nitamakuarhixaka.
10 Joperu engajtsï na kómu nitamakuarhiakia ma tiempu, ima Tata Diosï enga kánikua kóntpintajka ka engaksïni ióarhika parajtsï Kristu Jesúsini jingoni jarhani ka parajtsï kʼéri ambe exenhani para méntkisï, imaksïni kʼamaraati sési jorhendani iámindu ambe. Ima uaati eskajtsï uíuinhasï jauaka, imaksïni jarhuataati parajtsï no méni jurajkuni ka ima uaati eskajtsï sési anhaxurhitini jauaka.
11 Imeeriisti uinhapikua para méntkisï. Eska ísï úkuarhiaka.
12 Silbanu,* erachi ma enga mintsinharhikueka, inderini jarhuatasti karani ini karakatani engaksïni axacheni jaka; ini ambejkuksïnisï karachika paraksïni uinhaperantani ka paraksïni aianguni eskaksïni Tata Diosï kánikua kóndentasïnga. Jánguarhinta je parakaksïni Tata Diosï méntkisï kóndentaaka.
13 Uandajperataksïni ma axachexati pirenchi* enga Babilonia jaka, imajtu erakunhasti ísï eska chá; ka ístuksïni uandajperata ma axachexati Markusï, enga jindeeka juchiiti sapi.*
14 Engajtsï uandajperaaka, putinharhikpera je jimbokajtsï xénchperasïnga.*
Eskajtsï pínandikua jatsiaka iámindu chá engajtsï Kristu Jesúsini jingoni jaka.
Notecha
^ O “arhiani jaka”.
^ O “chá engajtsï jingontku kuáni jaka”.
^ Griegu jimbo: “kaxumbitiini enga ísïika eska takusï ma jukani”.
^ O “ka jurajku je eska ima paaka”.
^ O “ambe engaksïni no nani máru pʼikuastajka”.
^ O “enga uinhamu nurumani”.
^ O “ka enga jirinhani jaka néni ántani”.
^ O “ermanuecha”.
^ Enga ístu arhinheenga Silasi.
^ Jamberi kúnguarhikuani ma arhikuekani jati.
^ O “juchiiti uátsïti”.
^ O “jimbokajtsï erachiiska”.
