Primeru Karakata para Timoteu 6:1-21
-
Jántspiriichaksï jatsisti para janhanharhiani patroni jémbeechani (1 ka 2)
-
Imeecha engaksï chkuanderakua ambe jorhentpijka ka jukari sentabu tsitini (3 a 10)
-
Ambe enga jatsika para úni ima enga marhuakujka Tata Diosïni (11 a 16)
-
Jánguarhintani méntkisï ambakiti ambe úni (17 a 19)
-
“Asï méni jurajku indeni ambe engakeni Tata Diosï íntskuka” (20 ka 21)
6 Imeecha engaksï jántspini jámajka, jatsistiksï para iámindu ambe jimbo janhanharhiani patroni jémbeechani, paraka no nema no sési ambe uandaaka Tata Diosïiri nombriiri ambe ka nijtu imeeri ambe engajtsïni Tata Diosï jorhendajka.
2 Ka imeecha engaksï jakajkutiichani jántspikuajka, asïksï jámee no janhanharhiani patroni jémbeechani, uandaparini eskaksï erachiiska.* Sánderu sési, jatsistiksï para sánderu sési ánchikuarhikuani, jimbokaksï imeechanisï jántspikuani jaka engaksï jakajkutiika ka engaksï xénchakateeka.
Tʼu seguirii ini ambe jorhentpini ka ini ambe arhistatspini.
3 Ka enga kʼuiripu ma máteru ambe jorhentpiaka, ka no uékani ísï úni eskajtsïni juchaari Tata Jesukristu na xáni sési arhistachika,* ka nijtu uékani ísï úni eskachi na jorhendanhaka para marhuakuni Tata Diosïni,*
4 inde kʼuiripu kʼéramakuarhini jarhasïndi ka méntku no ma ambe kurhangusïndi. Méntku inchandimeni jarhasïndi* máteruecha jingoni uarhipeni ka uandakuecha jimbojku arhirperani jarhasïndi máteruecha jingoni. I ambe úsïndi eskaksï kʼuiripuecha enbidiarpiaka, uarhipeaka, uandakua ambe jauatatspeaka,* eskaksï no mintsinharpiaka
5 ka eskaksï someni arhirperani jauaka ísku ambe ma jimbo ima kʼuiripuecha engaksï iámu xerejtsïkia ka engaksï no míteka jurhimbikua ambe, jimbokaksï eratsesïnga eskaksï uaaka andakua ambe jatsini engaksï marhuakuska Tata Diosïni.*
6 Ka ísïisti, ma niárasïndi kánikua andakua jatsini enga marhuakujka Tata Diosïni,* joperu jiántku enga ma tsípijka* xáni jingontku enga jatsikuarheka.
7 Jimbokachi no ma ambe juákuarhiska engachi ini parhakpinirhu juka, ka ístu, nóchi ambe ma uaaka pákuarhini.
8 Ísï jimbo, engachi jatsikuarheaka tʼirekua ambe* ka takusï ambe,* ju je tsípini xáni ambe jingontku.
9 Joperu imeecha engaksï jánguarhintani jaka jatsikuarheriini, méntkuksï tsʼéjkunhani* jarhasïndi ka ísïksï nirasïndi enajkiksï sïndari ma jingoni jupinha.* Ka no sési nikuasïndi jimbokaksï ísku ambe ma tsitisïnga ka enga no sési útspijka, ka inde ambe úsïndi eskaksï no sési nitamakuarhiaka ka eskaksï uarhiaka.
10 Jimboka jukari sentabu tsitini, úsïndi eska nema ueenaaka no sési ambe niátani. Ka jimbokaksï xáni tsitisïnga sentabu, máruksï nóteru mintsikasïndia Tata Diosïni, ka jandiajkuksï jirinhakuarhisïndi engaksï xáni no sési nitamakuarhijka.
11 Joperu tʼu engari marhuakujka Tata Diosïni, sïpakuarhiku ini ambe. Ka sánderu sési, jánguarhinta sési jámani, no jurajkuni Tata Diosïni,* mintsikani, xénchpeni, tekaantani ka iatsitakuarhu jámani.
12 Jatsiskari para uarhipeni indeni ambakiti uarhiperakuani jimbo parari kuájpini ambe enga Tata Diosï jorhentpijka. Kánikua jánguarhinta parari intsïnhani* tsípikua para méntkisï, indeni tsípikua engakeni Tata Diosï tʼungini uéjka íntskuni, ka engari sési aianguakia uánikua kʼuiripuechani.
