Primeru Karakata para Timoteu 1:1-20
1 Ji Pablu, Kristu Jesúsiiri apostoliiska jimboka Tata Diosï ísï uandaska, ima engajtsïni pʼímutantaka, ka ístu jimboka ísï uandaska Kristu Jesúsi, indeni jimbochisï jucha iásï ambakiti ambe erokuarhini jakaia.
2 Karachixakakeni tʼungini Timoteu,* jíkeni tʼungini ísï exesïnga komueska juchiiti sapi,* jimbokari tʼujtu májkueni mintsikasïnga eskani ji:
Ji kómarhisïnga eska Tata Diosï, enga jindeeka Taati, ka ístu Kristu Jesúsi enga jindeeka juchaari Tata, eskaksïni kánikua kóndentaaka,* eskaksïni pʼamojkuaka ka eskaksïni jarhuataaka parari pínandikua jatsini.
3 Engani nirani jámeengia Masedonia, jíkeni arhispka eskari Éfesu pakarapiringa ka iásïjtukini májkueni arhixaka, parakari arhiauaka imeechani engaksï máteru ambe jorhentpini jaka eskaksï no jámaaka chkuanderakua ambe jorhentpini,
4 eskaksï no jámaaka kurhandini ísku uandantskua ambe, nijtu ióntki anapu parienticheeri ambe. Inde ambe ísku ambe máesti jimbokaksï kʼuiripuecha úndasïnga mámaru ambe eratseni ka nóksï ambe ma jorhenguarhisïndi Tata Diosïiri ambe paraksï úni sánderu mintsikani.
5 Ka jíkeni ísï arhixaka* jimbokani uékasïnga eskajtsï chá xénchperaaka joperu ambakiti mintsita ma jingoni, eskajtsï sési jauaka Tata Diosïni japarini* ka mintsita jingoni mintsikaparini Tata Diosïni.
6 Ka jimbokaksï máru nóteru uékaskia ini ambe úni, ísku jatinksï úndasti arhirperani máteruecha jingoni.
7 Uékasïndiksï leiiri ambe jorhentpini, joperuksï méntku no kurhangusïndi imani ambe engaksï uandajka ka nijtu ambe engaksï uandajka míteni.
8 Ka juchachi míteska eska Lei ambakiti ambeeska, joperu jiántku engaksï kʼuiripuecha ísïmindu uaaka eska jima na uandajka,
9 ístu, lei no jindeesti para imeecha engaksï sési jámajka, sánderu sési, jindeesti para imeecha engaksï no újka ambe enga lei uandajka ka para imeecha engaksï méntku no uéjka kurhandirani, para imeecha engaksï no janhanharpijka ka para imeecha engaksï pekadoriika, para imeecha engaksï jurajpini jámajka,* ka para imeecha engaksï méntku no janhanharhijka Tata Diosïiri ambe, para imeecha engaksï uándikuajka taati jémbeechani ka para imeecha engaksï uándikuajka amambeechani, para imeecha engaksï uándikpini jámajka
10 ka para ima kʼuiripuecha engaksï ísku jándikua ambe* niátajka, para ima tatakeecha engaksï ísku jándikua ambe niátajka máteru tatakeecha jingoni* ka para imeecha engaksï sekuestrarpini jámajka, para imeecha engaksï chkuanderajka ka para imeecha engaksï ísku jatini jurariijka ka para iámindu ima ambe enga no terukuntajka ambakiti jorhenguarhikua jingoni;*
11 ka i ambakiti jorhenguarhikua, terukuntasïndi indeni ambakiti aianhperakua jingoni enga xáni kʼéri ambeeka ka enga ima Tata Diosïiriika enga xáni tsípijka, ka ji arhinhaska parani uandantani jámani.
12 Ji diosmaiamukua arhisïnga Kristu Jesúsini, enga jindeeka juchaari Tata, imarinisï íntskuti uinhapikua jimbokarini mintsikaska engareni ísï jurajkuchika ini ánchikuarhitani,
13 nájkirukani no sési ambe uandeenga Tata Diosïiri ambe ka nájkirukani no sési káuenga imeeri iretarhu anapuechani ka kʼéramakuarhini. Joperu imarini pʼamojkusti jimbokani ji no míteparinisïni ísï jámeenga ka jimbokani méntku no mintsikasïreenga.
14 Joperureni juchaari Tata kánikua kóndentasti ka jarhuatastirini parani ji sánderu mintsikani ka Kristu Jesúsirini niárasti xénchani.
15 I ambe meru ísïisti ka iáminduechaksï jatsipirindi para jakajkuni ini ambe: Kristu Jesúsi jurhasti parhakpinirhu para pʼímutaantani pekadoriichani. Ka iáminduecheeri, ji sánderuni pekadoriiska.
16 Ka nájkirukani ji sánderu no sési úriika, ji pʼamojkunhaska ka Kristu Jesúsirini kánikua tekaachintasti, parakaksï kʼuiripuecha exeaka eska imeechantu tekaakuantauaka, imani kʼuiripuechani engaksï niáraaka jakajkuni imani paraksï jatsini tsípikua para méntkisï.
17 Eska méntkisï janhanharhinhaaka ka kʼéri ambe arhinhani ima Juramuti enga jindeeka para méntkisï, ima enga no méni uarhiaka, ima enga no nema újka exeni, inde máechakua Tata Diosï enga jaka. Eska ísï úkuarhiaka.
18 Timoteu, jíkeni ini ambe arhixaka* iju, ísï eskaksï na uandapkia Tata Diosïiri uandakua páriicha* chiiti ambe, paraka indeni ambe jimbo enga uandanhaka, tʼu seguiriini jauaka sési uarhipeni ini uarhiperakuani jimbo enga xáni ambakitiika,
19 ka ístu seguiriini ja mintsikani ka sési jarhani Tata Diosïni japarini,* máruksï nóteru mintsikastia jimbokaksï nóteru úskia ini ambe ka ísïksï jarhastia komueska barku ma enga iámu inchamejka itsïirhu.
20 Máru kʼuiripuecha engaksï ísï nika, jindeesti Imeneu ka Alejandru, ka ji, Satanásini jurajkukuaska ka xukaaska parakaksï nóteru jámaakia no sési ambe uandani Tata Diosïiri ambe.
Notecha
^ Enga arhikuekajka ‘ima enga kʼéri ambe arhijka Tata Diosïni’.
^ O “uátsïti”.
^ Exe je Glosario, Tata Diosï kánikua kóntpintasïndi.
^ O “arhistachixaka”, “juramuchixaka”.
^ O “ambakiti konsiensia ma jingoni”. Exe je Glosario, konsiensia.
^ O “para imeecha engaksï no sáni xénchpejka”. Ístu uaati ísï kurhangukuarhini eska nema jurajkuska Tata Diosïni ka eska nóteru kómarhisïngia.
^ Exe je Glosario, ísku jándikua ambe.
^ O “tatakeecha engaksï relasioni seksuali jatsijka máteru tatakeecha jingoni”. Griegu jimbo: “tatakeecha engaksï máteru tatakeecha jingoni apondijka”.
^ O “imani jorhenguarhikua jingoni enga kánikua marhuajka”, “imani jorhenguarhikua jingoni enga sési útspijka”.
^ O “arhistachixaka”, “juramuchixaka”.
^ O “profeteecha”.
^ O “ka ambakiti konsiensia ma jatsini”. Exe je Glosario, konsiensia.
