Primeru Karakata para Timoteu 5:1-25
5 Asï uinhamu xuka* imani achamasïni enga jatiriikia. Sánderu sési, ísï arhistaku enajki chiiti taatii; ka imeechani engaksï sánderu sapichku jaka, ísï arhistakua enajkiksï chiiti ermanue;
2 ka imani uarhiitiichani engaksï jatiriikia, ísï arhistakua enajkiksï chiiti naandii, ka imeechani engaksï sánderu sapichku jaka, ísï arhistakua enajkiksï chiiti pirenchii, ka méntkisï janhanharhikua jingoni kaa.
3 Janhanharhia* tsïndiichani ka t’u sáni exeani ja imani tsïndiichani engaksï nóteru nemani kánguarhijkia.*
4 Joperu enga tsïndi ma kánguarhiauaka uájpeechani o nimakuechani, iichaksï jatsisti para orheta imeecheeri kʼumanchikuarhu xarhatani eskaksï janhanharhisïnga Tata Diosïni* ka jatsistiksï para exeani jarhani taati jémbeechani ka tatiteechani, jimbokaksï ísïsï jatsika para úni ka Tata Diosï kánikua jaiapanhentasïndi ini ambe.
5 Joperu ima tsïndi enga nóteru nemani jatsikuarhekia ka enga no ma ambe jatsikuarheka,* mintsikasïndi Tata Diosïni ka chúrikua ka jurhiakua méntku kurhakuni jarhasïndi ambe ma Tata Diosïni ka kómarhisïndi.
6 Joperu ima enga tsïnchekuarhintajka úni ambe enga tsitijka, uarhistia nájkiruka útasï tsípiti jaka.
7 Ísï jimbo, tʼu seguiriini ja ini ambe arhistakuani* paraka no nema no sési uandaaka indeecheeri ambe.
8 Jimboka enga nema no kéndani jauaka imeeri familiani, ka sánderia imeechani engaksï imeeri kʼumanchikuarhu irekani jaka, nóteru jakajkuxatiia* ambe engachi jucha jakajkujka ka sánderu no sési jarhasti eska ima kʼuiripu enga no ma ambe jakajkujka.*
9 Ima tsïndisï jatsiti para kuenta úkateeni para jarhuatanhani enga jukari 60 uéxurhini jatiriuakia ka enga májku acheetini kámapka,
10 ka jatsisti para ísï mítekateeni eska tʼarhexeraaska uájpeechani, eska sési kámpiska, eska jupandukuaska pímbinharhatiichani, eska jarhuataaska imeechani engaksï kómu nitamakuarhini jarhajka ka eska méntkisï jánguarhintaska ambakiti ambe úni.
11 Joperu asï kuenta uaa imani tsïndiichani engaksï sapichku jaka, jimboka engaksï acheetini ma kánchani jarhajka,* uékasïndiksï uambuchantani, ka engaksï ísï jámajka, jurajkusïndiksï marhuakuni Kristuni.
12 Iichaksï jandiajku jirinhakuarhixati eskaksï kastigarinhaaka jimbokaksï no úska ísï eskaksï na aiatspepkia.*
13 Ka ístuksï pʼindesïndi no ma ambe úni ka jini ka jini jámani kʼumanchikuecharhu. Ísïisti, pʼindesïndiksï no ma ambe úni ka ístuksï uandatspini jámasïndi ka máteruechanksï jámasïndi inchaakukuani ka ísku ambe maksï jámasïndi uandani.
14 Jimbosïni uéjka eskaksï uambuchantaaka ima tsïndiicha engaksï sapichku jaka, eskaksï kánguarhiauaka sapiichani ka eskaksï imeecheeri kʼumanchikuarhu anapu ambe jámaaka úni, parakajtsïni no jámaaka arhinchani imeecha engajtsïni ikiachejka.
15 Ka máru uarhiitiichanksï támisï jánhastaastia paraksï Satanásini chúxapani.
16 Ka pirenchi* jatsisti para jarhuataani imeeri parientiichani engaksï tsïndiika para no kúnguarhikua kéndaani jarhani, ka ísï, kúnguarhikua uaati jarhuataani imani tsïndiichani engaksï nóteru nemani jatsikuarhekia.*
17 Ka ima orhejtsïkutiicha engaksï sési orhekupajka* kúnguarhikuani, jatsistiksï para sánderu kánikua janhanharhinhani ka sánderia imeecha engaksï uinhamu ánchikuarhijka paraksï Tata Diosïiri uandakuani jámani uandantani ka jorhentpini.
18 Jimboka Karakateecharhu arhisïnga: “Asï jáma kʼarajpe* jatsimukuni toruni enga tʼauatani jarhajka triguni”. Ka ístu arhisïndi: “Ánchikuarhiri jukanchasti eska maiamunhaaka”.
19 Tʼu asï ambe ma ú enga nema kʼamanharhitantani jauaka orhejtsïkutini ma* asta jiánia engaksï tsimani o tanimu kʼuiripuecha uandaaka eska inde ambe ísïiska.
20 Iáminduechani japarini xukaa* imeechani engaksï no sési ambe niátani jaka, parakaksï máteruecha no jámaaka májkueni úni.*
21 Jíkeni kurhachexaka Tata Diosïni japarini, Kristu Jesúsini japarini ka ánjeliichani japarini engaksï erakukateeka, eskari seguiriini jauaka ísï úni eskakeni na arhikia. Joperu asï jáma orhetatakuarhini ka ístu iáminduechani májkueni kaa.
22 Asï jáma sóntku pʼájtsïkuni nemani.* Ístu, asï terukukua imeechani engaksï no sési ambe niátajka. Tʼu seguiriini ja pímbinhasï jarhani.
23 Ásteru itsïmia,* sánderu sési, binu sáni á parari sési pʼikuarhearhantani ka indeni jimbojtu engari someni pʼamenchani jarhajka.
24 Ménisï mítekuarhisïndi ambe engaksï máru kʼuiripuecha no sési ambe niátani jarhajka ka sóntkuksï kastigarinhasïndi, joperu ménisï, tátsekua niárasïndia mítekuarhini ambe engaksï máteru kʼuiripuecha no sési niátani jarhajka.
25 Májkueni, engaksï kʼuiripuecha sési ambe újka niárasïndi mítekuarhini, joperu ambe enga no mítekuarhini jarhajka, siempri niárasïndi mítekuarhini.
Notecha
^ O “Asï uinhamu jurhimberanta”, “Asï uinhamu arhistaku”.
^ O “Sési kaa”.
^ O “engaksï meru uétarhinchani jarhajka”.
^ O “eskaksï kómarhisïnga Tata Diosïni”, “eskaksï sési marhuakusïnga Tata Diosïni”.
^ O “enga ísku pakaraka”.
^ O “juramukuani”.
^ O “nóteru mintsikaxatiia”.
^ O “enga no ma ambe mintsikajka”.
^ O “engaksï relasioni seksuali únchani jarhajka”.
^ Griegu jimbo: “no úska ambe engaksï ueenapka jakajkuni”.
^ O “uarhiiti enga jakajkutiika”.
^ O “engaksï meru uétarhinchani jarhajka”.
^ O “orhejtsïkujka”.
^ O “sutumukua”, “bosali”.
^ O “achamasïni ma enga jatiriuakia”.
^ O “jurhimberaanta”, “arhistakua”.
^ Griegu jimbo: “parakaksï chéaka”.
^ Indenisï arhikuekani jati eska no jámaaka sóntku uékani íntskuni nemani kʼéri ánchikuarhita ma.
^ O “Ásteru itsïjku aia”.
