Primeru Karakata para Timoteu 3:1-16
3 I ambe engani uandaaka, meru ísïisti: enga tataka* ma jánguarhintani jaka orhejtsïkutiini, ambakiti ambesï uékani jati úni.
2 Ísï jimbo, orhejtsïkuti ma jatsisti para sési jámani, paraka kʼuiripu no uaaka no sési ambe uandani imeeri ambe, jatsisti para májku uarhiitintku kámani ka jatsisti para iámindu ambe jimbo pʼíngukuarhini; jatsisti para méntkisï sési eratsentani ambe ma,* iámindu ambe sési úni ka sési kámpini, ka ístu jatsisti para míteni néna jorhentpini.
3 No jatsisti para kauicheeni, nijtu no sési jámani.* Sánderu sési, jatsisti para kurhangutspini ka no inchandimeni. No jatsisti para ísku jatini arhirperani jámani máteruecha jingoni ka nijtu sentabu tsitini.
4 Inde tataka jatsisti para sési juramukuani* imeeri kʼumanchikuarhu anapuechani ka uájpeechaksï jatsisti para méntkisï kurhajchani ka sésiksï jámani
5 —jimboka enga tataka ma no uaaka sési juramukuani* imeeri kʼumanchikuarhu anapuechani, ¿nénajtu uaa exeni jarhani Tata Diosïiri kúnguarhikuani?—.
6 Inde tataka no jatsisti para iásï sáni ueenani jakajkuni, paraka no kʼéramakuarhiaka ka tátsekua májkueni kastigarinhani eska Noambakiti.
7 Ístu, kʼuiripuecha engaksï no jakajkutiika, jatsistiksï para ísï míteni eska ambakiti kʼuiripu máeska,* para no nema no sési uandani imeeri ambe* ka paraka Noambakiti no támisï paaka.
8 Ístu, sierbo ministerialiichaksï jatsisti para eratsekua jukariini; nóksï jatsisti para chkuanderani jámani, nijtu jukari kauikua* ambe arhani, nijtu sentabu tsitini ka nijtu imeecheeri ambe jimbojku uandanhiani.
9 Sánderu sési, jatsistiksï para méntkisï mintsikani, jo, mintsikani jindeesti ambe ma enga Tata Diosïiriika,* ka ístuksï jatsisti para jánguarhintani no no sési ambe niátani paraksï tátsekua no no sési pʼikuarherani jarhania.*
10 Ístu, orhetaksï jatsisti para exenhani eskaksï uaaka* indeni ánchikuarhitani úni; ka engaksï no ma ambe no sési exeminhaaka, jiánksï kʼóru uaatia marhuani kúnguarhikuarhu.
11 Ístu, nanakeechaksï jatsisti para eratsekua jukariini ka nóksï jámani uandakua jauatatspeni. Jatsistiksï para pʼíngukuarhini iámindu ambe jimbo ka ístuksï jatsisti para mintsinharhikueni iámindu ambe jimbo.
12 Ka sierbo ministerialiichaksï jatsisti para májku uarhiitini kámani ka jatsistiksï para sési juramukuani* imeeri uájpeechani ka ístu imeeri kʼumanchikuarhu anapuechani.
13 Jimboka ima tatakeecha engaksï sési újka imeecheeri ánchikuarhitani, ísïksï mítekateesti komueska ambakiti kʼuiripuecha, ka ístuksï méntku no sáni chéparini uandantasïndi eskaksï mintsikasïnga Kristu Jesúsini.
14 Ka nájkirukakini uékani jaka no ióni jimbo nirani exeni, ini ambekini karachixaka
15 jimbokani ma repentku ióndani jauaka nirani ka ísïri tʼu tʼuini mítetini jauakia na engari jatsika para jámani, jimbokari Tata Diosïiri familiarhu anapueska, enga jindeeka Tata Diosïiri kúnguarhikua, ima Tata Diosïiri enga tsípiti jaka, ka inde kúnguarhikua kuájpisïndi jurhimbikua ambeni ka úsïndi eska uíuinhasï jauaka.
16 Ka ísïisti, jarhasti ambe ma enga kʼéri ambeeka, ambe ma enga Tata Diosïiriika* ka jindeesti néna marhuakuni Tata Diosïni:* ‘Ima ísï xarhantasti komueska kʼuiripu ma, ísï exenhasti komueska nema enga sési jámajka jiáni enga niárapka espiritu máeni, ánjeliichani xarhakuaspti, imeeri ambe uandanhantasti ireteecharhisï, ka parhakpini anapuechaksï niáraspti jakajkuni imani, ka kʼéri ambe únhasti enga na auandarhu niántapkiaʼ.
Notecha
^ O “achamasï”.
^ O “jatsisti para jánhaskatiini”.
^ O “uarhipeni jámani”.
^ O “orhejtsïkuani”.
^ O “orhejtsïkuani”.
^ O “para sési ambe uandani imeeri ambe”.
^ O “para no ma repentku nóteru kuentu únhania”.
^ O “binu”.
^ Exe je Glosario, ambe ma enga Tata Diosïiriika.
^ O “paraksï ambakiti konsiensia ma jatsini”. Exe je Glosario, konsiensia.
^ O “eskaksï jorhendanhaskia paraksï”.
^ O “orhejtsïkuani”.
^ Exe je Glosario, ambe ma enga Tata Diosïiriika.
^ O “néna méntkisï kómarhini Tata Diosïni”, “néna no méni jurajkuni Tata Diosïni”.
