Primeru Karakata para Timoteu 4:1-16
4 Joperu espiritu santu uandasïndi eska sánderu orhepani máruksï nóteru mintsikaakia, jimbokaksï sánderu jakajkuaka imani ambe enga ísï xarharajka enajki Tata Diosïiri uandakue ka ístu ambe engaksï demoniuecha jorhentpijka,
2 ka kurhajchauatiksï imani kʼuiripuechani engaksï ísku apariika, engaksï chkuanderakua ambe uandajka ka engaksï nóteru ambe ma pʼikuarherajkia,* jimboka imeecheeri mintsita ísï jarhaska enajki pʼinderi* ma jukarini jaki jimboka tiámu jatsikunhaska jima.
3 Imeechaksï no jurajkuasïndi kʼuiripuechani eskaksï tembuchaaka ka uambuchani ka ístuksï arhiasïndi eskaksï no jámaaka arhani indeni tʼirekuani enga Tata Diosï kueraaka, joperu Tata Diosï ústi indeni tʼirekuani parakaksï imeecha auaka engaksï mintsikajka ka engaksï sési míteka jurhimbikua ambe ka diosmaiamukuaksï arhini Tata Diosïni indeni tʼirekua jimbo.
4 Jimboka iámindu ambe enga Tata Diosï kueraaka, kánikua ambakiti ambeesti ka kʼuiripuechaksï jatsisti para iámindu ambe jiókuarhini, joperuksï kʼóru jatsisti para diosmaiamukua arhijpini engaksï arhani jauaka,
5 jimboka tʼirekua ambe pímbinhajkunhantasïnga Tata Diosïiri uandakua jimbo ka kómarhikua jimbo.
6 Engari ini ambe arhistakuauaka erachiichani,* tʼuri sési marhuakuni jauaka Kristu Jesúsini ka ísturi sési mítetini jauaka indeni uandakua ambe engachi jucha jakajkujka ka ístu indeni ambakiti ambe engari jorhendanhaka ka tʼuri iásï jamberi ísï úxaka eskari na jorhendanhaka.
7 Joperu tʼu ísku kurhandi indeni uandantskuechani engaksï no sési ambe uandajka Tata Diosïiri ambe, indeni uandantskuechani engaksï kutsïmitiicha uandantaajka. Joperu tʼu seguiriini ja jánguarhintani* parari no jurajkuni Tata Diosïni.*
8 Ísïisti, marhuasïndi ejersisiu úni,* joperu sánderu kánikua marhuasïndi no jurajkuni Tata Diosïni,* ka iámindu ambe jimbo marhuasïndi, jimboka jarhuajpesïnga paraksï kʼuiripuecha pʼirani ambe enga Tata Diosï aiatspeni jaka ini irekua jimbo ka ístu imani irekua jimbo enga jurhani jaka.
9 I ambe meru ísïisti ka iáminduechaksï jatsipirindi para jakajkuni ini ambe.
10 Jimbochisï jucha xáni uinhamu ánchikuarhini jaka ka jimbochisï xáni jánguarhintani jaka, jimbokachi mintsikaxaka imani Tata Diosïni enga tsípiti jaka, imani enga iámindu jásï kʼuiripuechani pʼímutaantajka ka sánderia imeechani engaksï imani mintsikajka.
11 Seguiriini ja ini ambe arhistatspini ka jorhentpini.
12 Asï jurajkutakuarhi eskaksïni máteruecha ísku exeaka indeni jimbo engari tʼu sapichku jaka. Sánderu sési, tʼu jánguarhinta sési uandani, sési jámani, xénchpeni, mintsikani ka pímbinhasï jarhani, parakaksï májkueni uaaka imeecha engaksï mintsikajka Tata Diosïni.
13 Engani jamberi niáraska, seguirii jánguarhintani sánderu sési arhintani kʼuiripuechani japarini, arhistatspini* ka jorhentpini.
14 Asï ísku exe indeni intsïmperakuani engari jatsika ka engari jiáni intsïnhaka engaksï Tata Diosïiri uandakua páriicha* chiiti ambe uandantapka, jiáni engaksïni máru orhejtsïkutiicha pʼájtsïkupka.
15 Méntku eratsentani ja ini ambe; jánguarhinta mintsita jingoni úni íni ambe, parakaksï iáminduecha exeaka na engari xáni jánguarhintani jaka para Tata Diosïni marhuakuni.
16 Méntku exekuarhini ja na engari jámajka ka na engari jorhentpijka. Asï jurajku ini ambe úni, jimboka engari jánguarhintaska ísï úni, tʼuri pʼímutantskata uéraaka ka ístuksï pʼímutantskata uéraati imeecha engaksïni kurhajchaaka.
Notecha
^ O “ka enga imeecheeri konsiensia nóteru ambe ma pʼikuarherajkia”. Exe je Glosario, konsiensia.
^ O “tʼimbiri”, “sikatrisi”.
^ O “ermanuechani”.
^ O “jorhenguarhini”, “entrenariini”.
^ O “méntkisï kómarhini Tata Diosïni”, “sési marhuakuni Tata Diosïni”.
^ O “entrenariini”.
^ O “méntkisï kómarhini Tata Diosïni”, “sési marhuakuni Tata Diosïni”.
^ O “uinhaperpentani”.
^ O “engaksï profeteecha”.