13 Imani Tata Diosïni japarini, enga újka eska iámindu ambe tsípiti jauaka, ka ístu Kristu Jesúsini japarini, ima enga no sáni chéparini sésimindu uandontskuarhekupka Ponsiu Pilatuni, indeechani japarini jíkeni juramuchixaka
14 eskari ísï uaaka eskaksï mandamientuecha na uandajka ka eskari pímbinhasï jauaka paraka no nema jámaaka no sési ambe uandani chiiti ambe, asta jiáni jamberi enga xarhantaaka juchaari Tata Jesukristu,
15 jimboka inde enga xáni tsípijka ka enga xáni Uinhapitiika xarhataati na enga xáni uinhapika jiáni enga uaxastakata jakaia. Imajkusï jindeeti Juramuti máteru juramutiicheeri ka imajkusï jindeeti Tata máteru tateecheeri,
16 imajkusï no méni uarhiati, ka jima* irekasti nani enga no nema újka niárani, imani no nema exexati ka nóksï méni uaati exeni. Eska ima kʼéri ambe arhinhaaka ka eska para méntkisï uinhapikua jatsiaka. Eska ísï úkuarhiaka.
17 Arini ambe arhia* imani kʼuiripuechani engaksï jatsikuarheriika ini parhakpinirhu:* eskaksï no jámaaka eratseni eskaksï sánderu kʼéri ambeeska eska máteru kʼuiripuecha* ka eskaksï no jámaaka mintsikani indeni jatsikuarhekua ambe enga niárajka kʼamakurhini, sánderu sési, eskaksï mintsikaaka Tata Diosïni, imani engajtsïni kánhachani íntskujka ambe ma, ambe engachi jucha xáni jatsikuarheka.
18 Arhia eskaksï sési ambe uaaka, eskaksï jánguarhintaaka méntkisï ambakiti ambe úni, eskaksï intsïmpitiuaka* ka eskaksï íntsauaka máteruechani ambe engaksï jatsikuarheka,
19 ka engaksï ísï úska, niáraatiksï jatsini imani jatsikuarhekua ambe enga Tata Diosï íntspijka, parakaksï sési irekaaka sánderu orhepani ka paraksï imani tsípikua jatsini enga sési jimbo tsípikueka.
20 Timoteu, asï méni jurajku indeni ambe engakeni Tata Diosï íntskuka. Ísku kurhandi indeni ambe enga no terukuntajka Tata Diosïiri ambe jingoni ka asï kurhandi indeni ambe engaksï kʼuiripuecha uandajka míteni ka enga no terukuntajka jurhimbikua ambe jingoni.
21 Ka jimbokaksï máru indeni ambe jakajkuska, nóteruksï mintsikasïndia Tata Diosïni.
Eskaksïni Tata Diosï kánikua kóndentaaka.
Notecha
^ O “ermanueska”.
^ O “ka no indeni arhistakua jingoni enga kánikua marhuajka”, “ka no indeni arhistakua jingoni enga sési útspijka”.
^ O “para méntkisï kómarhini Tata Diosïni”, “para no jurajkuni Tata Diosïni”.
^ O “Kánikua tsitisïndi”.
^ O “no sési pʼikuastpeaka uandakuecha jingoni”.
^ O “engaksï méntkisï kómarhiska Tata Diosïni”, “engaksï no jurajkuska Tata Diosïni”.
^ O “enga méntkisï kómarhijka Tata Diosïni”, “enga no jurajkujka Tata Diosïni”.
^ O “konforme jarhajka”.
^ O “ambe jingoni kuájchakuarhini”. Griegu jimbo: “órhekuarhini”.
^ O “ambe jingoni nitamakuarhini”.
^ O “méntkuksï no sési niátani”.
^ O “ka trampa ma jimboksï niárasïndi”.
^ O “kómarhini Tata Diosïni”, “sési marhuakuni Tata Diosïni”.
^ O “Uinhamu jupika indeni”.
^ O “ka imani tʼíntskua jimbo”.
^ O “juramukua”.
^ O “ini tiempu jimbo”. Exe je Glosario, tiempu.
^ O “eskaksï no jámaaka kʼéramakuarhini”.
^ O “eskaksï méntku no chéjkuaka intsïmpini”.
